Ehangano lyaFrank Fredricks lya nkondopeke ishewe omaudhano

0
410

 

Windhoek- Ehangano lya Frank Fredericks Foundation (FFF) olya ulike ishewe eitulemo lyalyo moku kwathela nokunkondopeka aadhani aagundjuka okupitila melongo nomuudhano.

FFF shika okwe shiningi sho nonuumvo a kwathele omudhani gwogolfa omugundjuka moku mu pa iimaliwa yeilongo yongushu yoodola omayovi 20,000.

Gabriel Shikodi omudhani omugundjuka gwogolfa okwa pelwe iimaliwa mbika Omaandaha oshiwike shika moVenduka.

Iimaliwa mbika oya gongelelwe pethimbo lyuudhano wa FFF wogolfa woku gongela oshimaliwa wa ningilwe moVenduka okuuka pehulilo lyomvo gwayi.

“Tse otwa nyanyukwa okukwatha Gabriel Shikodi oshikando oshitiyali ,oku mu kwatha meilongo lye oshowo muudhano we sho ta tu mu pe oo N$20 000 omolweilongo lye,” gumwe gomaawiliki ya FFF Anibal Rego osho a popi pethimbo lyegandjo lyoshimaliwa shoka Omaandaha oshiwike shika.

“Iilonga yoonkondo yaGabriel muudhano oshowo koUnivesiti yUudhindoli nUuteknologi oyu ulike kutya iimaliwa mbika oya pungulwa nawa.Onkene nuumvo otwa tokola ishewe okukwatha omulumentu nguka omunamagano.Tse otu uvite etumba kuye”osho Rego a gwedha ko.

Omvogu, Shikodi okwa li a kalelepo Namibia puudhano wo Zone-6 mo Kampala, Uganda okwa li wo a sindana uudhano wo golfa moGobabis noWindhoek. Omanga okweya puutiyali muudhano wogolfa moTsumeb no pe hala  etitatu mwaamboka wopoRossmund ye ta kanitha uudhano wopOmeya sho a thigwapo komudhani gwopaithano Francois Hanekom. Shikodi, okuli pondondo ontiyali momusholondondo gwaadhani yogolfa moNamibia palandulathano lyo Namibian Golf Union (NGU),no kwa hogololwa oku ka dhana muudhano woSouth African Amateur Open okuza 28Febuluali sigo 4 Maalitsa nuumvo poGeorge Golf Club.

Okwa hogololwa wo a ka dhane muudhano woshitopolwa oshititano ,moka ospana ta yi ka dhana muApilili.

“Onda hala okupandula Frank Fredericks Foundation molwekwashilipaleko ndika li thike mpaka okukwathela meilongo lyandje oshowo muudhano wandje wogolfa.Okupitila mulyo ngame otandi kala ndi itula mwaashoka shina oshilonga ootundi dhandje oshowo uudhano wogolfa,” osho Shikodi a popi nenyanyu.

Ehangano ndika olya longitha wo ompito ndjoka oku kumika aadhani ayehe mboka natango haya dhana opo ya ninge omaindilo giimaliwa yokwiilonga noyo kwiilonga omaudhano nuumvo.Mbaka oye na ompito okugandja omaindilo gawo sigo omomasiku 12 gomwedhi nguka.Mboka ya hala okuninga omaindilo ota ya vulu okukwatathana nombelewa ya FFF kondjukithi  ndjika fff2@afol.com.na oku mona uuyelele owundji.

 

LEAVE A REPLY

Please enter your comment!
Please enter your name here