Iilyo iipe yoospana dhaadhengingonyo mOshana

0
243

 

ONDANGWA – Aaholi yuudhano woongonyo oshowo aakalelipo yooclub dhaadhengingonyo oyali ya gongala omwedhi gwa ziko nelalakano opo ya hogolole ewiliko epe moshitopolwa shaShana. Shino shali sha ningwa poshigongi shoka shokomumvo.

Omupitithi guuyelele Virlo Shikeva ngoka ali a kwatathanwa naye okwali a yelitha kutya omutumba nguka ogo gwotango gokomumvo, no ya hogolola ewiliko epe manga omvula yili petameko yo ya longe noku humithakomeho uudhano mbuka moshitopolwa.

Yamwe yomwaamboka ya hogololwa okukwatela komeho uudhano woongonyo mOshana oyo Josua Toivo omunashipundi omanga Simon Amakali omupevinashipundi.Asser Nghikwena okwa hogololwa a ninge amushanga, Jeremia Ndjembo omuniiniwe na Virlo Shikeva omupopiliko gwehangano ndika.

Shikeva okwa indile ayehe mboka yena ehalo noya hala ya gwanithepo iipewa yawo yuudhengingonyo opo ya wayimine oosipana ndhoka dhili popepi nayo yo ya tameke okuninga omadheulo manga kuyele.Ta pula aakwashigwana yi itulemo yo ya kale taya holoka komaudhano goludhi ndoka noku gandja omukumo kaadhani.

“Nuumvo otwa hala opo tu kale tuna aadhengi yoongonyo oyendji, oshowo twa hala oku tala ombinga unene kuunona opo tu wu dheule manga wuli mepipi eshona lela opo sho tawu ka koka owa dheuka mo moshilongo tamu kala aadhengingonyo oyendji mbono taya kala taya eta omasindano moshilongo,” Shikeva ta ti.

Ta indile oosipana ndhoka tadhi dheula aadhenginonyo moshitopolwa shOshana ya kale yi itulamo, yo ya putudhile epipi eshona ohokwe yuudhengingonyo. Ta indile aadhengingonyo ya kale taya ihumbata nawa yo yi itulemo aluhe momadheulo nomaudhano. Shikeva ta gwedhako kutya nuumvo oya thaaneka opo ku  totwe ko ku kale oclub yaadhengingonyo pokakololo kehe mOshana, yo ya yambulepo okudhenga oongonyo moshitopolwa.

LEAVE A REPLY

Please enter your comment!
Please enter your name here