Omusita a tetagula omukiintu nekatana

0
415

 

IIPANDA – Omusita David Shiyuka (37) moshitukulwa Oshikoto okwa holokele mompangulilo yaMangestrata mOndangwa sho ali a tulwa miipandeko kopolisi anuwa sho a tetagula omukiintu nekatana.

Shiyuka ngoka eli omusita gwongeleka yoshiveva, kali pulwa manga a tye ko sha kwaashoka ta tamanekelwa, no kali a pewa iifutile mo mondholongo. Okuli mondjedhililo sigo ethimbo ndika.

Otaku hokololwa kutya omukiintu gwoomvula 41 gomomukunda Iipanda moshikandjohogololo Okankolo okwali a monithwa oshiponga sho anua a tetwa nekatana komulumentu nguka.

Omulumentu naku ninga oshiningwanima shika otaku hokololwa eli omukalimo momukunda ogo tuu ngoka, na oha ningi omauvitho okuziilila megumbo lyaandjawo mIipanda omo tuu moka.

“Onda adhika owala ndili piiyale yili pooha negumbo komatango kwa toka lela sho nda haluka nda ponokelwa komulumentu oye tuu ngoka nekatana, eta tameke ta tete ndje nekatana ndyoka ali ena peke lye ta ti ota dhipaga ndje omolwa iikombo yandje mbyoka ta ti anuwa oha yili epya lye,” Letta Edward ta ti ngaaka.

Edward ngono ati okwa tetwa iikando itatu momutse, kokwaako oshowo koshikaha pokati kominwe, okwa ti konima sho a hahalwa ngeyi omusita nguka anuwa okwali a yi megumbo lyaandjawo, omanga ye a matuka ta yi puushiinda ye aka popilwe.

“Aashinda shandje oyali yi ithana opolisi oshoka onda li te zi oombinzi ndjono ya thiki mbala noya fala ndje koshipangelo hono ndaka ithanenwa ambulasa ngono a fala ndje meendelelo kOnandjokwe hono ndaka hondjwa. Pethimbo ndino ohandi ka mangululwa pokapangelo pOnyuulae,” ta gwedha po.

Yamwe yomaashiinda mboka yali ya hokolola kutya omusita Shiyuka nguka nande okwa adhika opo eyapo esiku ndyoka okwa tameke owala ta nyenyeta anuwa epya lye hali likapo kiikombo ya Edward, taya ti omapopyo gomusita iifundja iifundja yowala.

LEAVE A REPLY

Please enter your comment!
Please enter your name here