Peter  ondume yomomufitu: Oomwedhi mbali mondholono yaNdangwa

0
436
Peter Jungle Fighter

Mesiku 10 Juli 1986 lwopotundi ontiheyali netata, Smith okwi ile ndje mokandholongo ka ndje noku fala ndje kohauto. Shono nda londo mohauto okwa manga ndje komeho omanga inaa mangela elyenge ndyoka lya manga omagulu gandje kekwawo lya mangelwa moshihauto. Molwashoka onda li nda mangwa komeho inandi tseya nenge ndi ndhindhilike kutya onda li tandi falwa peni oshoka kandali nda lombwelwa sha.

Konima onda koneke kutya otwa li tu uka kokule oshoka ethimbo ndyoka twa ende opo tu thikame olya li ele noonkondo. Sho twa thiki hoka, akwiita oya kutha ndje mo mohauto natango nda mangwa komeho. Pethimbo ndyoka onda koneke kutya onda li nda falwa kehala limwe lya yooloka kokandholongo moka nda kala nde edhililwa manga inaandi etwa huka.

Ondholongo ndjika onda koneke kutya oya li nuukwatya womiyelo dhiitenda omidhigu oshowo oya kudhila unene. Oonakukwata ndje kaya li ya lombwele ndje kutya ondili peni, ngame ishewe kandali nonkwa okuya pula. Oya fala ndje mokandholongo kena ombete yekuma lyokaungulita. Kombanda yombete okwa li kuna ekumbatha limwe lya luudha noonkondo.

Omwa li wo eemele lyokandjugo lili mokolonela yokandholongo hoka uuna ngele onda pumbwa okwiiwatela. Omweelo gwokandholongo ogwa li gwalongwa moshitenda oshidhigu no gu na okambululu okashona mpoka hapa pitithilwa oshiyaha shiikulya. Okandholongo okali nokakende okashona katulwa iitenda iikukutu okukeelela aanadholongo opo yi iyakemo. Sho nda thiki moka onda mono kutya nonando ondi kambadhale shi thike peni kapena nando ompito yimwe oku iyakamo.

Mokukala kwandje mondholongo mOndangwa kandali nda hepekwa kolutu pakudhengwa nenge nokufikwa nomalusheno. Iiketanga mbyoka ndali nda mangwa na yo oya mangululwamo, kakele omalyenge gokomagulu inaga kuthwako. Ihe nando ongaaka iilongithwa yomutondi oya soshimpwiyu kutya onda pula pulwa pwaana ezimbuko. Mboka ya kala noku pula ndje otandi dhiladhila kutya aaniilonga yomeholamo ya za koVenduka oshowo koSouth Africa. Oya li ha ye ya kungame nomapulo ogendji  ngoka ga li ga faathana  nenge ga pulilwe nale kooyakwawo kOshakati. Onda li nda dhiladhila kutya mbaka oya li ta ya kambadhala  ngiika okutala ngele otandi ya pe omayamukulo ga faathana ngoka nda pele nale mboka ye ga pulile ndje. Oyendji yomaanambelewa mboka ya talele ndje po mOndangwa oya holoka ngiika aakuluntu momatanga gegameno gaSouth Africa.

Ka ye na esiku ya gumine ndje kolutu nonando omalupita oya kala noku tilitha ndje kutya otaya kadhipaga ndje nomake gawo. Oya pula omapulo omashona okukoleka shoka ngame ndali nda hokololele ooyakwawo kOshakati. Sho ethimbo lya piti onda tameke ndina omaipulo kombinga yaashoka omutondi a hala okwaadha. Oya li taya kongo uuyelele uupe omanga inaa ya tameka okuhepeka ndje nomapulo, nenge pamwe oya vulwa oshoka inaya vula okumona sha mungame.Nenge pamwe oya li  taya landula uuyelele wumwe uupe kombinga yiilonga yandje yoshili meni lyaNamibia. Ondi ipula kutya omolwashike ihaa hepeke ndje we ngaashi ya li ye shi ningi monakuziwa. Ngaka ogo gamwe gomomapulo ngoka gakala noku hepeka ndje.

Aanambelewa ayehe mboka ya li ya pula ndje manga ndili mondholongo mOndangwa ka pwali nando ogumwe iile a zala omuzalo gopakwiita.Ayehe oya li ya zala nawa miikutu yaakwashigwana.Ishewe ayehe oya li yii ihumbata nawa ngaashi aanawino yomadhiladhilo oshowo aalundululi yuuluyi womuntu. Nonando ina ya hayagula ndje, onda li ndishishi kutya oya li ya hala okulundulula okudhiladhila kwandje opo ndi tameke okuya longela, ngaashi ya li taya longo naakwiita mboka ya kwata ya li yoPLAN noshowo aantu mboka yena olukeno noSWAPO. Mboka ya ,li ya pula ndje omapulo ka ya li yi itumbula komadhina,onda ka thigapo ehala  ndyoka inaandi tseya kutya mboka oyo oolye.

Kandina esiku nda zilemo mokandholongo hoka sigo omesiku eti 10 Auguste 1986 sho ya shuna ndje kOshakati. Manga ndali mOndangwa  onda li handi etelwa iikulya lumwe pethimbo lyomwiha. Olusitati nuulalelo owa li uupambu uyali womboloto obrowna nokoothiwa yaana osuuka nenge oshithima shaanomulyo. Shika oshali inaa shi fa shoka ndali handi li kOshakati omanga inaandi lundululilwa kondholongo kOndangwa.

Lwopotundi ontiheyali mesiku eti 10 Auguste 1986 aanambelewa yaali yegameno oye ya pokaselle kandje nokupula ndje ndi ya landule momukala. Oya li ya soshimpwiyu kutya onda mangwa komeho noshowo ondi li miiketanga ngaashi shito. Oya tula ndje mosheenditho  shoka sha fala ndje kOshakati.Moshakati ngame onda shunwa mondholongo yandje yoshito. Aanambelewa oya kuthako elapi komeho gandje nonande ya thigi ndje momalyenge nomiiketanga.

Esiku ndyoka kandali nda li uulalelo.

Ongula yesiku lya landula Du Plessis okwa lombwele Smith a egulule ndje mo mokaselle kandje. Smith okwa fala ndje mbala kotenda yimwe yopokati yali mokati kokamba yoonkwatwa mu ka onda adhamo onkwatwa dhili omulongo dha kuutumba tadhi hapula

Okwe dhi lombwele kutya ngame omuntu a simana unene, no inee dhi lombwela edhina lyandje kutya ongame lye. Okwa lombwele oonkwatwa kutya ngame oshikulo oshipyakadhi. Okwa ulukile ndje  ombete yomalyenge hoka ndina okulala. Okwa lombwele ndje opo ndi kiiyoge mobata yili puuyelele popepi notenda. Smith okwa soshimpwiyu kutya omagulu gandje oga mangwa nomalyenge. Konima sho Smith a zipo onda tameke okupopitha oonkwatwa dhilwe nokudhi tseya. Oonkwatwa adhihe odha li aakwiita yoPLAN mboka ya li ya kwatwa momalugodhi ga yooloka meni lyaNamibia. Oyendji yomuyo oya li natango ye na iishaho yooholo.Yalwe oya li ya teka omagulu nomaako. Mokati kaambaka omwa li okomanda yoplatoon  Indongo Hamunyela ngoka okugulu kwe kwa li kwa gumwa kiitandu yooholo dhomutondi pethimbo lyolugodhi.Indongo okwali okommanda yoplatoon moDetachment “A”.Otwa li tu shaathane pethimbo sho ndali handi longele meni lya Namibia oku za momumvo 1978 sigo 1983 koshitopolwa shokuumbangantu zilo.Yalwe oyali oohailwa okuza komahala galwe gomalugodhi .Sho twa tseyathana omadhina otwa tameke okupulathana kutya osheende ngiini opo tu gwile momake gomutondi.Yamwe yoomoohailwa oya kala noku ithana ndje ndasimana, oshoka anuwa okuza esiku nda kwatwa, aakwiita mokamba oya li ya hokolola kutya oya kwata omuntu asimana unene onkene oya hogolola oku ithana ndje omuntu a simana pehala lyoku ithana ndje nedhina lyandje.

Oshiwike shotango shaAuguste 1986 onda li nda manguluka kokudhengwa, kokupulwa oshowo kokuhepekwa.Utya pamwe noonkwatwa tse otwali hatu longithwa okuopaleka momudhingoloko gwootenda. Aakwiita yamwe mboka ya li ya kwatwa oya kala omathimbo gamwe haya longithwa okutoolapo oombapila pondje yokamba ya kalelwa kaakwiita ya homata. Kakele ketu yaali mboka twa li momalyenge yalwe oya li haya inyenge ya manguluka mokati kootenda nokudhana uukalata okuenditha ethimbo, katwali twa pitikwa okuya  kootenda dhilwe hoka kwali oguerrilla dhiikengelela, ongundu ndjoka ya li ya thikamapo maakwiita nale yoPLAN.

 

 

 

.

LEAVE A REPLY

Please enter your comment!
Please enter your name here