Aavali naya kuthombinga melongo –Haufiku ta ti

0
422

ESHAKENO – Kansela gwoshikandjohogololo Eenhana, Udeiko Haufiku okwa pula aavali ya kuthe ombinga melongo lyaanona yawo. Eindilo ndika okwe li ningi Omaandaha oshiwike shika pethimbo ali ta popitha aavali, aalongi oshowo aanaskola posikola yongula pEshakeno.

Haufiku okwa indile aavali ya kale yena oshinakugwanithwa shokutuma aanona kosikola, yo ya kwashilipaleke kutya omunona kehe momukunda oha yi kosikola. “Elongo olina aakuthimbinga yatatu, mbono ya pumbwa ya longe muukumwe opo elongo li gandje lyo li taandelithwe ngaashi sha pumbiwa, yo mbaka oyo aavali,aalongi naanaskola yoyene,” Haufiku ta ti.

Ta pula aavali ya yambidhidhe aluhe aanona miilongwa yawo yesiku noku ya sila oshimpwiyu, yo ya tonatele nawa aanona yaa ye komanongelo nondjala, yo yi itule melongo lyawo. Haufiku ta ti ota pandula oholomende sho ya etapo elongo lyoshali onkee ota indile aanona ya kale ya tumwa kosikola. Ta ti aalongi oyi ilongekidha ethimbo kehe okugandja elongo lyongushu kaanona.

“Ekuthombinga lyaavali melongo lyaanona olya simana unene monkalamwenyo yokaana ,oshoka otashi tsu okanona omukumo ko ka mone kutya naakuluntu yako oyena oshinakugwanithwa, nolune opo okanona ka kale ka mona elongo, aanona oyo aaleli yokomongula noya pumbwa ya tsuwe omukumo ya ilonge nuudhiginini, yo ya ka ete omahumokomeho moshilongo ngoka inaatu vula ku eta mo pethimbo lyetu,” Ta gwedhapo ngaaka.

Okwa tsikileko ta pula aanona yi ilonge yo ya simaneke elongo , aalongi oshowo aavali yawo yo ya tseye uuwanawa mboka tawu adhika melongo. Ta pula aalongi ya longe nawa , yo ya gwanithepo iilonga yawo yesiku. Okwa indile aavali ya tseyithile aanona uuwanawa welongo, yo ya kale taya pukulula aanona miilongwa yawo. Haufiku ta ti aavali naya kwashilipaleke kutya aanona ohaya thiki mbala komanongelo, no ihaya hulile oondjilakati, yo ya mone elongo ya  galulile sha moshigwana monakuyiwa.

LEAVE A REPLY

Please enter your comment!
Please enter your name here