Peter ondume yomomufitu: Nda kuthwamo mondholono noku falwa miihwa

0
413
Peter Jungle Fighter

Momasiku 28 Auguste1986 omanga nda kuutumba pondje yotenda, Du Plessis okwi ithana ndje nokwa ti nandi mu landule kombelewa ye. Ndele omanga inaandi thika mombelewa ye okwa pula ndje opo ndi kale nde mu tegelela pondje. Konima okwa zi mo mombelewa ena oshilapi oshitokele peke shoka a mangitha ndje komeho.

Otwa ende naye uule woshinano shontumba sigo oosho a gandja ndje miikaha yomukwiita ngoka a lombwele moShimbulu opo a hedhithe ololi popepi.

Du Plessis okwa li a soshimpwiyu kutya onda mangwa nomalyenge komagulu oshowo kutya ondili miiketanga komaako omanga inaandi yambulilwa meloli. Konima onduuvu sho ta lombwele omuhingi opo a fale ndje kOndangwa pamwe naantu yalwe.

Okuza mpoka otwa ka thikama pehala limwe mpoka twa adha omaloli gaakwiita. Otwa kala manga mpoka okathimbo nokuza mpoka otwa tsikile naasho twa ka thikama otuli pokamba yoBatallion    101mOluno.

Omaloli oga thikama posheelo shokamba omanga gamwe oga yi meni lyokamba. Ngame onda kala meloli lyalangelwa kaakwiita yatatu  yaali aaluudhe noshilumbu shimwe. Otwa kala posheelo shokamba mpoka sigo opokati komutenya omanga inaatu tsikila nondjila yetu. Pethimbo ndika kandali we nda mangwa komeho onda li ashike nda thigwa momalyenge gokomagulu nomiiketanga. Osheendo shomaloli oshali sha thikama momaKasperi gahamano, oololi ne dhomabofola,ololi yimwe yomeya nonkwawo yomahooli.Otwa zi mOndangwa tuuka uumbangalantu twa landula ondjila yaNdangwa naShikango. Otwa landula ondjila ndjoka oshinano shookilometa omulongo omanga inaatu ka goyokela tu uka kuuzilo mbangalantu oku uka miihwa sigo otwa thiki puundingosho wumwe mpoka aakwashigwana ya gongelwa nokupulwa omapulo. Nonando inandi tseya kutya mbaka oya li ya pulwa shike onda mono aakwiita yatatu yoKoevoet ta ya   dhenge uumatyona wuli uyali.

Uumatyona mbuka owa ka etwa popepi neloli moka ndali opo ndi wu dhimbulule andola. Kandali ndi wu shi molwashoka oshitopolwa shoka osha li oshipe kungame. Uumatyona mbuka owe ethiwa nonando wa li wa dhengwa pwaana omatompelo gasha. Okuza puundingosho mboka otwi inyenge tu uka muumbangalantu okuza momukunda gumwe okuya komukwawo ta tu kongo aakwiita yoSWAPO. Sho kwa tameke ta ku luudha kommanda ngoka inaandi tseya edhina lye okwa lombwele aakwiita ya ye miihwa opo osheendo shilale mpoka uusiku mboka.

Pethimbo twa li tatu inyenge okuza komukunda gumwe okuya komukwawo onda kala tandi ipula nkene tandi hupu ngele andola otu ponokelwe kaakwiita yoSWAPO. Ondi ipula ngaaka molwashoka onda li miiketanga komaako oshowo omalyenge komagulu onkene ngele ando oKasperi oya umbwa noBazooka andola ngame onda pile mo omanga omakakunya taga nukamo noku fadhuka po.

Otwa lala uusiku mboka no inaatu ponokelwa kaakwiita yoPLAN. Ndele shono tuu twa thikama, onda lombwelwa opo ndaazemo nando omololi. Yo aakwiita mboka ya li noshinakugwanithwa shoku langela ndje na yo omo ya lala mololi. Oya li ya siikile ndje nekumbatha lyaluudha omanga yo ya lala mooshako dhokulala dhopakwiita. Omanga inaa ya kotha oya soshimpwiyu kutya oya tula ndje lwokonima yololi, yo taya mangele elyenge lyandje mokatemba ka hilwa kololi. Oya londodha ndje opo ndaa hedhe puyo oshoka ngele onde shi ningi ota ya yaha ndje.

Sho kwashi otwa tsikile ondjila yetu twa piti mOkatope, Onengali sigo osho twa thiki muuninginino gwOdibo. Omikunda ndhika odhimwe dhaandhoka tandi dhimbulukwa. POdibo otwa monopo oompadhi ndhoka twafekele tashi vulika dhaakwiita yoPLAN. Ndhika odha landulwa sigo opuundingosho. Omakasperi oga kondeke uundingosho, omanga aakwiita ya yi muundingosho noku kuthamo aakwashigwana ayehe mboka ya li taya nu omalovu moka. Onda mono aantu taya undulwa yo taya dhengwa niitako yoondjembo, taya thiminikwa okuzimina kutya yo iilyo yoPLAN. Aakwiita yoKoevoet oya dhengagula okamatyona kamwe pwaana omatompelo no ye ke keetha okukadhenga sho ka kambuka.

Okuza puundingosho otwaa uka kuumbangalantu sigo otwa taaguluka oongamba okuya moAngola. Otwa hingi tu uka kuuzilo twa landula oongamba dhAngola sigo twa galukile ishewe moNamibia. Uusiku uutiyali otwa kala moluhwa popepi nomukunda gumwe. Natango onda lala mololi nda langelwa kaakwiita yaali, mboka haya langele ndje aluhe. Oya mangele elyenge lyokomagulu gandje kokatemba hoka kali ka hilwa kololi, opo kaandi kambadhale okufadhukapo uusiku. Ongula sho kwashi otwa hingi noku ya kokamba yaakwiita kEenhana,okupitila momikunda dha yooloka.

Uusiku sho we ya otwa lala moololi dhetu pondje yokamba.Natango onda langekwa mololi no inaandi pitikwa ndi zemo. Onda ethiwa ashike ndizemo uuna ndali nda pumbwa oku ikwathela.

Esiku lyalandula oololi ne mwakwatelwa ndjoka ndali nda londekwa odha shuna koBattalion 101 kOndangwa. Otwa thiki mOndangwa mokati komutenya mesiku 1September 1986. Ngame onda ka londekwa mololi yimwe ndjoka yali yashuna ndje kondholongo kOshakati.

Kandali nontseyo kutya omolwashike ya falele ndje miihwa, ngiika pamwe oya li nelalakano opo ndi ka ulike aakwiita yoPLAN mokati kaanamikunda. Ngele ndika olyo lyali etompelo otandi ti oya  ndopa oshoka inaya mona nando omukwiita gumwe goPLAN. Ethimbo nda galulilwa kOshakati,  omutondi ka li we a manga ndje komeho. Ihe natango oya li ya soshimpwiyu kutya ondili momalyenge komagulu gandje. Molwashoka kandali nda mangwa komeho onda mono lwotango ondholongo okuza kondje. Sho nda thiki onda falwa motenda moka ndali ndeedhililwa omanga inaandi ya kOndangwa.

Ooyakwetu mboka ya li ya kwatwa oya li ya tegelela ndje ya hala okuuva kutya ondali peni.

Yamwe oya li ya dhiladhila kutya onda ka dhipagwa, oshoka anuwa oyu uvile omukwiita gumwe tati itandi ka galuka we. Sho nda hokolola shoka sha ningwapo shono inaandi tumbula nenge ndi ulike aakwiita yoPLAN nenge aakwashigwana, mbaka oyali ya nyanyukwa shoka inandi landithapo nando iilonga yekondjelomanguluko. Atuhe otwi itsu omukum po tu tsikile nekondjelomanguluko nonando otuli  miikaha yomutondi gwetu.

LEAVE A REPLY

Please enter your comment!
Please enter your name here