Salim Ahmed Salim omuAfrica iikalekelwa  

0
414

 

Omundohotola Salim Ahmed Salim omulumentu ngoka onkalamwenyo ye ayihe eyi longitha moku kutha enenevi Afrika muukoloni. Omolwiilonga ye mbika iinene a longela enenevi ndika ongundu yaalongwantu oya nyola embo kohi yoshipalanyolo ‘Salim Ahmed Salim: Son of Africa’. Omundohotola Jakkie Cilliers, Omunashipundi gwewilikongundu lyoshuukithilo shedhina Institute for Security Studies (ISS) oshowo omukomeho gwehangano lyo

African Futures and Innovation oye  a tala nawa noku leshulula embo ndika.

Ohokwe nehalo lya Salim mekondjolemanguluko oshowo olukongo lwe okumona Africa alihe lya manguluka okwe yi pendulilwa kuJulius Nyerere. Pethimbo ndyoka Salim Ahmed Salim a tsakanene na Nyerere okwa li omugundjuka gwomimvo 17.

Salim okwa tsakaneke Nyerere pethimbo omuwiliki gwotango gwaTanzania a li metalelopo kontuntu yaZanzibar. Nyerere okwa li   ta humitha komeho ehangano tali kondjele emanguluko lyiilongo yOpokati noshowo mbyoka yokuuzilo wAfrika.

Omumati gwomunasikola Salim ethimbo ndyoka okwa li omupevinashipundi omukokoli gwehangano lyaaIilongi hali ithanwa All Zanzibar National Students’ Organization oshowo Amushanga Ndjai gwehangano Youth’s Own Union,ehangano ndika olyali lyaagundjuka haya longele kumwe nongundu yopolitika yedhina  Zanzibar  Nationalist Party. Salim okwali poshigongi shika sha popithwa ku Nyerere opamwe naMnazi Mmoja omumvo1959.

Etsakaneno ndika olya nwethamo okudhiladhila kwaSalim kombinga yuukwAfrika naashika oshe mu kumike opo a longe iilonga ye mbyoka ya palele ondjila iilongo oyindji yAfrika emanguluko.Oshowo okuteya ondjoko yuupiyapika wa Ian Smith moZimbambwe nande nguka ali a gana omumvo gumwe kutya oshilongo shoka itashi ka lelwa kaaluudhe manga ye ena omwenyo.Salim okwa longa nomazigudhe oku eta ehulepo lyepangelo lyokakombo noludhi moSouthAfrica oshowo emanguluko lyaNamibia mo 1990.

‘Euveko lya Mwalimu kombinga yopolitika ya Zanzibar olya fuula ndje unene tuu ye sho eyi ngongo muule  oshowo nawa nawa nkene yili.Etumwalaka ndyoka olya kala onyeka ndjoka ya wilike onkalamwenyo yandje’osho Salim a popi konima monkalamwneyo kombinga yetsakaneno ndika.

Zanzibar, ontuntu moka mwa valelwa Salim oya li ta yi kondjele emanguluko okuza muupiyapika waBritania.Ontuntu, ndjika oya mono emanguluko omumvo 1963 sigo oosho yiimanga kumwe na  Tanganyika okuthikamekapo United Republic of Tanganyika na Zanzibar omumvo 1964, oshilongo shika osha ka lukululwa noku ithanwa United Republic of Tanzania pehulilo lyomumvo tuu ngoka.

Salim okwa valwa 23 Januali1942  a valelwa moshipangelo sha Mwembeladu mo Unguja. Pethimbo ndyoka iipangelo kaya li ya gwana moPemba onkene yina okwa li ena okuya koUnguja oku ke mu mona ye ta galukile kegumbo.He ya Salim okwa za koPemba moka omo a li omunambelewa mehangano lyo Clove Growers’ Association omanga yina okwa za koUnguja ontuntu onkwawo ndjoka pamwe naPemba odho hadhi ithanwa Zanzibar.

Salim okwali oye omukalelipo shilongo omugundjuka mokati kooambasade dhAfrika moEgipiti  a kalelapo oshilongo koIndia,China oshowo Iigwana Hangano mbyoka yi na oombelewa dhayo moNew York.

Salim okwa li a pewa iinakugwanithwa iinene papolitika moTanzania omanga inaa ka hogololwa a ninge  Amushanga Ndjai gwehangano lyUukumwe wAfrika iikando yi li itatu ya landulathana.Eitulemo lye okukondjela Africa okwe li tsikile sho a tulwa mongundu yaanongontu menenevi ndika.Okupitila mUunashipundi waaNongontu wehangano lyAfrika eli kumwe oshowo mehangano lyedhina Mwalimu Nyerere Foundation.

Mewiliko lya nakusa Mwalimu Julius Nyerere, Salim, opamwe nomukwashigwana gwaandjawo Brigadier-Ndjai Hashim Mbita pamwe na yalwe yepipi lye ota ya dhimbulukiwa molwashoka ye etapo mokukondjitha uukoloni  oshowo omulandu gwokakombo noludhi mUumbugantu wAfrika.Ye pamwe naawiliki ooyakwawo okwa kala omunandjungu moku konga eyambidhidho menenevi nopondje yalyo opo  iilongo nomapangelo muuyuni ga thiminike epangelolyokatongo tongo.

Salim okwa longitha oshipundi she shuukalelipo waTanzania koUN oku nkondopeka omuthika gwomahangano omakondjeli manguluko.Shika okwe shi ningi sho a kuthombinga mengongopo lyokatokolitho kOmoshigongi shAayehe shIigwana Hangano konomola 2878. Haka oka utha kutya omahangano omakondjelimanguluko nenge aakalelipo yago oyena okupewa oompito dhu uka opo ya kuthe ombinga uuna iikumungu yomiilongo yawo ta yi kundathanwa.Omahangano ngoka ga yalulwa oga pewa wo uuthemba okukala geli poonkundathana nokupulakena oshowo okutala shoka tashi popiwa kombinga yiilongo yawo.Omuthika nguka ogwa li gwa pe omahangano ngaka oompito okugandja ombinga yago momatokolo ngoka taga ningwa kokangundu kokuteyapo uukoloni.

Okatokolitho haka konomola 2878 oka gandja uuthemba wopautho opo omahangano gataambiweko ongo ngoka ogo omakondjeli manguluko miilongo yago. Eyalulo ndika olye ga pe noku ga egululila oompito opo ga vule okupewa iimaliwa nomakwatho galwe okuza koUN oshowo okumona omakwatho galwe okuza muuyuni.  Pethimbo okatokolitho haka ka tulwa miilonga omahangano ngoka gali ga yalulwa ongaashi FNLA,MPLA moAngola,FRELIMO moMozambique.Ngoka ga ka yalulwa konima ongaashi SWAPO, UNITA ,ANC naPAC sho agehe ga pewa uuthemba woku kala piigongi ya guma oonkambadhala okumangulula iilongo yago muukoloni.

Okuza 1975 okuuka komeho Salim okwa li a soshimpwiyu kutya omahwahwameko okupitila miikundaneki oshowo iinyangadhalwa yilwe oya odheka onkalo mo Namibia nomoRhodesia.

Methimbo alihe lyuuwiliki we wokangundu kokuteya uukoloni, Salim okwa dhenge omuthindo kombinga  yokunkondopaleka oshowo okugandja uuyelele wa gwana no  wu li pethimbo kombinga yekondjelomanguluko.

Nando Salim okwa longo iilongapondoli mbika Aamerika mboka yali mewiliko pethimbo lye oyali ya thikama onkambadhala ye yoku ninga Amushanga Ndjai gwIigwana Hangano moshipala nonande ye okwa li ena eyambidhidho enene okuza kiilongo  yaAfrika.

*Embo ndika Salim Ahmed Salim: Son of Africa ota li adhika ashike okuza ko Institute for Security Studies, www.issafrica.org.

LEAVE A REPLY

Please enter your comment!
Please enter your name here