Aanona oyendji ihaya yi komanongelo

0
347

 

ONDERA – Aanona oyendji momudhingoloko dhoofaalama ndhoka dhili okuza pOshivelo ihaya hiyi koosikola.

Aanona mbaka oyali ya ndhindhilikwa haya kala owala naakuluntu yawo momagumbo nonande ya adha oomvula dhokuya komanongelo. Owundji womuunona mbuka owali wa konekwa unene mofaalama ndjoka Ondera.

Jakob An-aubeb okuna uunona une, utatu waambuka owa adha oomvula dhokuya kosikola ashike ihawu yi kosikola.

An-aubeb sho ali a pulwa kutya omolwashike aanona ihaa ya yi kenongelo okwa li a popi kutya oosikola odhili kokule no tashiya pula ondjila onde opo aanona ya ye komanongelo omolwiinano mbyoka iile.

Gumwe gomaavali pOndera mpoka okwali a yelitha kutya uunona we iha wu yi komanongelo oshoka okwali ewu fala posikola pOmbili ashike okwali anuwa a lombwelwa kutya posikola opo tuu mpoka opuna unene omwaalu guunona owundji no itaye wu taamba oshoka kayena ehala lya gwana lyokulongela.

POndera mpoka opuna owala oshikunino omanga oskola ndjoka yafa yili popepi oyili pomudhingoloko gwOmbili mpono puna natango oshinano oshile. Wumwe womuunona mboka wali wa ka taambithwa ando pOmbili sho wa mono kutya inawu taambwa owali wa galukile owala moshikunino nonande wu na oomvula dha pitilila.

Omukuluntu gwelongo mOshikoto Lameck Kafidi sho ali a ningwa omakwatathano naye okwali eshi yelitha kutya oyali ya koneke oshinima shika noya tokola opo pomidhingoloko dhoofaalama ndhoka pu totwe oosikola.

Kafidi ta ti oyali ya koneke aanona oyendji ihaa ya yi komanongelo omolwiinano iile okuza momagumbo okuya koosikola, “pethimbo ndino otwe shi pondola okutotapo oosikola ndhono dhina ondondo yotango sigo ontitatu, opo aanona ya ze momalukanda yo ya kale ta ya yi koosikola ya manguluka nokuhwepopaleka iinano iile yo aavali ya ze momikundu,” Kafidi ta ti ngaaka.

Dhimwe dhomoosikola ndhoka opo dha totwapo nuumvo mOshikoto ongaashi Ondera JPS, Onethindi JPS, Omboto, Oshongwe, Otjolo nadhilwe.

Kafidi okwa ti yo ongoshikondo shElongo ota ya kambadhala opo ya andjaneke oosikola komahala nomahala yo aanona ya mone elongo ndyoka lya pumbiwa ku kehe.

 

LEAVE A REPLY

Please enter your comment!
Please enter your name here