Tuyeni Kolupale: Pandula nyokokulu ngeno nyoko ina dalwa

0
457

 

Na tu fimanekeni yo oilonga ngeno katuna oimaliwa. Mounyuni wonale okwa li kuna efimano lokaana ngeenge katekulwa kuinakulu adala ina ile he yako.

Ashike opa kala nee pena odino yakala tailongifwa kwaava vaputukila komaumbo nokutekulwa komaumbo koonakudala vavo. Oupyakadi okwa li haukala apa kutya omunhu ngeenge oku wetike kutya okwa tekulwa mokaumbo, okwali haku monika kutya okwa tekulwa ondembula, molwaashi okwa kala pomukulupe.
Omanga inaatu ya mokati komushangwa nomehokololo eli, oshiwa ndipule omapulo opo mokati koshiwana mukale hamudi ovanyamukuli ngee nee ovanyasha ilo ne ovakulupe vetu.
Oshike hasheeta okaana ka katekulwe kuinakulu, ngeenge mboli xe ou ekadala vo naina yako oko veli vena omwenyo?
Omukulupe keshe okwaufwa mokaumbo kaye mukale muna ovatekulu vangapi ava tatekula hano mboli?
Na oupyakadi washike hau hange ovakulupe ngeenge a tekula ovatekulwa vaye mokaumbo kaye vakonda po 12?

Oonakudala ounona ava ngeenge ovalumenhu navo omo havadi mokaumbo omo ilo ovena omaumbo avo, nongeenge ovakainhu, oveli keehombo davo?
Eheno oshili omapulo omadjuu ilo efimbo limwe ngomunhu otashi shiva utye okwafa ngo inaelikosha nawa molwaashi sheni alushe otuhole ashike oinima ei yoshili oyo ikale tai futikwa moshilongo shetu, nonande osho kashina eshi tashi tu vatele.

Omakonakono a ningwa moshilongo shetu otaa ulike kutya eepeleshenda dili pombada odounona tava tekulwa kooinakulu momaumbo.Ashike shimwe shakonekiwapo osheshi kutya ounona ava vahapu vomuvo ka veshi eefiye nande, ooyina nooxe oko veli.

Omushangwa ou ka uli ominge nokaana ka tekulwe kuinakulu, ashike owapumbwa okupwilikina nawa kutya oupyakadi ou ohaweetwa koshike opo ovakulupe vetu va wililwepo kouteku wovatekulu vavo.

Efimbo lonena ova yandji vomadimo noonakupewa omadimo inaashi longekidwa ovo naanaa tava velwa ombedi moshinima eshi shokudipila omaludalo avo kovakulupe.

Ngeenge ngo owa piti Oshivelo nde toi koushimba keshe ngo omulumenhu to hangeko ndele tomu pula kutya okuna ounona vangapi noveli peni, oto nyamukulwa ondina vahetatu veli koo inakulu. Ovakainhu ovanyasha voshilongo shetu navo otava diko ashike tava tutu ounona tava twala kooinakulu vafa tavatutu eeshako. Oupyakadi wakula ouli nee apa kutya oonakudala ounona ava, ohava teneke ounona puinakulu opo vafa va tenekapo eeshako doshameende vo otava shuna oku va dile. Tava dala vali vamwe vo tava aluka vali va dipe.Vamwe ohava  popi nokutya opendjela ya yina opo ili vo ita va mono oixuna.

Vamwe vomovakainhu nda kundafana navo noku va pula kutya oshinima shatya ngaha ohave shiningile shike no ha va fininikwa koshike va ninge ngaho? Umwe okwa nyamukula nge ye ta xukula ehodi  nghishii nee ngeenge oku udite nai ile pamwe ota, te ashike omumbala peumbo shitongwa.

Tate Tuyeni pwilikina ndiku lombwele oshili yoinima ei hainingwa, kovalumenhu havayi nashe momilele noha vakala veudite nawa ngeenge tava ningi ngaho, ndele nee ngeenge twe va lombwele oufimba , ohava shituka eenghoshi detu, ta vai molukongo lwaavo ve hena omapunda

Onghe nee otuli moudjuu hatu kala tu vawa ngeenge kushi omufimba ashike ngeenge omulumenhu owe mu lombwele oufimba okwa fa ashike a shiivifilwa kutya otai kohake fiku olo. Okudja opo vamwe nopwoove opo ngoo itaa ende vali molwasho oshiima sha nyonauka. Paife oshili natu ninge ngaipi? Vahapu vomufye ina va hala oku kufamo omadimo ilo okukupulashi eehana ngeenge da dalwa. Ashike ombedi otatu ipe ovalumenhu ovo hava mbadapala ngeenge va lombwelwa kutya ova yadja oufimba. Onghee nee oludalo olo hatu dala ngaho, ohatu twala ngoo nee kooinakulu va ka tumeko. Fye hatu alukile koushimba tu konge oilonga.

Onghee fye inatu pewa ombedi vati eshi hatu dipile ovana vetu koomeme, molwasho omhango ota iti omunona okuna okutekulwa kovakulunhu vaye vavali. Ashike ooxe yovana vetu ohave tweefelepo noku tuli teekapo.
Okudja meenghundafana novakainhu onda ya kovalumenhu tandi va lombwele nokutya vati vo ovo hava faduka ngomonhapo ovakainhu vavo ngeenge ve va shivifila nokutya oinima oya nyonauka.

Omulumentu umwe womuvavali ovo nda shakena naye meenghundafana okwe li kanyuna omipyo odo ta ti.
Tate John ya Tuyeni, shovalumenhu oshili otuli moshiponga, molwaashi efimbo limwe ovakainhu vetu navo iha ve tu fimaneke.
Umwe ou ta popi onde ke mu kwata ne melaka meendelelo noku mu pula ngaha, owa hala okufimanekwa ngaipi kovakainhu nokupewa vali shimwe shafa shike?
Okwa a ti efimbo limwe tate oto kala nomukainhu ngo we mu linekela ashike mboli ye ohakala ashike ekuli koshi, hano hashishiva mu ye mu limo nande va ne onghee ne efimbo limwe ngeenge okwa ninga nande epunda nde teli ku lombwele, omadiladilo oye nouluvi woye ohau ka kala tau lipula vali kutya, ye omulumenhu mukwetu ou kwali handi monopo okwafiyapo shike mbela.

Ta twikileko vali ta hokolola ta tale pedu ta kengele omahodi noulumenhu waye kofingo mokuuda nai kwaye.
Efimbo limwe omukainhu ote ku lombwele edimo, ove otoli itavele naanaa kuna oupyakadi musho, nokonima okaana ka dalwe oshili okafa mushiinda shoye. Natango oshinima eshi tate Tuyeni omukundu wa kula kufye.Molwaashi paife ovanhu pomudingonoko opo ohava tameke okutulapo eendaka dokuyola ilo ve ku ule kutya owapakelwamo, nonande oshili naave okaana uka wete ne nawa kutya inakekufa nande. Mbela otuna okuninga ngaipi moshinima shi li ngaha.
Oshitivali omukainhu ote ku lombwele edimo nde to itavele kokaana otaka dalwa eshi ngo ka wanifa nande eedula 4 ove wa kala ngo to shapota ye ote ku lombwele ta ti, ame okwali haiku fufya wa okaana aka ka keshi koye ouwete nee ke kufa? Hano ngeenge ouna okamutima kashona nde to lombwelwa ngaho kukala inoo ningapo oinima yakilikita noku lengifa ovanhu opo, nokonima ko ta kuti ngo vakwetu ovalumenhu valulila, ashike she ohatukala tu valula efimbo limwe shili molwaashi ovo have tu yadomongwa.

Ounona ava hatu dalele koushimba oha va kala unene vena ooxe vahapu okushitalela movalumenhu ovo hashi dulika va li vomukainhu oo pefimbo limwe. Ye omukainhu ta hoololapo ashike umwe ooyo ewete eli nawa pauxupilo nonando kaimba ha ye xe yomunona ou pahonde.
Pexulilo onda kundafana nameekulu umwe kombinga younona hava dipilwa kuvo. Ou okwa twomadima manga ta xukula ehodi ta ti talenge moshipala nawa, ati oi!! mmm meme she ohatu mono oixuna waa.
Nopendjela yetu ei hatu pewa koholomende ngaashi aame nghee nda dalelwe ndi landemo oshikutu shokudjala, ohaivape shike eshi veli ngaho needula ihadiloko ooina nooxe omu ohava mhyaukamo  ashike pu Deshemba veli hamakasha. Otave tumonifa oixuna vo itave tu yambidida, ounona vamwe ovo totale veli opo ovadipilwa ashike opo nde kavena needjapo domadalo, kushi nooxe nooina kutya ovomuhoko ulipi, ototekula ngo ne oludalo loye.

Fimanekeni ovakulunhu inamu va twaalela vali omikundu deni  dounona ne ihaamu dimbuluka  okutumina ko oikulya noikwafa ikwawo.

JOHN YA TUYENI
MRTUYENI76@GMAILA
CELL

LEAVE A REPLY

Please enter your comment!
Please enter your name here