Aanangeshefa aashona ya gongala mOmuthiya

0
270

 

OMUTHIYA – Elelo lyondoolopa yaMuthiya olya li lya gongaleke aanangeshefa aashona noyopokati noku ya  ndungika nkene ta ya humitha komeho oongeshefa dhawo.

Omutumba nguka ogwa ningilwe mEtine oshiwike sha yi gwa ningilwa poombelewa oonene dhewiliko lyondoolopa ooMuthiya.

Konyala aanangeshefa ya za momudhingoloko gwondoolopa ndjika oya li ya gongala nokutopolelathana uuyelele , kombinga yokuhumitha komeho oongeshefa dhawo. Moshigongi omwali woo mwi ithanwa omahangano guunangeshefa naangoka gena uunongo nontseyo mokungeshefa opo ga gandje uuyelele mboka wa pumbiwa kaanangeshefa yopomuthika nguka.

David Israel Omunambelewa gOmahumithokomeho nOmapendulopo gondoolopa melelo lyOmuthiya okwa ti oya hi ya oshigongi shika opo ya ninge oonkundathana dha nkene aanangeshefa yena oku kokitha oongeshefa dhawo dhi ninge oonene.

Aanangeshefa mboka oya li wo ya tseyithilwa opo ya kale ya shangitha oongeshefa dhawo dhi kale dhili momambo gewiliko lyondoolopa ndjoka.Israel okwa ti uuna mbaka ya shangitha oongeshefa dhawo ota ya ka longa nuupu uuna taya indile iimaliwa yokunenepeka oongeshefa dhawo okuza koombaanga nenge komahangano omaniimaliwa.

Israel okwa pula aanangeshefa mboka aashona noyopokati ya kale ha ya longele kumwe, yo ya paathane aluhe omayele ngoka ga pumbiwa mongeshefa. Okwa uvaneke elelo lyOmuthiya tali ka ninga omadheulo gaanangeshefa mbala opo ya mone uunongo wumwe wa gwedhwapo moongeshefa dhawo. Ta ti ota ya kala ta ya ithana omahangano ogendji ngoka ge nontseyo muunangeshefa opo ga gandje uuyelele mboka wa pumbiwa.

“Ombelewa yetu ota yi kala ta yi gandja omatseyitho oshowo omathaneko ngoka elelo lyondoolopa lya thaaneka, noku gandja omadheulo ga nkene yena okwiilikolela omikuli, yo ya kale taya mono  noku eta iiyemo moongeshefa dhawo, otwa pandula okumona aanangeshefa oyendji mondoolopa notwa hala omwaalu gwaanangeshefa gu ende tagu koko tse tu humithe komeho oshilongo shetu paliko,” Israel ta gwedhapo ngaaka.

Omunambelewa gUundjolowele nUuyogoki melelo lyondoolopa, Hileni Ndinomuwa pethimbo a  popitha aanangeshefa mboka yali ya gongala okwa li eya indile opo ya kalekepo uuyogoki, dho oongeshefa dhawo dhi kale aluhe dha silwoshimpwiyu no dhili metonatelo ewanawa, yo ya kalekepo uundjolowele wawo no waalandi.

Ndinomuwa okwa tsu unene omuthindo kaanangeshefa mboka haya longo niikulya opo ya sile iikulya oshimpwiyu , yo yi kale aluhe yili megameno noya siikilwa.  Ta ti otaya ka kala taya ende nondoolopa nokutalelapo oongeshefa.

“Oto adha omuntu ta landitha iikulya ihe mbika oya suukuluka owala inayi siikilwa, noondhi odhili kiikulya, yakwetu tu simanekeni uuyogoki wiikulya oshowo womalutu getu opo kaa tu tidhile aalandi kokule,” Ndinomuwa ta gwedhapo ngaaka.

 

LEAVE A REPLY

Please enter your comment!
Please enter your name here