Ombaanga yaWindhoek oyili mOshifo

0
253

OSHIFO-Ombaanga yaWindhoek oya ningi yotango oku egulula oshitayi mbaanga mOshifo mondoolopa ya Ruacana. Oshitayi mbaanga shika osha patulukile mEtine oshiwike shaziko.

AaRuacana yomaantu omayovi  8000 omathimbo agehe ngoka ga ziko oya kala haya ka konga omayakulo gopambaanga konyala oshinano shookilometa 80 kondoolopa yOutapi.

Ngoloneya gwOmusati Erginus Endjala sho a pandula Ombaanga ndjika mokweeta eyakulo kaantu yaRuacana okwa ti ndjika otayi hwepopeke wo eyokomeho pamahupilo moshilando shokomunkulo gwomulonga gwaKunene.

“Otandi kombo kombunda elelo lya Ruacana sho lyeeta ombaanga ya Venduka okupungula  moshitopolwa shOmusati  unene tuu moRuacana. Shoka a ti otashi ulike kutya ndjika oyi na einekelo mekoko lyomahupilo gondoolopa ndjika oshowo oshikandjohogololo shika” Endjala a ti .

Endjala okwa ti eegululo lyoshitayi mbaanga shombaanga ya Venduka mOshifo otayi eta oompito dhiilonga oshowo otayi nkondopeke  aakalimo yomiitopolwa yokuushayi nokugwedhako keyokomeho lyopankalathano oshowo lyopamahupilo. Ombaanga ndjika oyina aaniilonga ye li yatano.

Omuulikwa wiliki gombaanga ndjika, Baronice Hans sho a popi peegululo lyoshitayi shoka okwa ti  ehangano lye olya ninga  etokolo lyomondjila oku egulula oshitayi mOshifo.

Hans okwitaala kutya  oshitopolwa shika  nuunene tuu Oshifo oyena uukwatya mboka tau ya ukitha mokuninga endiki lyiinyangadhalwa yopamahupilo unene okushitalela mondjila mukala okuza ketuliloskepa lyaMbaye  okuuka kiitopolwa yokuumbangalantu.Okwa ti oshikwawo oshitopolwa shika  oshina ompito oku ya komeho moshimpungu shuutalelipo.

Hans okwa ti aatalelipo mboka ya tegelelwa okukala taya talelepo moRuacana otaa ka etela aakalimo yomoshitopolwa shika nondoolopa ndjika omauwanawa oshowo okuetapo oompito dhiilonga nodho ku landitha iilongomwa yopahedhi.

“Omathaneko okuyambulapo omudhingoloko gwegwolyomeya  oku gu ninga tagu hili aatalelipo  mokutulapo ooloodja , omahala gokudhikapo ootenda, oyo ompito itaayi adhika palwe kOmbaanga ya Venduka oshowo kaakalimo yomoshitopolwa’  Hans a ti.

Caption (ribbon cut jpg) Komeho okuza kolumoho wu uka kolulyo  ;Ngoloneya gwaMusati  Erginus Endjala Omuulikwa wiliki gwOmbaanga ya Venduka, Baronice Hans ta tete okalapi okuulika kutya oshitayi osheegululwa pambelewa.

LEAVE A REPLY

Please enter your comment!
Please enter your name here