Peter Ondume yomomufitu: Ndiiyaka momake gomutondi oshikumithi

0
613

Omukumo gwandje netokolo lyandje opo ndaa landithepo ekondjelomanguluko olya li lya kola, shono nda tokola oku taaguluka oongamba dhoheli mokwiiyaka mondjedhililo yomutondi.

Mesiku eti 30 Kotoba 1986 lwopotundi ontiheyali netata konima ashike sho nda penduka motenda ye, Korporal Smith okweya kungame ta matuka ti igidha. “VIP, VIP matukeni, matukeni” osho iigidha. Omanga inee ya motenda okwa tameke ti igidha” Peter, Peter, oshikulo showala ngoye ila! Ethimbo olya thikana opo wu tu lombwele oshili” Smith ngoka a li ena ondjembo yi na ombele komulung gwayo okwa tameke tu undula ndje okuza konima ta lombwele ndje kutya nandi matuke ndu uka kombelewa ya Majola Du Plessis.

Okwa undula ndje opo ndi matuke a ti esiku ndyoka otandi ka tala nawa, oshoka anuwa ondali nda dhiladhila kutya onda kotoka ndi ya vule. Oometa ooshona okuza potenda yetu ye Smith ota ti nandi hulemo okandholombuluku kandje, oshinima shoka onde shi tindi. Ye okwa kutha ombele noku tetamo okapendi kandje nongeyi onda kala owala inaandi zala sha.

“Otwe ku pele ethimbo lya gawna opo wu tu  hokololele oshili kombinga yiilonga yoye muka ndele ngoye owa kala ashike to hokolola ondoya” Smith a popi omanga ta hilile ndje popepi nokandholongo.

Omanga ta hilindje ngaaka aatiligane yane ya zala nawa oya li ya talako ashike yaana shoka ta ya ningi.Mokati kaambaka omwa li Omukuluntu gwomahepeko Du Plessis. Molwashoka omweelo gwokandholongo ogwa li gwe eguluka okwa li a thikama kokule kashona a ganeka ndje ondjembo ye a ti nandi ye mo mbala mokandholongo hoka. Okwa edhile okandholongo noku enda uuka kombelewa.

Pethimbo nda kuutumba mokandholongo hoka onda tameke okukala nomadhiladhilo kutya opena sha ta shi ningwa oshiwinayi.  Ondi ipula kutya otashi vulika omutondi a mono uuyelele owundji waashoka nda kala handi longo omanga inaandi kwatwa.Onda tameke nda limbililwa mokudhiladhila omadhengo omawinayi moka nda pitile, naangaka otashi vulika gali ta ge ke endululwa.Smith oku undulile ndje mokandholongo moka inaandi mangwa nomalyenge niiketanga ka ya liko komaako gandje.Oku ya mokandholongo  haka osho oshikando shotango tandi edhililwa ishewe mokandholongo.

Onda li ndi uvite kutya ethimbo  ndyoka opena sha oshiwinayi tandi keshi ningilwa. Opo ndilipo  lwopotundi ontimulongo Dice okwa ende uuka pokandholongo kandje a ti; “Oombulu odha hala okukudhipaga” Dice oye gumwe gwoonkwatwa dhoSwapo miilonga yomeholamo ndele okwa li a kwtawa komutondi omanga a li miilonga ye yuundaadhi.Onkene okwa li gumwe gomoonkwatwa dhi inekelwa mondholongo, oshoka oshafa Du Plesssis ali emu hole.Okwa li ha kwathele Du Plessis uuna nguka ta pula aakwiita aape mboka opo ya kwatelwa momalugodhi.Omutondi okwa li wo ha longitha  Dice  iilonga yoku ya momikunda ongo oshikulo shiifundja.Nguka okwa li wo ha tumwa komagumbo gaantu mboka ha ya kwathele SWAPO.

Opena ompito yimwe ndali nda dhiladhila kutya ngiika Dice natango okwa li ha longele SWAPO nonando oha longele kumwe nomutondi.

Nando ongawo onda taambako elondodho lye nomwenyo aguhe, unene tuu sho Smith a popi kutya ota ka longa nangame nonyanya.Pethimbo limwe sho ndali nde entamene mokambuthulu keli miipeleki onda mono nkene Du Plessis naantu ye ya thikama pondje taya kundathana.

Moku kuutumba kwandje komatako inaa ga zala sha onda dhiladhila nokugalikana Kalunga opo mbaka yaa gwanithepo oshilonga shawo shika manga inaaku luudha, oshoka onda li nda tokola okwiiyakamo mondholongo. Onda li ndi ilongekidha nookuli okusa shono tandi iyaka ngaaka. Ompito yimwe onda li nda tokola kutya otandi ka popya kutya otandi ehama, opo uuna aakwiita ya Britania taya patolola ngame otandi ya lombwele ye egululepo, uuna nee ye shi ningi ngame otandi yugu gumwe ondjembo, nongeyi otandi dhipagwa omanga tandi kambadhala okufadhukapo.

Eshongo ndyoka ndali nda taalela oondyoka kutya otandi zimo ngiini mondholongo yoshipeleki ndjika okupitila pombanda mpoka pwali inaapa edhila kakele kothaila ndjoka ya li ya tulwako oku keelela mwaa lokwe.Elago enene onda dhimbulukwa kutya omagulu gandje inaga pandekwa onkene onda tokola kutya otandi zimo tandi lyatele miilambo yiipeleki.

Onda kala nda tegelela opo Du Plessis eye a kuthe ndje mo mokandholongo komatango. Sho pethimbo ndyoka omukwiita gumwe gwoPLAN ishewe eya pomweelo gwondholongo yandje nokupopya kutya ondi li muudhigu oshoka “Oombulu” odha hala okudhipaga ndje. Omulumentu nguka oye Jacky nenge Camarada. Nguka okwa popi ashike eli pondje yomweelo. Pethimbo ndyoka okwa adhika ena oranga yuuShisande. Ishewe onda li ndi ipula kutya omolwashike a li eya ngiika okulondodha ndje. Shoka tandi dhimbulukwa kuye pethimbo lyuukwatwa wandje okutya ye okwa li gumwe gwaakwiita yoPLAN mboka ya kwatwa ena onyanya mokudhenga nokuhepeka aakwiita yoPLAN mboka opo ya kwatwa.

Konima sho a yi onda kala nda tegelela eso ongomuntu eli momukweyo gwaamboka ye na oku ka dhipagwa. Onda dhimbulula kutya opena sha tashi ningwa oshoka esiku ndyoka inandi pewa okulya nenge omeya okunwa.

Kuyele ongulohi ndjoka onda tokola kutya shaashi omutondi ina manga ndje komagulu. Otandi ka kambadhala okuiiyakamo mondholongo kutya nee oshilanduli shonkambadhala ndjika osha tya ngiini. Kombanda yondholongo moka ndali okwa li ashike kwa siikilwa okathaila oku keelela omvula. Mokati kuusiku onda kambadhala okulyatela miilambo yiipeleki opo ndi zemo, ihe onda gwile pevi nonando inandi iyehameka. Okugwa huka okwa ningi ekudhilo enene ndyoka lya hili aakwiita, sho ya thiki popepi onda tameke tandi kolola okuulika kutya omondili natango mokandholongo kandje.

Sho aakwiita ya shuna komahala gawo onda mono oonkondo oompe, kandali we ndina etilo okutila eso. Konima yowili netata onda kambadhala ishewe okulondamo, nonkambadhala ndjika oya piti onda londomo sigo otandi nukile pevi pondje yoshipeleki  nda endele kongudhi hoka kwali kwa mangelwa okathaila.

Sho nda thiki pondje ngame otandi holama konima yokandjugo konima yotenda ndjoka ye ka shiga. Kalunga okwa li nangame. Inandi ninga nando ekudhilo lyasha onkene aatondi inaya dhimbululapo sha. Onda li nda mono aakwiita yiipyakdhila nokudhana uukalata. Okuza mpoka onda kookaya nduuka komutuni ngoka gwa kunduka okamba. Nguka ogwa li gwa gamenwa noondhalate dhomakwega. Onda sisila kohi yoondhalate ndhoka dhili pevi lyiipeleki ngame onda kwatelele kopaala ndjoka kwa li ku na oongodhi dholusheno ngame nondanukile nookuli pondje yokamba nonando onda li nda tsuwa nokutetwa koondhalate ndhoka. Kalunga omunene oshoka manga ashike aakwiita mboka ya langela okamba ya dhimbulula omainyengo gandje, ngame onda gwile pevi. Okuza mpoka onda matuka shili ngombepo nduuka muuzilo. Aakwiita mboka ya li ya landula ndje oya li okwiigidha, thikama, thikama ngame otandi kutha oonkali pepata te tanga omipindi dhandje. Aakwiita mbaka omupya gwawo oongoka kutya kaya li yena oondjembo ishewe mbono ya li yena oondjembo inaya vula okuumba oshoka oya li ya tila oku yaha yakwawo. Kehe shimwe osha ningwa meendelelo nomepathimo lyeho.

LEAVE A REPLY

Please enter your comment!
Please enter your name here