Tuyeni Kolupale: Oupombolume mboli vati hau kala mohonde

0
568

Oshitya oupombolume, monale osha kala hashi longifwa tashi ulwa ovashamane ovo hava kala momaumbo ovo aveke. Ashike nonande ongaho kashipu naana u hange omushamane eli opo ndele tomu popifa to ti, tatekulu mupombolume wa uhalapo? Hano sha hala okutya elaka eli ohali popiwa nokuufanwa una ngeenge ovashamane vehe uditeko.

Vanamibia amushe, monena otwa hala okutala koyuufanwadina oyo yakala haiufanwa ovanhu, ngeenge oiwa tu nokuufanwa ile pamwe oshanyika oshiponga ngeenge toi longifile omunhu oitya yatya ngaha.

Omulumenhu ngeenge ina hombola ndele ovanhu tava mono kutya eedula daye odafa dapitilila oumati, opakala hapa longifwa oitya yomeholeko ngaashi osho tashi ti, olo exungulume, kaanave ilo ovanhu vatye ediya mbidi molwaashi kena omukulukadi ye okuwetike okwakula ilo nokuli tu tye a pitilila.
Okakadona ngeenge okamonika kutya okakula kapitilila ndele ko inaka hombolwa, ko okakala haka ifanwa oshidina shi li ngaipi taka ifanwa una ngeenge kake uditeko?

Noshitya osho hashi ifanwa taku ti ekwamukuli, ohashi popiwa paholeko oukadona ava vefike peni ilo ava vaninga ngaipi hano?
Kakele ne kokakadona aka ka ningapo edimo inaashi teelelwa, ovanhu ovakala have ka ufana paholeko taku ti, ehengu na oshi li tu mondjila ndi popife okakadona oko handi ka ula ehengu omanga ke uditeko?

Ye ne omumati ou ha mitike oukadona luhapu luhapu ovanhu ovakala havemu ufanha tava ti ngaipi?
Vamwe otava hokolola kutya ovamati ovo ovakala hava ufanwa taku ti, vati elilamulema ilo vati vatye, epandekulula lomaufiku. Nonatango epulo lange olili ne apa, ndishi inashi nyika oshiponga ngeenge onda ula omumati wonumba kondadalunde euditeko kutya ye elilamilema, ilo napamwe ohandi shi popi nde hatu patukununwa mumwe, nyamukuleni?

Nena omuna okupwilikina oixuna noipwe kolupale, ndishi oshipalanyole shetu otashi popi oupombolume ohaukala mohonde.
Onda mona ne omito yokuya meenghudafana na meekulu Mukwaudimbe Nanghali ya Shimwe, wo kEengodi daNatuwe, opo a lombwelenge nawa noku fatululamo nawa nawa kutya hano omupombolume omushamane naana ou eli ngaipi mboli.

Ehokololo lameekulu olili ngaha; omushamane ngeenge omupombolume kedalo, kena ne kutya okwa hombolele onghela nena oto mu hange meumbo laye oye aeke ti, ohashi etifwa koshike mbela ngaha?

Pwilikina ndiku lombwele nawa mutekulu wange, omupombolume ohakala a ndingililwa koinima ngaashi ei tai shikula apa, onyanya ilulila, okuhole okulya osho shotete, nokumona oikulya yovakulukadi ihaipi nawa, ilo efimbo limwe ta kala ahala okulitelekela yeemwene.

Omushamane womupombolume kedalo, oha monika ehole ovakainhu una ngeenge ahala okuya navo momilele ashike lwanima ngeenge oshapuko komwenyo waye, ota dulu okupendula omukainhu emu twale nande okooina oufiku oo pehena etomelo la sha, ilo a tule po ngo oindaka yehena ouyelele nawa.

Omupombolume okuna oshinakuwanifa shashike moshiwana ilo momumukunda? Oshiwana shoohandimwe novanhu momikunda, una ngeenge tava hoolola ovaleli ilo ovawiliki, omushamane womupombolume oha talwa ko naana ngaashi oshinovele, tashi likoko molwashi kapena ou ha kala ahala okuwilikwa nokupangelwa komupombolume.

Etomelo ola shike? Osheshi naye okwa nyengwa okupangela nokuidilila oshiwana meumbo laye mwene, onghe ne ngeenge owa hala okukakala omuleli wonhumba oshiholelwa tamekela meumbo loye tete.

Paife mboli ngeenge osho ne shili ngaho, opo ne ovalumenhu va yande oupombolume, ounona voumati ovena okuhombola vena eedula ngapi hano mboli ngeenge tashiya pakukaninga omaumbo nokuhombola?

Meekulu ta nyamamukula; oupombolume woovene kandiwete ta u dulu okuhenukiwa osheshi oshinima ohashi kala mohonde nomouluvi womulumenhu yeemwene.

Ovakainhu ava tava kongwa kovalumenhu va ka hombolwe, ovena okumona ngaipi kutya omulumenhu ou eya puye temu lombwele oihole yohombo naimboli omupombolume kedalo omanga inemwiitavela?

Natango oshidjuu okumonamo kutya ou omupombolume ta endele omukainhu efimbo olo, osheshi ovalumenhu ovo vena oupombolume meehonde, efimbo limwe ovena oouwa womoshipala ilo a kale ena ombili tai xunga ye okuna oufuuli watwa kekipa.

Onghe ne ovakainhu ngeenge tava kongwa vo ohava tale tete koinima oyo ye va fuula momesho, nonande koshi okuna imwe ya hondama opo teke ishakeneka una ngeenge aya mohombo nale ye teke u nyemena mo.

Shiwana sha Namibia kotokeni ne, naimboli oitya ngaashi ei tai shikula apa inamu keilongifila ovanhu veuditeko osheshi otamu ka patukununwa mumwe okwa tiwa ou iho lombwelwa, ovanhu edimba tava ka uda tete, ndee walye ne.

Emenhu la kulupila koumati tali ningi eedula 50 inaali hombola, vati mboli exungulume ilo mutye ediya mbidi lopomukunda ilo mutye epandekulula milema, vamwe vati otava ti efingila mbidi pomakatana.

Omushamane ne vati oo ha hombola ye nokonima ina hala vali, vati mboli omupombolume ilo mutye efingambiya.

Ekadona ne olo inali hombolwa nde tali ningi eedula 55 tali li ashike ounyuni walo, vati mboli ekwamukuli la lungada ilo mu tye eshikamwadi lopomukunda.
Omuhombolwa ilo omuhomboli ohaulwa euditeko nefimbo limwe nokuli ohava kala veudite ounwa ngeenge tava ufanwa neehombo davo, ashike ovateyi veehombo ngeenge owe va ufana kodadalunde kutya vo ovahengani, oshili oto fudikwa nomwenyo nde nombila yoye itai monika.

Hano osho ngaho, inamu ka ufana ovanhu oidinatya ei ve uditeko otashi ke mweendela nai, nombudi ihai ufanwa ombudi yuuditeko oshoyo omulodi naye ohanyongofolwa.
Iyaa kedi popyeni nee mudi kalele po nyeevene, indeni muka ule ovanhu omahengu mu li tule moupyakadi.

*Omadilaadilo aa oomushingi mwene, ndele kae fi a Kundana

JOHN YA TUYENI
MRTUYENI76@GMAILA
CEEL 0812988549

 

 

 

 

 

 

 

 

LEAVE A REPLY

Please enter your comment!
Please enter your name here