Aafuthi yoompanda ya holoka mompangu

0
393

WINDHOEK – Aalumentu yaali yomoKhomasdal moWindhoek James Barron Wallace nomukwashigwana gwaChina Zi Ghang, Omaandaha goshiwike shika oya holoka komeho gompangu yamangestrata komeho gomupanguli Justine Asino melopotelo lyokwaadhika nomayego goompanda gookilograma 1,15 gongushu yooN$ 91 000, ga tetwa nelalakano ga tumwe pondje yoshilongo. Oshipotha shawo otashi ka pulakenwa ishewe momasiku Mai 13, 2016.

Uuyele owaa gandjwa komunambelewa gwopolisi omukonaakonindjayi gwopevi James Tjivikua Tjivikua poshigongi shiikundaneki moWndhoek. Omunambelewa gwopolisi ta tseyitha kutya, aalumentu yaali oya pewa ompito yokwiifutilamo sho Wallace  iifutilemo N$ 30 000, omanga Zhi N$ 250 000, oya kuthwa oopassport dhawo notaa kala nokwiilopota kopolisi yaWindhoek lwiikando ine  mesiku Etiyali nEtitano moshiwike.

Uuyelele wopolisi owa yelitha kutya, okuza  petameko lyomumvo okwi itsuwa oompanda 34 dha dhipagwa  mEtosha National Park 29, moPalmwag/Klip  River opwi  itsuwa  ntano dha dhipagwa kaafuthi yiinamwenyo. Omukonaakonindjayi gwopevi Tjivikua  ta koleke kutya okuza petameko lyomumvo nguka aafuthi yiinamwenyo 30 oya kwatwa po kopolisi noondjembo odha yugwa aafuthi yuukongo wiinamwenyo.

Natango muApiilili omuvogu opolisi oyi itsile miipongo yoompanda 30 dha dhipagwa kaafuthi.Shika osha pondoka pethimbo lyoshikonga shopolisi yaNamibia melongelokumwe naanambelewa yoshikondo shegameno lyuuntshitwe nelalakano okukandeka uufuthi wiinamwenyo ya gamenwa, oku yi kaleka po nokuya moshipala oongudu dhaafuthi yiinamwenyo. Oshikonga shaanambelewa yopolisi pamwe naaniilonga moshikondo shegameno lyuuntshitwe okuza muJuni omvogu osha kwata po oyendji aafekelwa muufuthi wiinamwenyo yoompanda miitopolwa shaShikoto, Omusati sigo oKunene.

Opolisi tayi kumagidha oshigwana shi gandje uuyelele kehe tau vulu okukwatitha kehe ngoka ta monika a kuthombinga muukongo waa li paveta.

LEAVE A REPLY

Please enter your comment!
Please enter your name here