Aalongi naalongwa mOshikoto ya tumbalekwa

0
257

 

ONAMISHU – Ngaashi shi li omukalondjigilile kutya aluhe petameko lyomumvo aalongi oshowo aanaskola mboka ya longa nawa mOshikoto ohaya pewa omapapa ngaashi yeshi ilongela. Nonuumvo Oshikoto oshali sha longekidha oshituthi showina mono kwali kwa gandjwa omapapa noku tumbaleka iilonga yaalongi oshowo yaanaskola.

Oshituthi shino shegandjo lyomapole oshali sha ningilwa moseketa ndjoka oyo yeya yotango moshitopolwa Onkumbula sha ningilwa poskola pOnamishu metitano lya piti. Omukuluntu gwelongo mOshikoto,aataleli yelongo, aalongi ,aavali oshowo aanaskola oyali ya gongala pOnamishu yo ya tale nkene oombuto ndhoka ya kuna tadhi mene nawa.

Oshikoto oshi shiwike nawa mondjokonona yelongo oshoka konyala osho shimwe shina oosikola hadhi piti nawa ngele tashiya kondondo onto-10 oshowo ondondo onti-12.  Minister gwomidhingoloko nomatalelepo Pohamba Shifeta pethimbo ali ta popitha engathithi lyaantu pOnamishu okwali a indile aanaskola ya longe nuudhiginini, yo , ya tseye esimano lyokuya komanongelo.

Shifeta okwali a kunkilile aanaskola ya ethe iilonga iiwinayi, yo ya kale aanaskola aadhiginini haya kwatha aakuluntu yawo konima ngele ya zimbuka. Okwa  pula woo aalongi ya kale haya gandja iiholelwa iiwanawa kaanaskola.

“Elongo ka lishi owala lyaalongi ashike naavali oya pumbwa okudhana onkandangala melongo lyaanona, onkee elongo nali tameke aluhe megumbo opo sho omunona ta kaya kosikola oku uvite kutya omolwashike ena okukala a mona elongo,moku adha kesindano ka muna okutetela, owuna okulandula omilandu ndhoka dha tulwapo opo wu ka sindane,” Shifeta tati.

Okwa pula aavali ya kale haya thiki koosikola hoka kuna aanona yawo ,yo ya kale haya kundathana iinima mbyoka ya pamba elongo naalongi, yo ya kale yeshi kutya uunona wawo owuna uunkundi miilongwa yini , yo taya gandja omapukululo mpoka sha pumbiwa. Shifeta ta tsikileko kutya aanona oyo aaleli yokomongula onkee oya pumbwa okulongwa noku uvithwako.

Omukuluntu gwelongo mOshikoto Lameck Kafidi okwa ti yo mOshikoto otaya lalakanene ya kale yeli poopelesenda 75 % oku uka pombanda, gwo omwaalu guunona mboka tawu ndopa gu kale gwa shuna pevi. Okwa ti yo oyi itaala mokulonga muukumwe sho osho tashi yambulapo elongo moshitopolwa. Ta ti oya hangena okugandja elongo kaanona, sho yi imanga kumwe naavali oshowo naalongi, ta gwedhapo kutya ekuthombinga lyaavali melongo lyaanona ota li ti sha unene monkalamwenyo yuunona.

Pinehas Ekongo ngono eli omukuluntuskola poReverend Juuso Shikongo okwali oye a pewa epapa lyomulongidhingi mOshikoto. Yalwe yomaalongidhingi shi ikolelela kiilongwa mbyoka haya longo oyali woo ya pewa omapapa naalongwadhingi woo.

LEAVE A REPLY

Please enter your comment!
Please enter your name here