Infantino Omuperesidende omupe goFifa… Aatalinawa oyiitaala kutya oye omuwiliki eli mondjila

0
377

 

 Omauvaneko ga Infantino  

 

* Okwa hala okufala Uudhano Wekopi lyuuyuni koombinga adhihe dhuuyuni

* Okwa hala okugwedha ko komwaalu goospana ndhoka hadhi dhana mEkopi lyuuyuni okuza poospana 32 okuya poospana 40.

* Okwa hala oku etamo elongitho olindji lyuuteknologi muudhano wetanga lyokoompadhi

* Ota dhenge omuthindo puuthike pamwe metopolo lyuuyamba.

Windhoek-Omuperesidende gwo FIFA Gianni Infantino okuna owino ya pumbiwa oku aludha nokwoopaleka ondhilo ndjoka ya yonuka  yolutu oluwiliki lwetanga lyokoompadhi muuyuni. Omanga elelo lye nuunyakwa we melelo otau ka tulwa koshiyelekitho ku talike ngele  mbuka otau ka fala Fifa pondondo yi vule mpoka eli ngashingeyi. Omunawino muudhano wetanga Isack Hamata okuna etegameno lyiilonga iiwanawa okuza kOmuperesidende Omupe.

Omutekulu gwaaSwiss naaItalia Infantino, ngoka sigo osho a hogololwa omuperesidende gwoFIFA a kala  Amushanga Ndjai gwolutu oluwiliki lwosoka moEuropa nenge UEFA. Infantino okwa dhengemo Omuperesidende gwolutu oluwiliki lwiipambele yetanga lyokoompadhi moAsia Sheikh Salman bin Ibrahim al-Khalifa, medhingoloko etiyali sho ye a mono omawi 115 komawi 88 gaamboka ya hogolola Salman bin Ibrahim Khalifa.Omuperesidende okwa hogololwa owala medhingoloko etiyali sho medhingoloko lyotango ookandidate adhihe dha li inaadhi mona omake gooperesenda 50.

Nonando aaNamibia ka ya li yeshi kutya olutu oluwiliki lwetanga moshilongo otalu yambidhidha lye oonzo okuza megumbo lyosoka  odha ti  aawiliki yo NFA oya li ta ya yambidhidha Sheikh al-Khalifa.

Omuperesidende gwa NFA Frans Mbidi, Amushangandjayi gwa NFA  Barry Rukoro nOmuperesidende gwesimaneko  John Muinjo oya li poshigongi oshinene shoFIFA mo Zurich.

Okandidate ndjoka NFA ali ta yambidhidha oya mono omake 85 medhingoloko lyotango omanga omuthigathanipo naye Infantino okwa mono omawi 88. Omunagokombanda  gwa Jordan Ali bin al-Hussein, okwa mono omawi  27 medhingoloko lyotango ye omunambelelwa nale gwo FIFA Jerome Champagne okwa mono mo ashike omawi gaheyali.

Molwashoka ookandidate adhihe kapena ndjoka ya mono omawi  gethike pomawi 159 ngoka ga pumbiwa. Infantino na Sheikh  al-Khalifa oya shunamo medhingoloko etiyali moka Infantino a pitimo omusindani nomawi 115 komawi 88 ga Sheik al-Khalifa.

“Ondi itaala kutya ye oye omuwiliki eli mondjila miilonga mbika. Tala ashike nkene ye a tungulula  UEFA nokwe mu ningi olutu oluwiliki lwetanga lyokoompadhi talu etitha olwiho, lwo ishewe otalu tsikile noku koka mesimano naashika otashi pandulilwa Ifantino”Hamata osho a popi omadhiladhilo ge.

“Omahangano omawiliki guudhano wetanga lyokoompadhi muAfrica oge na okugalikana opo Infantino a gwanithepo omuvaneko ge ngoka a ningi pethimbo a li okandidate tayi kongo okuhogololwa.Infantino okwa uvaneke  ta ka pa ehangano ewiliki lyuudhanitanga konyala oomiliona  dhoodola 75 konima yomimvo ne kehe.Oshikwawo ota ka gandja oodola oomilliona 600 goodola dha Namibia  komawiliko agehe guudhano mbuka momanenevi agehe gahamano, opo ngaka ga humithe komeho uudhano wetanga lyokoompadhi oshowo  okulundulula omikalo nkene uudhano mbuka wuna okudhanwa nawa. ” Hamata a gwedhapo..

Infantino okwa uvaneke wo ta ka konakona ngele otashi vulika ya nenepeke omwaalu goospana ndhoka tadhi kala hadhi kuthombinga mekopi lyuuyuni dhi ze pomilongo 32 okuya koospana 40, tuulike kutya oospana dha za ko Africa ndhoka pethimbo ndika dhili ashike ntano otashi vulika dhi gwehdelwe..

“Oshikwawo elunduluko muudhano wEkopi lyUuyuni , Infantino okwa ti okwa hala opo mbuka wu kale tau vulu okudhanenwa miilongo yi vule shimwe. Oshiholelwa ngele andola South Africa okupewe ishewe ompito a dhanithe uudhano mbuka nena omaudhano gamwe otaga vulu okudhanenwa ngaashi mo Namibia, Botswana, Zimbabwe, Swaziland na Lesotho, oshinima shika oshiwanawa osho ndi itaala,” Hamata a ulike.

Hamata-jpg

 

LEAVE A REPLY

Please enter your comment!
Please enter your name here