Kansela a pula aaholathani ya pewe ookondalaka

0
336

ONGWEDIVA-Kansela mewiliko lyoshikandjohogololo Okalongo moshitopolwa Omusati okwa thaneke opo epangelo li etepo omulandu gwokondalaka ngoka tagu kala ando nokuwilika aagundjuka mboka ya ziminathana mohole.

Kansela Laurentius Iipinge okwa thaneke ngaaka a ti shika otashi ka ngambeke omaso nomadhipagathano ngoka gavuka mokati kaamboka ya ziminathana nenge mboka ya yalekathana nookuli.

Iipinge osheetwapo shika okwe shi gandjele poshigongi shaakuluntu shaningililwe moshitopolwa shaMusati iiwike ya ziko.

Nando Namibia oha gandja oonzapo dhehokano kwaamboka ya hokanathana  pamulandu gwompango, Iipinge oku uvite opena ompumbwe okulundulula ompango ndjoka opo ku kondjithwe iiyetithi yomaso ngaka omawinayi.

Iipinge okwiitaala kutya uuna pena euvathano tali dhengele ndyoka li na okukolekwa kaakongathani mbaka, nena aakuluntu otaya kala ye shi kutya  oyana oyena omakwatathano gopahole  noolye. Okwa ti ishewe shika otashi shonopeke omakongathano nomaitaalathano gomeholamo unene tuu gamwe gomwaangoka gaana mpoka gu uka kakele ashike kutya gamwe gaa ngoka oga kankamekelwa koku pewa iimaliwa nenge omaliko.

Okwa ti euvathano lyohole lyatya ngeyi ando otali kala hali ningululwa epe omumvo kehe opo ngele opena gumwe gwaambaka ye li mekwatathano a vulwamo no ina hala mo we nena nguka ota mangululwa pamukalo nguka opo a zemo.

Iipinge okwa ti ethaneko lyeuvathano ndika otali ka kwathela uuna pena gumwe gwaamboka ye li mohole uuvite a lilwa ku mukwawo  nena nguka ota indile ashike opo a galulilwe iinima ye. Naashika otashi ningwa okupitila maakwanezimo  lyaantu mbaka yaali.

“Oshiwanawa opo omazimo ga kale ge shi euvathano lyohole pokati kaanona  nenge aagundjuka mboka yeendelathana okuyeleka nuuna yo taya ka kundana ashike kutya omwanakadhona nenge omwanamati  okwa dhipagwa anuwa molwaashoka okwa hutula omuholike gwe” osho Iipinge ati.

Pamiyalu dhopashigwana dhuuwindji woshigwana omumvo 2011 konyala aantu omayovi 99 555 okuza poomvula 15 okuuka pombanda oye li mekwatathano lyohole pauvathano nenge paziminathano.

Omiyalu odha ulike kutya mbaka ya yalekathana nokukala pamwe nando inaa ya hokana oyendji oomboka haya kala miilando.

Oshilandopangelo  Windhoek osho shina aantu yaadha lwopomayovi  21 609, yakalelathana nando ina ya hokana pambelewa. Omanga oshitopolwa shaZambezi  osho shina omwaalu omushona gwaantu mboka yeli pamwe inaa ye shipitikilwa.Mboka yootekathana moshitopolwa shoka oye li paantu omayovi 2 340.

Iitopolwa yilwe mbyoka eotekathano lili pombanda ongaashi, Erongo naantu 11 039, Kavango Uzilo 11 730 nOtjozondjupa shi na aa iyoteki yeli lwopoma-10 262.

Iitopolwa yilwe oyi na omiyalu dhili pevi lyaantu omayovi 6000.

Iipinge okwa ti oshikandjohogololo she  osha tula nale okangundu longekidhi miilonga okulonga nomahilathano mokati kaakongathani.Okwa ti okangundu haka ina ka tameka natango iilonga oshoka, okategelela ezimino okuza kepangelo oshowo ina ka tameka wo okukundathana iilonga yako.

“Okakommittee haka ota ka kala okahangukununi pokati komazimo ngoka limwe nenge agehe gaali guuvite ga yugwa iinima yago konima tuu shampa eyalekathano pokati kaagundjuka  ya yalekathana nenge yiihole lyalulu.Ota tu ka gandja tango omathaneko getu kuholomende omanga iinakugwanithwa mbika inaa yi tameka,” osho Iipinge a ti.

LEAVE A REPLY

Please enter your comment!
Please enter your name here