Mutikisha a fumvikwa lwaali

0
451

ONDANGWA – Omukalimo gwomEko lyaNaambo Simon Mutikisha ngoka a mana oondjenda pehulilo lyomwedhi gwaza ko, okwa fumvikwa papuko kaakwanezimo lyanakusa Simon Johannes pehulilo lyomwedhi ogo tuu ngoka.

Olutu lwa nakusa Mutikisha, olwa li lwa tulwa mokila yehangano lyomafumviko ly Northern Grave Stones mOndangwa. Mokila omo tuu mokwa omo wo mwali olutu lwaSimon Johannes ngoka naye wo a li a mana oondjenda shaa li kokule neso lya Simon Mutikisha.

Pahokololo lya gandjwa komupambele gwaMutikisha, oyali ya halika sho pethimbo ya ka talako omudhimba kokila opo andola ya fumbike, ina ya adha mo olutu lwa nakusa gwayo.

Omolwashika ooyene yokila oya ithana aakwazimo lya nakusa Simon Johannes gomOlunkono mOndangwa. Mbaka oya li ya faalelwa omudhimba  kwa li kwiitaalwa kutya ogomukwawo Simon Johannes Etine lyoshiwike shayi ihe nani ngoka ogwa li omudhimba gwanakusa Simon Mutikisha gwokEko lyaNaambo.

Shika osha fala mpoka kutya nakusa Mutikisha okwa fumvikwa pomayendo gaNamdeb momudhingolokoa gwaNdangwa Etitano oshiwike shayi.

Gumwe gwaapambele yanakusa Simon Johannes okwa holola kutya, omukwanezimo ngoka a ka talele omudhimba gwanakusa kOnandjokwe okwa lombwele gumwe gwomezimo sho omudhimba gwe etwa pegumbo kutya nakusa haye e li moshiketha, nokwa lombwelwa kutya okwa tila ashike. Nande okwa ningwa etalo koshipala, ongula yEtitano Febuluali 26, 2016 aakwanezimo oya tsikile nomalongekidho okuya komawendo nokumana omalongekidho agehe.

Ohaluka sho yi ithanwa kokila yoNorthern Grave Stones, oya adha mo olutu lwomupambele gwawo Simon Johanes. Oya li nomaipulo omanene mokutsakaneka aapambele yaMutikisha mboka ye ya pula ngele kolutu lwaMutikisha inaa ninga ko sha shopamuthigululwakalo, shoka ya koleke kutya inaye shi ninga.

Uuyelele wa pewa oshifo shika owa ti, aakwazimo oya lombwelwa ya ka fululule mo olutu lwaMutikisha nande ya li ya tila, ehangano olye ya kwathela mokugalulila Mutikisha kokila, okwoopalekulula olutu lwanakusa Mutikisha nokwa ka fumvikululwa kOnamutayi mOlyomakaya gapiti kaapambele ye.

Nande Pauli Auene omuniilonoga koNorthern Grave Stones okwa ti shika oshikando shotango taa tsakaneke oshiningwanima sha tya ngeyi, ihe gumwe gwomaaningilwa sha moshigwana okwa holola kutya omumvo 2014 ehangano olyo tuu ndika anuwa olya tompakanithile natango olutu lwokamatyona koomvula 12 ka sa  moshiponga nomudhimba gwomulumentu gwoomvula dha konda po 30. Auene okwa kumagidha aapambele yoonakusa ngee taa ya kokila ya tume mboka taa dhimbulula nawa nakusa pamwe okwa ehama ethimbo ele, nenge mboka ihaa tila opo kaa ya ethele iinakugwanithwa ayihe miikaha yaaniilonga mokila.

Ekumagidho ndika olya gandjwa wo nokaapambele yaMutikisha oshowo kaakwazimo ya  nakusa Johannes, ando oya pulakenene elombwelo lyaangu a dhimbulula epuko ando ehangano Northern Grave Stones inali ninga ekanitho lyokufumvika omusi lwiikando oyindji nokulanda oshiketha oshikwawo, nehangano olya gandja ombili kwaashoka.

LEAVE A REPLY

Please enter your comment!
Please enter your name here