Omalenga ina mu langeka aantu mooha dhoondjila -Kankoshi

0
428

 

OMUTHIYA – Ngoloneya gwoshitopolwa Oshikoto Henock Kankoshi okwa indile omalenga opo ga yande okulangeka aantu mooha dhoondjila.

Kankoshi okwa ningi eindilo ndika pethimbo a li popi omwedhi gwa ziko poshigongi na yamwe yomaaleli yopamuthigululwakalo.

Ngoloneya okwali a holola oku uva nayi sho ta ti nonande yali ya gandja elombwelo opo omalenga ga tulepo okulangeka nokugandja omahala pooha dhopate ndjoka yoB1, natango onkene owala anuwa aantu mbaka taya tsikile nokulangeka nonande ka shi li palandulathano

Okwa ti shi no otashi ningwa molwaashoka opuna omathaneko ngono ga tulwa miilonga opo opate ndjoka yoB1, yi tungwe yo yi kale yina oobaana mbali ko ku yandwe iiponga mbyoka tayi indjipala.

Opate ndjono oyali yi na okutamekwa pamumvo gwoshimaliwa gwo 2015/2016, ashike anuwa molwiinima yimwe inaa yi pwa okwa tengenekwa yi ka tamekwe momumvo gwoshimaliwa gwo 2016/2017.

“Okwa thanekwa opate ndjika yoobaana mbali tayi kala yina ookilometa 142, tayi tameke kOngwediva tayi piti mOndangwa sigo opOmuthiya, shino osha thanekwa opo ku shunithwe iiponga yomoondjila pevi nomaso ngoka ta ge tu yugu, yo aaniihauto ya kale taya ende hwepo  onkee otatu pula elongelokumwe pokati kaakwashigwana oshowo ooyene yomikunda,” Ngoloneya Kankoshi ta indile ngaaka.

Kankoshi okwa ti uupena mboka ta wu ulike mpoka tapu ka ende opate ndjika yoobaana mbali owa dhikwa nale , ashike ooyene yomikunda otaya tsikile owala anuwa nokulangeka nonande ya tseyithilwa, ta ti yamwe oya langekwa owala mpoka puna uupena no taya langeke unene mooha dhondjila, shono ta ti oshinima oshiwinayi no sha pumbwa okuhulithwapo.

“Shampa to ende mondjila ndjoka onene oto mono nkene natango ooyeni yomikunda ya tsikila nokulangeka, ando oyali taya iyutha komalombwelo ngoka yo kaaya ye ehumokomeko moshipala, ya langeke ngaa kokule nopate yo taya etha mpoka pwa tulwa uupena oshoka otashi ka kala omukundu omunene  sho opate ndjoka tayi ka tamekwa okulongwa, omahumokomeho goludhi nduka inaga pumbwa okuyiwa moshipala oshoka mbuno owo uuwanawa waakwashigwana ayehe,” Kankoshi ta gwedhapo ngaaka.

LEAVE A REPLY

Please enter your comment!
Please enter your name here