Oshivilodimbuluko shoukumwe shoihakanwa yomokabesa koCassablanca

0
357

ONGWEDIVA  – Ehangano loMVA fund, moukumwe nepangelo, Ongonga Hangano yEengeleka moNamibia (CCN), novakwapata vaavo va xulifila moshiponga shokabesa po Casablanca, ova tokola opo ve uye po noshivilodimbuluko shoukumwe.

Okwa tengenekwa oshivilo eshi shika kale ko momafiku 10 ile 11 March hano okuuka pexulilo loshivike tashi ya.

Pefimbo lomutumba oo wa liko omafiku aa peembelewa do MVA Fund mOngwediva, wali pokati kOpolifi, oMVA Fund novakwapata voonakufya, okwa tokoliwa opo ku ka kale oshivilodimbuloko shovanhu 15, va file mo 12 Febuluali, eshi okabesa omo vali keli denga mumwe nololi.

Omunambelewa omukulunhu, elile po oshikondo shekelelo loiponga nomaulema taa etwa koiponga yomeendjila, Sidney Boois okwa ti ombelewa ya Presidente Hage Geingob, Ombelewa ya Ngoloneya waShikoto, oCCN, oya twa kumwe no MVA Fund nopolifi, opo ku ningwe edimbuluko loukumwe, lika ningiwe pamukalo womailikano, tashi ningilwa ponhele opo pa ningilwa oshiponga.

“Mondjila oyo yo B1 omwa kanena unene eemwenyo dihapu. Otwa pumbwa oku i ilikanenena opo efingo olo la tulwa kondjila oyo tuli hanaune po,” Boois ta ti ngaho.

Boois okwa pula yoo opo ovakwanedimo voonakufya va hoolole ovanhu vavali mokati kavo opo vakakalele po ovakwapata voonakufya mokakomitee oko taka ka ungaunga nedimbuluko loukumwe.

Okwa yelifa kutya Ombelewa ya Govena waShikoto opamwe no MVA Fund otava ka yandja omayambidido aeshe, taa ka pumbiwa poshivilo, mwa kwatelwa oikulya, noku endifa omalutu oonakufya, oku a kufa koWindhoek, fiyo oko ko taa ka pakwa.

Pomutumba opo tuu opo, omuponhele mopolifi mOshitukulwa shaShikoto Deputy Commssioner Naomi Katjiua okwa kunghilila ovakwapata voonakufya opo va kale va kotokela ookalyamupombo ovo paife va ninga ovo veli momaluhodi oihakwanwa yavo.

“Dimbulukweni kutya ounyuni ou kauli nawa. Vamwe otave mupula kombinga yomakwashilipaleko oonakufya, ile tava ti nokuli ohava longo kopolifi. Omanga ino kufa onghantu yasha, dengele nge u pwilikine kutya osho to pulwa oshina tuu oukwashili,” Katjiua ta ti.

 

 

LEAVE A REPLY

Please enter your comment!
Please enter your name here