Peter ondume yomomufitu: Nda kanitha iinkoti

0
616
Peter Jungle Fighter

 

Konima sho nda thiki moshana kuuzilo wOshakati konyala ashike etata lyokilometa okuza pokamba yaakwiita, aakwiita yomutondi oya tameke okuumba yu ukitha kombinga ndjoka nda li nda gama. Okuumba huka okwa fala sigo oompoka kutya oholo yimwe oya gumu okugulu kwandje kwokolumoho lwopongolo. Ihe shika inashi kankameka ndje ngame onda tsikile tandi matuka.

Sho nda taaguluka oshana noku ya miihwa yili popepi aatondi oya umbu omililo dhili mbali omanga wo nda li ndi uvite omidhumo dhomaKasspirs tadhi ziilile mokamba yaNiimwandi tadhi ndunduma dhu uka lwokungame. Omililo ndhoka yuumbu inadhi ya kwathela sha oshoka ngame onda adhika nale nda ya miihwa yi li kombanda yoshana.

Manga aakwiita ya li ya landula ompadhi yandje mekwathelo lyomililo, omaKasspirs oga li taga kondeke omudhingoloko ngoka okuza kuumbugantu okuuka kuuzilo. Omupya omunene go oga li taga endelele ge vule ndje, onkene onda li nda thiminikwa okulundulula ombinga hoka ndali ndu uka muuzilo no nda uka kuumbugantu hoka oko kwali ta ku zi omaKasspirs. Molwashoka okwa li kwa luudha aakwiita ka ya li taya vulu okulandula nawa ompadhi yandje nekwathelo lyomililo naashika osha li elago lyandje, oshoka oya li ya katekwa kokwaamonako nawa mpoka ompadhi yandje yuuka. Sho nda yi miihwa muule onda lundulula ishewe hoka ndu uka nda uka kuuzilo sigo onda thiki pElyambala pokati kOngwediva nOshakati. Okuza mpoka onda tsikile tandi matuka, manga tandi yi ngaaka onda kala ndi uvite ondhila yolukongo tayi tuka kuumbugantu zilo  wOshakati konyala kombanda yehala mpoka ngame nda yile miihwa okuza moshana. Oondhila ndhika odha li mbali tadhi tuka nokudhingoloka omudhingoloko pokati kOshakati nOngwediva muumbugantuninginino dho tadhi umbu omililo ngiika oku kwathela aakwiita yokolupadhi ya vule okulandula ompadhi yandje. Pethimbo ndyoka onda adhika nale ndili kuumbugantu zilo wElyambala oshoka onda li tandi matuka ondapo kaakunawe, ondapo ndjoka ya li tayi vulu okusitha aamatuki muudhano wOlympika olwiho. Onda tanga omagulu gandje oshoka onda li ndishishi kutya ompito ndjika ndamono yoku iyaka itandi ke yi mona we. Onda li owala, ngame tandi zi ombinzi moshilalo shoholo oshowo iilalo yilwe mbyoka  nda ningwa kondhalate yomakwega pokamba oshowo iilalo yomakwega na yilwe mbyoka ya li moshana moka nda matuka momilema.

Pethimbo tandi matuka ngaaka opwa li ethimbo limwe kaa kwali we tandi vulu okutondoka oshoka oompadhi dhandje ka dha li tadhi vu okuhumbata ndje molwashoka odha li dha zinda. Ihe onzindo nayilwe kaya li iinima ndina nayo. Pethimbo nda tsikile okumatuka onda li ndi uvite aatondi yandje ya fa ta ya hala okwaadha ndje kutya nee onda tondoka ondapo yi thike peni. Onda li nda dhiladhila ngaaka kutya mbaka otaya ka adha ndje ngele oshinkoti shandje inaye shi kanitha. Onda tokola okumatuka ndu uka koteya pokati kOngwediva nuusitola wopuShipepe mpoka nda zi nda landula oteya oku uka kOndangwa. Sho owala nda pitilile pu Shipepe oku uka kOpoto omahauto gane goludhi lwoBuffel oga li kopate okuziilila kOndangwa guuka kOngwediva. Mbalambala ngame onda ziko kopate etandi olama miihwa popepi nopate. Onde shi ningi nde endele komwiidhi oshowo komamanya opo ndaa thigepo ompadhi yanjde, opo aatondi yaa vule okulandula ndje.

Konima sho omaloli ngaka ga pitipo ngame onda shuna kopate tandi matuka nde yi landula ndu uka kuuzilo sigo oosho nda pitilile uundingosho wopOpoto. Kopate onda ziko nomukalo ngoka tandi endele komwiidhi nokomamanya, oshowo pomahala mpoka pena evi lya ndandala opo ndaa thigepo nando oshinkoti shoka tashi vulu okulandulwa kaatondi yandje. Okwa li po ku sha onkene sho nda ziko kopate onda li ndiwete ko nawa mpoka tandi lyata. Pomudhingoloko ogwa li nomwiidhi omule oshowo oguna evi lya ndandala molwashoka omeya opo haga matuka mpoka pethimbo lyomvula. Onda landula okampompolonga hoka konyala uule wokilometa yimwe omanga inaandi londa komwandi guna iitayi ya ziza nawa yo ishewe oya thita, ndika olya li ehala ewaanawa nokuholama omufadhukipo ngaashi ngame. Onda tokola okuholama momuti ngoka guli popepi kashona nondjila nomatompelo ngaka kutya kagwa li kokule nondjila onene yoteya, onkene omutondi ita vulu okudhiladhila kutya ngame onda holama popepi momudhingoloko nguka.

Oshitiyali omwandi ogwa li popepi nokamulonga hoka kuudha omwiidhi hoka ngame tandi endele ngele tandi londoloka kugo noshikwawo nguka ogwa li niitayi ya thita yo ishewe oya ziza nawa. Mbika oya li ya gamene ndje okumonika kaatondi yandje mboka ya li taya kongo ndje esiku alihe pevi nopombanda. Oshikwawo omuti ogwa li popepi negumbo onkene aatondi ka ya li ta ya dhiladhila kutya omufadhukipo ota kala a holama mugo.

Etango sho lya piti onda li nduuvite omidhumo dhomadhagadhaga, oondhila dhokundaadha oshowo omahauto ta ga kongo okuza muuninginino. Oondhila odha li tadhi tuka kuumbugantu nuumbangalantu wOngwediva sigo opehala mpoka ngame nda yilemo mopate. Oshoka omindundumo dhomahauto odha hulile mpoka ngame nda yile mo mopate. Potundi ontimulongo onda mono ondhila tayi tuka yuuka kOndangwa ya landula ondjila.  Yo ta yi galukako ishewe yu uka kOshakati. Shika osha ulike kutya mbaka oya li ya ndopa okumona kutya ngame sho nda yi mopate onda uka ombinga yini. Manga ondhila yimwe tayi tuka ya landula opate yimwe oya li tayi kongo momudhingoloko gwa Ngwediva tayi tuka yu uka uumbangalantuzilo.

Lwopotundi ontimulongo netata onda mono aakwiita ya landula oteya taya tala kutya onda zilemo peni. Shika osha li sha halutha ndje oshoka onda adhika kuumbanda kutya pamwe otaya mono mpoka nda pagukilemo mondjila. Onda fudha muule konima sho nda ndhindhilike kutya pehala mpoka nda zileko koteya oya pitililepo.

Okumona shika onda tseya kutya oya kanitha ndje sigo aluhe.

Okuza mpoka oondhila nomadhagadhaga nomaloli oga lundululile olukongo lwago kuumbangalantu shoka shuulike kutya  oya dhiladhila kutya ngiika  oya li ya tegelela ndi matuke nduuka kuumbangalantu. Mokati komutenya uunona utatu uumati uyali oshowo  okakadhona kamwe oweya momwandi okudhana. Owa li woo tawu toola oonyandi. Onda li nda tila kutya pamwe otau londo komwandi okutoonona oonyandi. Ihe mbuka owa kala ashike tau toola oonyandi ndhoka dha gwila pevi oshowo wa tsikile nuudhano wawo. Omolwuudhano wawo mbuka wo inau mona ndje, sigo oosho kwatoko komatango.

Sho nda kala nda kuutumba momuti ngoka ndili owala onda kala nda hala andola ondi na oonkondo dhopashitwe oku etako omilema. Onda li nda hala noku halelela opo etango li ningine opo ngame ndi tsikile oku enda oku ya kuumbugantu kEnolyexaya hoka oko nda holeka ondjembo yandje. Pethimbo ndyoka onda dhiladhila kutya uuna nda thiki hoka noku kutha ombistoli yandje kapena we ngoka ta ka vula okukwata ndje. Ihe shoka sha li tashi kudhile ndje ooshoka kutya otandi thiki ngiini hoka ndaana omizalo dhasha. Sho kwa luudha onda londolokako komwandi nokugwila no inaandi iyehameka. Ihe onda li itaandi vulu nawa oshoka olutu lwandje aluhe olwali lwa zinda noonkondo. Onda tokola okweenda nda landula okandjila komiihwa nduuka uumbugantu nondeya pegumbo limwe. Pethimbo ndyoka edhiladhilo olye ya mungame okudhingoloka egumbo ndi tale gele otandi monomo iizalomwa yili kongodhi yoopalekwa. Osho nda ningi nombala mbala onda mono iikutu mokati kaambyoka mwali ashike okakotse kamwe hoka nda kuthapo noku ka zala ngame tandi tsikile ondjila yandje okuuka kOmagongati. Hoka onda yi megumbo lyaTate V Nakwafila moka nda pewa epango lyotango sho ndapewa omiti dhokudhipaga uuwehame. Omusamane mwene gwegumbo okwa pendje ombasikela ye. Okwa pendje wo otrekshuta noosandala dhe. Oya pendje wo omeya omapyu ndi nwemo oshowo ndi iyoge oshoka kandali tandi vulu okunwa omeya omatalala. Okuza mpoka onda tsikile sigo opEnolyexaya mpoka nda thikipo potundi ontintano yokoongula.

Lesha oshitopolwa sha landula wu uve shoka Peter a ningi po konima yoku kutha ombisotoli ye.

LEAVE A REPLY

Please enter your comment!
Please enter your name here