TUYENI KOLUPALE LA TUYENI: Okwootekafana vati oshipifila shohombo

0
572

 

Mmm ta!! Oshili otuna okumona oixuna apa ngo hatu di inatu li idilila vali shiheli paveta.
Heeno oshili vamwe ota ve li tadele okuli otekafana na vamwe ovafiwa pomutenya medina lohombo yehena eenghuwilili.

Shiwana ngungumaneka omadiladilo oye, ndele to kendambala uha twale nande omeya oku itaa ku dungwa, osheshi eshi tashi popiwa apa nena, ngeenge inashi ku kuma oshakuma omukwanedimo woye umwe.

Ovalihomboli vopokafimbo neehombo dihena eenghuwilili odo tadi monika tadi dana onghadangala momalukanda, vamwe ota vati ovalikolamo sha na vamwe ota vati ovakanenamo filufilu.

Eheno oshili naame mwene ou ha dipopi ohaidulu okushikalelapo nawa nawa, omanga inatu ya mokati komushangwa shiwana, lombweleinge utale komikunda oko ngeenge ava muliko nanye omwelooteka ngo ngaashi she ava tuli komalukanda oku tu shi kwete nawa ngaha, oixuna shili kedu.
Tate Kalunga oha tale oo eli pombada opo, she ohatuli oinima yetu manga tuna omwenyo shili wa. Opena ovakainhu novalumenhu vamwe ta ve litade mefimbo lonena ta vati, eehombo davo edi vekwete oda pitila molwaashi va kala va otekafana novaholike vavo.

Eheno oshili eshi kapena ou teshi pataneke nokuli, ovanelao oko veli ovo vapita mondjila ei, vaholike ava mwa hombolafana eehombo dapita momukalo watya ngaha, oshili di yambekelweni Kalunga ne mu wedeleko ame nghina odumbo nanye nande.

Kakele nee keengeleka detu moshilongo oshili itadi popile nande okwootekafana. Nande oudilikumbe ngo ilo ouditwaalele ngo nande omaano oshili oto hange ashike dadika eenyala medu moshinima shatya ngaha.

Ndishi kamuhole oshili taipopiwa, ohamu tameke tamu ningi nomitilo nye mu hena eshi tamuudu shemupamba. Ondatile ngo tulilongeni okupopya oshili, nongeenge hasho onatu ka hange ngo oivelo yeulu yapata she hatu katya Kalunga a kalako nee omolwa oilonga yetu yokombada yedu.
Moshinima ne eshi, omuna ouwa kwaava veu mona mo, mo omuna owii kwaava natango veu shakeneka mo. Ngeno okwali ngo ovalioteki aveshe ava va otekafana moshilongo ha ve ke li hombolapo ngaashi nee mwanuka vamwe vomuvo, ngeno pamwe oto hale ngo kutya oshinima oshinyenye eshi.

Ashike paife okawela aka ta ka tewa momalukanda ko ku otekafana mbela opena vamwe ve ka shi nawa ashike oshili ota va kanifilemo vakwao.
Omukainhu a otekwa eedula 13 moVenduka, eshi ngo emenhu mbela li wete kutya mutu lafika ne nokuhombola lo ota lii kOwambo li kakonge okakadona kokapangi kEngela li ka hombole, uhuu!! Oshili ohamu hepeke omapata ovanhu ta!! Paife ekulupe loye linya wafiya koVenduka otali ningi lalye ove welikweya nale?

Hano omolwashike naana ovafyoona vanyenye nokulya, maala ovai okuhohombola? Oshili nonande oulipule ngo moule mwii otonyengwa ashike omunhu womwenyo tadedaula mukwao noshifa hombo ye naimboli ine mu hala shili, opo ne hapa kadja efingo leni opo.

Molwaashi ohamu ka konga ovakainhu vape ovo inamu panga navo mu he vashi nande nomikalo davo ilo nditye nokuli hamu ke vakufa movalumenhu vavo omu mwe va hanga nye tamu hauluka oidedeukile ei mwadedaula yapwa, hano efimbo limwe opo ne hamudi tamu ka dipaya opo molwaashi kamuvashi nawa.
Ame mwene kandili naana ominge noku otekafana kweni,ashike ngeno keshe umwe onakale ngo ha ka hombolapo oshingudu shaye ilo elai laye eli akala nalo, oshili otashi udifa nai ngeno nokuli okwali ngo hamushiningi nande omapata aa eshi kweenda keengambo, kamukala ngo inamweenda tamu kuwilile.
Nye ne oulongifikola noupangi ava hamuya okukongwapo mu hombolwe, apa mwamona omumati ena eedula 50 opo ta hombola openi? Oshili iho mu pula apa akala eedula adishe odo kutya okwali ta ningi shike?

Hano oo okwapanga eedula a hombola okanhule moVenduka mwii noludalo lamatutu afiyako limwe olifike nopunye opo nokuli, oshili omukala ngo hamui meehombo mweditala nawa. Oshili ounona vopeife ihamu tila omwamanenwapo efimbo keehombo ta!!Eshamane ngo lomandjedi omafula ndjadja olo ne ukwete mokooko waukifa kongeleka yeni ove weheshi apa la kala sho mongula oshelikenyena komayoo.

Oshili oshipifila shohombo otashi dana ne onghandangala keshe apa to ende ashike ovanhu otave li ningililemo nai, ove openi wa mona omulumenhu tafiyi omukainhu mobashu koushimba ye tai aka hombole kOwambo ye te mwaalukile.

Aayee oshili ngeno okwali aame hainingwa ngaho, eshi ngo todi kOwambo noulinga voye oko, oto kundwa kofulula yomobashu yoye shapo oto tamukulula mbela.

Oshili ame itai mu popile nande vatekulu vange, openi wamono omukainhu ulinawa twootekwa komulumenhu eedula 13 nde nghe wa dalwa umone neumbo lavo apa lili?

Oshinimashimwe nda hala okumulombwela, ovakainhu vomoshilongo shetu omuhole unene eehombo naadi inadi dindwa nawa, omo ne veli nomoVenduka omo vaotekwa kovatilyane ava vafadukapo ovakulukadi vavo okudya poilongo yopondje.

Odo eembudi muli nando, nofiku tadi shuna koilongo yavo, omuna okushaala pomutenya molwaashi okaudano keehombo odekadanauka nale, waa ha ti oto shikulako naaku haidi noshilongo osho weheshi edina lasho.

Oshili ame ondi mu hole ashike kandihole eshi hamuningi, osho omulipo tamulipula tamu ti tatekulu ina hala tu hombolwe mbela okuna odumbo nafye eshi tuli mokapifila hombo ketu. Omwa dimbulukwa nawa ndishi kutya okwootekafana otakuhongaifwa omeedoolopa nye shima mwai komikunda omwaninga vali oukadona novamati, hano osho osho tashi tifa okapifila hombo, ohombo yopokafimbo.

Ame ondishishi nawa kutya vamwe vomunye ohamukala muli ominge naashi handi mu lombwele, ashike okutonga oshili, okapifila ohombo aka okena ouwa kwaava sheveendela nawa, ko okena owii kwaava veshi okukahokolola.Pwilikina oikumwifa ndaka taipopiwa, Ndeshiyafela wokatekulu kange eli koVenduka ta dengelenge ongodi ta ti, opo ngo uli tateku? Ame handi nyamukula haiti opo ndili mutekulu wange, nye omuli tuu nawa?

She omo ngo tuli moVenduka omu hatu mono ngo oixuna, ngaashi ame oshili mbela ondina ne omupya mbela onda pumbwa ndi shune nande okOwambo ndika ye povanhu pamwe xwepo molwaashi oshili aayee.
Ouna omupya washike mutekulu?

Tatekulu oshili ngheengo moVenduka ndeyamo nale, ndele navakwetu ava tweyamo navo oshita paife ovamonapo ovashamane ovaotekwa aveshe nokuli eshi handipopi ngaha, oshili ame mbela ondelikoshelwa tateku.

Mmm oshili otaka xunhu omutenya aka, inandi ka nyamukula nokuli ondadima ongodi yange inandi hala okupwilikina ondjongo taidanwa omutenya.
Ondafa ne ndika wete nomatwi afa a inakulu Mbwaduli ya Sheetekela, taka kakoshwa kamone eehombo doinyaneka nyandi, ava mu kashi ka lombweleni na ka shune kOwambo kakake nande ombidi nayo oyatilyana paife.

Omadiladilo aeshe oomushangi yeemwene ndele kaashi a Kundana

JOHN YA TUYENI
MRTUYENI76@GMAILA
CELE 0812988549

 

 

 

 

 

 

 

 

 

 

 

 

 

 

 

LEAVE A REPLY

Please enter your comment!
Please enter your name here