M’uambo naShambo ya pititha okaCD

0
341

 

ONDANGWA –Onkulungu mokushanga nomokutota oondjimbo dhopambepo Peter Miracle Ambambi a tseyika nedhina Omuwambo gwaAmbambi okwa pititha okaCD komaimbilo gopambepo, OkaCD kuyele nuumvo mono a imba pamwe namumwayina gomulumentu ngoka emu landula mombunda, Eino Shambo Ambambi.

M’uambo okwa ti okaCD hano ya pititha okena omaimbilo geli 12. Kakele koalbuma ndjika yapita pethimbo ndika, okuna oongundu dhomalwiimbo odhindji ndhoka dhi li kohi yehangano lyedhina M’uambo Musical Works. Ndhono ta ti nadho odhi li dhi ilongekidha okupititha ooalbuma dhadho okuza muApiliil sigo Mai nuumvo.

Gwa-Ambambi okuna oongundu dhomalwiimbo dha konda po 50 muNamibia ndhoka dhi li kohi yehangano M’uambo Musical Works na oye omukwatelikomeho gwehangano ndika  opamwe na amushanga omukuluntu gwalyo Ben-Amen Shongolo osho wo aawiliki yoongundu  dhomalwiimbo mehangano ndika. Oongundulwiimbo dhaM’uambo odhili oshilongo ashihe.

“Ehangano ndika ondali ndeli totopo omolwa ohokwe nohole yandje yoku imba omaimbilo gopambepo, ngaashingeyi mehangano ndika omu na omaimbilo geli lwopo 1 720 lwaampo. Ihashi pula ndje unene ethimbo ele oku eta po oongowela nenge okutula kumwe iitya yandje no yaa imbi pamwe nangame, ihe ohandi shi ningi nuupu lela oshoka shika omagano ga za meshito lyaTate Kalunga nonda hala ndi ga longithe manga ndi li momwenyo nondi na uukolele,”Gwa-Ambambi ta ti ngaaka noshipala shu udha enyanyu nombili yokomwenyo.

Gwa- Ambambi okwa ti oha longitha okahumba mokweetapo oongowela nomaimbilo gamwe ohaga imbwa pwaahena okahumba. Okwa gwedhapo kutya nuumvo okwi ipyakidhila okugongela omaimbilo ngaka nokuga tula kumwe pamathimbo ga go ga yooloka, opo ga ninge embo lyeimbilo ndyoka te ke li gandja moshigwana opo wo li longithwe moongerki moshilongo nopondje yoshilongo mpoka  sha pumbiwa.

Hamaimbilo agehe gomehangano lyaM’uambo Musical Works geli muuCD ashike gamwe po owala. Kongaashingeyi M’uambo Musical Works okwa pititha ooalbum 100 lwaampo. Ashike natango onkee ta tsikile noshitalenti shuunongo woku eta po oondjimbo oompe. Ta ti ota tsikile noshipewa she shoondjimbo ye u uvithe evangeeli nokugandja etumwalaka ndyoka tali tungu.

 

 

LEAVE A REPLY

Please enter your comment!
Please enter your name here