‘Eengalo odo eitavelo lange’ –Shikesho

0
295

Eengalo moNamibia onghee tadi pula komesho nomeendelelo mepakumo leisho. Omunyasha wedina Ndeimona Tangeni Erkkyson, a shiivika nawa nedina Ama Bwii Boz oye umwe womovadaningalo va tokola opo ve likongele shavo vene, vaha kufe sha shovanhu. Ama Bwii Boz oku li omushikingalo moumbangalanhu woshilongo, a yambukile kOkalongo noku li e litula mo meengalo.

Okwa pitifa oalbum yedina “Zula and Moola” osho sha hala okutya ou na okulonga opo u mone oshimaliwa. Oya pita mo2015, odula ya dja ko, eshi a li mondodo onhimulongo naimwe poSekundofikola yaNuuyoma. “Onda li ashike nda hala okuyandja kovaholi veengalo novayambididi vange eshi tashi va udifa nawa moshilongo ashishe, noalbuma oyo i na omaimbilo ahetatu. Oalbum ei onde i eta po mekwafelo laDJ Early, a dja koKaiti oo a vatela nge mokueta po eengovela domaimbilo.

Ovanyasha ava mu na oshitaalendi shokuimba inatu shi dipaela mo, natu kendabaleni opo tu ulikeni oitalendi yetu. Moalbuma yange yotete omu na eimbilo lotete“My lifestyle” omo nda imba eshi nda ninga naashi shi na okuningwa kovanyasha. Momukalo omo ongalo tai kwelengedja nawa momatwi, tai ku tula momhepo yokundaanisha nokulinyenga. Okangalo katitatu “Ohole” onde ka ninga naKizzy. Okwa kwatafana yo nokulonga naGold Wave naVMP koKaiti. Okutumbula oungalo vamwe ngaashi okangalo okatiheyali “Konima Yofikola” okawa lela ko otaka nyuwifa omatwi ovapwilikini ngaashi naana oshipalanyolo tashi ti. Ihashi kwata efimbo u mone elalakano nonghundana ei i li mokangalo.

Molwomhumbwe yoshimaliwa, ina ka shiiva vali okutwikila nokueta po manga vali oalbuma imwe nonghee ota indile keshe omunhu ile ovanangeshefa mu mu vatele opo a dule yo okuyambulapo eengalo daNamibia. Okamenhu aka opo take ya mowela, ashike oka kindja neenghono adishe, nondi wete oka pumbwa evatelo pashimaliwa opo ka twikile noshitalendi osho shi li mohonde yako. Omushikingalo ou oku li te lihongo mosekundofikola yaNuuyoma noku li ta kendabala lela opo a kale e na onghalamwenyo iwa ye ta vatele yo natango oshiwana shaNamibia mexumokomesho, unene tuu lomaimbilo opautekenika, hano eengalo.

“Etumwalaka kovashikingalo vakwetu ovo opo tamu ya mowela oleli kutya, natu longeni noudiinini ndele hatu yandje eengalo odo di na ongushu do odopashinanena diwa, odo tadi kala da hokiwa yo kovayambididi vetu nokovaholi veengalo” Osho Ama-Bwii Boz a popya, mokutwa omukumo ovashikingalo vakwao ovo opo ta ve ya.

LEAVE A REPLY

Please enter your comment!
Please enter your name here