Life Fighters onaka sindane ngaa oliha yoNorth West First Division

0
251

ONGWDIVA-Edhingoloko etiyali lya hugunina lyoliha yoNorth West First Division ota li galukile mondambo ehuliloshiwike ndika nongele Life Fighters okwa sindana po omaudhano ge agehe gehuliloshiwike nena otashi vulika a ka pewe ekopi naashika otashi ka ningwa ngele oosipana ndhoka dhe mu landula dhi li ndatu odha kanitha uudhano wumwe wehuliloshiwike.

Ashike oshikando shika aakalimo yokoNooli oye na oomwenyo dha lindimana oshoka oosipana ndhoka dha yambukile kevi lyiimpungu otadhi ulike omulilo omutiligane na oye na ashike einekelo eshona mosipana yoYoung Stars ndjoka yi li pehala etitatu niitsa 32, omanga Life Fighters ngoka e li komeho e na iitsa 38, eyooloko lyiitsa 6 nongele Young Stars okwa pondola okusindana po uudhano we auhe ye Life Fighters ta dhengwa uudhano we auhe, nena otaya ka kala ye thike pamwe miitsa okuya kedhingoloko lya hugunina.

Ongwediva City oyi na okulonga nuudhiginini opo kaayi gwe mo moliha, na oya pumbwa okusindana po omaudhano gehuliloshiwike, oshoka otayi dhanene megumbo na oyi na iitsa 20.

Golden Bigs naye oku li monkugo yi na onkambe, oshoka ngele ina pondola okusindana po omaudhano ge nena otashi vulika a ka gwe mo moliha ngele oosipana ndhoka dhi li konima ye odha sindana po omaudhano gadho agehe gehuliloshiwike.

Oosipana ndhoka dhi li konima yo Bigs odho Golden Bees naBlack Africa Warriors nodhina iitsa 15 kehe yimwe.

Oosipana odhindji odha pumbwa okusindana opo dhi ze mo miikondekitho yokugwamo moliha, Onambula United nayo oya pumbwa wo okusindana omaudhano gayo opo yi kale moliha.

Shiti ota ka te kela mbundje ehuliloshiwike ndika sho oosipana ndhoka dhi li pevi lyoliha tadhi ki ikwata pokapale kUukwangula mpoka Golden Bigs ta palamena mbushe Golden Bees, omanga Ongwediva City tayi ka ya mondambo naBlack Africa Warriors .

Osoondaha Golden Bees ota ka dhana nOngwediva City, omanga Golden Bigs ta ka dhana na Black Africa Warriors.

Uudhano wehuliloshiwike ndika kawu shi okupitilila po omuntu, oshoka iizemo otayi ka nywitha omatsi.

 

 

LEAVE A REPLY

Please enter your comment!
Please enter your name here