Omathaneko gehumithokomeho lyondoolopa yaNdangwa otaga tsikile

0
418

 

ONDANGWA – Elelo lyondoolopa yaNdangwa olili metifa lyokulonga ngaashi tali vulu opo li ete omahumokomeho ngoka ga pumbiwa mondoolopa yaNdangwa. Omunambelewa omukuluntu melelo lyondoolopa yaNdangwa Ismael Namgongo okwa yelitha shika pethimbo a popitha iikundaneki mEtiyali lyoshiwike shika poombelewa dhelelo.

Namgongo okwa holola kutya gamwe gomomalalakano gawo oku gandja omayakulo ngoka taga tungu kaakalimo yomondoolopa oshowo kaatalelipo, shono ati osha kwatelamo omakwatathano goondjila/oopate. “Tse aaNdangwa otuna elago oshoka ondoolopa yetu oyo yi na okapale koondhila okanene, oshitaasi sheshina lyolutenda,oshowo mOndangwa omo mwe enda opate ndjoka onene hayi longithwa komuntu kehe,” Namgongo ta ti.

Omolwa omauwanawa ngoka ondoolopa yaNdangwa yi na Namgongo ota ti natango otaya longo ngaashi tashi vulika moku eta omahumokomeho ngoka ga pumbiwa mondoolopa, nonande puna oopate dhimwe meni lyondoolopa okwa ti oyi ipyakidhila noku opaleka dhimwe dhomoopate nopamutengenekwa mwaalu gomvula ndjika elelo olya odheka oomilliona 8, opo li opalekulule oopate dhi kale pamuthika omwaanawa , nogwa mbilipalela aayendimo mondoolopa.

Ngaashi shi li omahala agehe moshilongo kutya evi nenge omahala gomalukalwa oga ninga ondili no taga pula oshimaliwa oshindji, omukundu nguka  nomondoolopa yaNdangwa omo guli nonande taya kambadhala ngaa mpaka naampeyaka oku kala ye na oondando oohwepo. Namugongo okwa ti elelo lyondoolopa olya gandja evi opo li longithwe mokutunga omahala gomagumbo oshowo omahala goongeshefa nomahumokomeho mondoolopa

“Pamwaalu gwoshimaliwa gwo 2016/2017 elelo lyondoolopa olya thaaneka opo tugandje omayakulo komahala geli po900, ndyono twa thaaneka, opo omagumbo ngoka taga ka tungwamo ga kale gaamboka yena iiyemo yopevi oshowo yopokati opo nayo yi imonene omalukalwa oshoka ompumbwe yomalukalwa oyi li unene eshongo enene moshilongo shetu,” Namgongo ta popi ndhoka.

Namgongo okwa ti oya tula kumwe uukuni nUuministeli wUundjolowele opo mOndangwa mu tungwe oshipangelo oshinene shono tashi kala tashi gandja omayakulo.Elelo lyondoolopa olya gandja nale ehala mpoka tapu ka tungwa oshipangelo shoka tashi ka kala oshinene mondoolopa taashi kala tashi ya kula okapangelo hoka okashona ta ka adhika mondoolopa.

“Uuministeli owa holola enyanyu lyawo omolwa evi ndyoka twa gandja notwa tega owala ya manithe uunima uushona sho oshipangelo tashi tamekwa okutungwa, naashino otashi ka ningwa mbala opo omayakulo gaakwashigwana ga kale geli popepi oshoka ondoolopa yetu otayi ende tayi koko notwa pumbwa oku eta omahumokomeho ngoka ga pumbiwa, otatu ka longa muukumwe opo tu adhe ayihe mbika,” Namgongo ta tsikileko ngaaka.

LEAVE A REPLY

Please enter your comment!
Please enter your name here