Ombelewa yaNehale lyaMpingana oyili metifa lyokutungwa

0
305

 

OMBOTO –Ombelewa yoshikandjohogololo shaNehale lyaMpingana oyili metifa lyokutungwa,  pOmboto mpono opo tapu kala osenda yaakwashigwana yomoshikandjohogololo shoka..

Oshikandjohogololo shika oshali sha totwapo konima sho kwali kwa ningwa omatendululo giitopolwa oshowo iikandjohogololo moshilongo. Oyendji yomaakalimo yomoshikandjohogololo shika oshipe oyali  miikandjohogololo ngaashi Eengodi oshowo shoka shaQuinas. Ombelewa ndjika pashikako shotango otayi tungwa kehangano lyo Ours Construction mono iilonga yokutunga yili mekwatelokomeho lya Oscar Nanyemba.

Nanyemba okwa holola kutya iilonga mbika  yetungo lyombelewa oyali yina okutameka muSepetemba omumvo gwayi nomolwa omatompelo gontumba nogongandi oyali ya tamekwa muNovomba.

“Iilonga yetungo ndika lyombelewa ndjika otayi ende nawa sigo oompaka notwa thaaneka opo ombelewa ayihe yi kale yapwa okuya pehulilo lyaMai nuumvo, otatu longo noonkondo opo tu kwashilipaleke kutya etungo otali kala pamuthika omwaanawa, opo yi kalepo yi adhe omapipi nomapipi, yo otayi kala yili pamuthika goshinanena,” Nanyemba ta ti ngaaka.

Ombelewa ndjika yoshikandjohogololo omwa kwatelwa ombelewa yakansela,oombelewa dhaanashilonga ya yooloka moshikandjohogololo dhili ne (4),omahala gokupakinga oohauto dhaaniilonga mombelewa,oshililo,okombitha,ondunda yompungulilo,uundjugo,ehala lyokuningila iigongi, na yilwe oyindji.

Kansela gwoshikandjohogololo Nehale lyaMpingana ngono oye ta kala ta wilike ombelewa ndjika Leevi Reinhold okwali eshi yelitha kutya etungo lyombelewa ndjika olya gandja iilonga kaagundjuka yopomudhingoloko, ta ti nonande iilonga mbika oyo pokathimbo otashi ya kwatha opo yi imonene sha yo ya yambulepo oonkalamwenyo dhawo, opo anuwa sho iilonga tayi ka hula oyi monena mo wo uunongo womatungo.

Tati oshikandjohogololo shika oshipe okwa tegelelwa opo shi ete aakalimo yamo pamwe noku eta omathaneko gawo, yo ya kale popepi naampo taya vulu oku eta woo omadhiladhilo gawo, yo taya kala ta ya yi moonkundathana naaleli yawo mboka oyo yene ya hogolola.

Reinhold oye kansela gotango gwoshikandjohogololo shika oshipe konima sho opo sha totwapo.

Okwa ti pethimbo ndika oha ende noshikandjohogololo manga ombelewa tayi pu okutungwa, niilonga otayi ende nawa.

LEAVE A REPLY

Please enter your comment!
Please enter your name here