Omukwiita a si moshiponga shoshihauto

0
320

ONGWEDIVA-Omukwiita metanga lyegameno lya Namibia ha longele moVenduka okwa mana oondjenda ombaadhilila mekandomo lyohauto.

Omukwiita ngoka edhina lye lya li inaali tseyithwa pethimbo oshifo shika sha yi komanyanyangidho otaku hokololwa a sile poshiponga shoka shaningilwa mondjila yopokati kOndangwa nOshikango ehuliloshiwike lya ziko.

Ota ku hokololwa kutya nakusa okwa adhika oye awike mosheenditho shika sholudhi lwo Toyota yekangwa sho oshiponga shaningwa.

Nonande aakwanezimo ya nakusa  oya tseyithilwa nale eso lye omupopiliko gwopolisi Warrant Thomas Iiyambo okwa ita vulu oku gandja edhina lya nakusa oshoka oshilyo shEtanga lyegameno naakwanezimo oha ya kala ta ye ya geela uuna ya gandja omadhina goonakusa yawo kiikundaneki.

Iyambo ngoka eli omugandja guuyelele kaakwashigwana mopolisi yaShana okwa ti inashi tseyika lela nawa kutya shiponga shoka osha holoka ngiini.

Nakusa okwa li ena oomvula 56 nokwali Staff Seargeat pethimbo ndyoka miilonga ye.

Moshitopolwa tuu omoka omwa holoka oshiponga sho omukiintu gwepipi lyopokati a lyatwa kohauto mondjila yOndangwa nOnethindi.

Okwa li a e hama nokwa tuminwa koshipangelo shaNandjokwe, naku mu lyata okwali a kwatwa po kopolisi noku patelwa modholongo mOndangwa. Okwa holoka nale mompangu .

Omukiintu nguka a lit a kambadhala oku taaguluka opate pethimbo oshiponga sha holoka ,okwa hokolola kutya okuli monkalo yili hwepo.

Oshiningwanima oshikwawo ooshoka oohauto ndatu dhiidhenge mumwe popepi nokapale kaNdangwa.  Mboka yali moohauto moka oyali ya ehamekwa noonkondo. Oya li ya falwa koshipangelo kOnandjokwe.

Mwaamboka ya ehamekwa omwa kwatelwa omukwashigwana gwaBotswana noshowo omukwashigwana gwaChina nomuNamibia gumwe.

Iyambo okwa ti omakonaakono gopolisi  miiningwanima mbika ayihe otaga tsikile.

LEAVE A REPLY

Please enter your comment!
Please enter your name here