Oshituthi shomagongo nuumvo pOnamungundo

0
320

 

AMUTEYA-Ngaashi hashi ningwa omumvo kehe pamuthigululwakalo gwAawambo nonuumvo oshituthi shika osha thanekwa opo shi ka dhanwe pamalelo agehe gopamuthigululwakalo gwAawambo.

Oshituthi shino ohashi longekidhwa aluhe ngele antu ya tameke okukola nomagongo ga tameke okunuwa moshilongo, nomagongo ohaga pungulwa opo ga adhe koshituthi shomagongo, go omalelo ta ga gongala noku tyapula oshituthi shoka.

Elenga enene moshikandjo Amuteya tatekulu Vilho Kamanja okwa  tseyitha kutya okwa longekidhwa opo nuumvo oshituthi shika shi  dhanenwae mOndonga konima sho sha li sha dhanwa pokati komimvo2001/2002.

Oshituthi shino okwa thanekwa opo shi ka kaleko momasiku Mai 7 nuumvo, Kamanja okwa pula aakwashigwana ya kuthe ombinga opo oshituthi shika shi ka ende nawa, ta ti okwa tegelelwa ayehe ya fale omagongo kuuwa opo ga ka longithwe poshituthi shoka shomagongo.

“Oshituthi shomagongo ohashi dhanwa omumvo kehe pamalufo giilongo yAawambo, sigo iilongo ayihe yaapopi yelaka lyOshiwambo ya manako omalufo gawo, sho osho she eta oshituthi shika shikale tashi longekidhwa kondhikwa yaaNdonga nokudhanenwa mOndonga nuumvo ngaashi omo sha tamekele,” Kamanja ta ti ngaaka.

Elenga enene olya tseyitha kutya poshituthi shika shonuumvo okwa tegelelwa pu ka kalwe kOmupresidente Hage Geingob,  Omukokoli Peresidende Sam Nujoma, Omuperesidende omutiyali Hifikepunye Pohamba, aakwanepangelo, aaleli yopamuthigululwakalo moshilongo ashihe oshowo aaleli yaza piilongo yopuushiinda, opo ye ye ya kuthe ombinga moshituthi shika.

“Aluhe etameko edhigu onkee otwa tegelela opo aakwashigwana ya kale ya gandja sha opo oshituthi shi tsikile, nokusimanekitha Omukwaniilwa naantu ye, otwa hala oshituthi shika shomagongo shi kale shopandjokonona no twa hala aantu ayehe ya gongale mongundu ombwaanawa tse tatu tyapula muukumwe,” Kamanja ta ti.

Ta pula ooyene yomikunda ya tseyithile aakwashigwana kombinga yoshituthi shika shomagongo. Yo ya tameke okufala omagongo ngoka ta ga ka longithwa uuna oshituthi sha thika, yo nayo ya kale ya holoka koshituthi. Ta gwedhapo kutya omalenga ota ga kala taga ithanwa opo ga ninge omalongekidho goshituthi manga kuyele.

LEAVE A REPLY

Please enter your comment!
Please enter your name here