Ta mono iihuna noyana

0
676

 

OKALONGO – Omusaane gumwe momukunda Epyaliwa mOshitukulwa shaKalongo, mOmusati opamwe nuunona we uumati utatu, ota ya hupu shokadhila.

Sakaria Noni omunamivo 54, noyana yeli mepipi lyomvula 10 sigo hamano, oya kale yeli monkugo yinonkambe ngele tashiya kiikulya, iinguma, iizalomwa noshowo ondunda yokulala.

Noni ngoka a kala owala megumbo noyana, ota ku hokololwa ena egumbo lya teka po thiluthilu, ye kena omukulukadhi nuunona we iha u yi kosikola.

Petameko lyoshiwike shika aanangeshefa mOkalongo, ya kwatelwa komeho ku Kansela gwawo oya tondoka onkugo noku kwathela Noni noyana mboka ya kala haya zi moka tenda kaaChina ka dhikwa meni lyaashoka mbela shali okatala kokutema, kena owala okaidhi pombando yomutse. Oka tenda hoka ka kulupa okowala ondunda yawo yoku lala, yoo ishewe oyo ondunda yokupungula. Ofamili ndjika oya kala tayi lala ngawo nonando omvula ya kala nokuloka noonkondo mOmusati.

Mbaka oya pewa omakende gomagadhi, oohi, uusila, niizalomwa yaanona mboka ya adhika yena owala iikutu mbyoka yali komalutu.

Aanangeshefa aasihenda mbaka oya landele wo Noni iipeleki, eta ye mu dhengele ondunda yoshipeleki, taye mu pe ombete netalashe, osho wo omakumbatha.

MooNoni kwamwali nando ondunda yimwe, iinima mbi yili mo iikulukuma yali oondunda dha kumuka po mbela nale nale komvula no kadhina woo tuu nando omwiidhi pombanda. Ishewe Noni ina lima nande okashona, epya lye eputu lyowala.

Sho Kundana a talele po Noni pegumbo lye, ota hokolola kutya okwa li ngaa megumbo nomukadhi noyana yahamano, ihe okwa kwatwa po eta yi mondholongo uule woomwedhi omugoyi. Sho a galuka okwa adha omukadhi a fadhuka nokuya kuushimba nomusaane gumwe. Omukadhi anuwa okwa ningi etegelelo lyomusaane gumwe ethimbo Noni eli mondholongo nokwa fala aanona yawo naNoni kAngola kaantu mboka inaa ye ya pamba.

Noni sho a zi modholongo okwa yi a ka taleko oyana koAngola, ashike okwa adha kamwe komuunona we, hoka a li a thigi taka yamu pethimbo a kwatwa po kopolisi, kasa po kondjala.

“Anuwa omukulukadhi gwandje okwa kala owala ta nu omalovu, kena ethimbo naanona, sigo okanona kandje ta ka si kondjala. Sho nda galuka, pungaye opweke ya nee omuntu ta lombwelendje onkalo moka muna aamwandje, nonda ningi etokolo ndi keya tale ko koAngola” Noni ta ti ngaaka.

Molwaashoka omukadhi gwa Noni okwali omukwashigwana gwa Angola, kapena nande okamwe komoyana kena onzapo yevalo.

Omolwa onkalo yokwaana uukwashigwana, aana ya Noni ita ya vulu oku pewa oshimaliwa shoka hashi pewa uunona woothigwa nowaamboka ihaaya vulu okwiikwatha kepangelo, oshoka ka puna uumbangi kutya uuNamibia.

Kansela Laurence Iipinge okwa ti ota ka kambadhala opo a kwathele uunona wa Noni opo u mone uuthemba. Iipinge okwa ti ota kwatathana woo nombelewa yUukashike koOkanntu opo ofamili yaNoni yi mone omakwatho.

Noni nonando a lemana owala kashona koonyala, ota vulu oku longa oshilonga kehe.

“Thikama u dhike egumbo opo aanona ya kale megumbo lya dhikwa nawa, yo ya kale ye uvite uugumbo yeli moohe. Kuna uulema tau ku imbi iilonga nande nande na ishewe ngoye omugundjuka.

“Ino kala owala wiitula momalovu omanga uunona tau mono iihuna, uli mehalakano. Shi tandi keya ishewe ndi ku talelepo nandi adhe ongandjo yegumbo ya dhikwa ya tsakanena. Ishewe konga nande ngaa omukulupe pomukunda mpaka umukwathe okulonga mepya, ondishishi kutya sho aantu taa teya oku na ngaa okukupa nando olata yimwe yiilya,” Iipinge ta kumagidha nokunyenyetela Noni.

Left-alone

LEAVE A REPLY

Please enter your comment!
Please enter your name here