Tjongarero a kumike aadhengingonyo ya dhenge yimwe nopevi

0
435

Windhoek

Omupevi Minista gOmaudhano, Aagundjuka Niilonga Yopashigwana, Agnes Tjongarero okwa kumike aadhenginyo aaNamibia opo ya kale ha ya kondjo ya manamo noku adha esindano pwaana omalimbililo nando omomugandji gwiitsa gumwe.

Tjongarero okwa gandja eindilo ndika kaadhengingonyo yaheyali aaNamibia mboka yakalelapo oshilongo puudhano woongonyo mpoka aakondjithathani taya kondjo opo ya mone ompito yoku ka umba oongonyo puudhano wOlympika moBrazil mu Juni nuumvo

Ompeviminista Gwaagundjuka , Omaudhano Niilonga yopashigwana okwa popi ndhika pethimbo ongundu yaambokisi yaheyali yi ile kombelewa ye okumulaleka kutya ota ya yi manga ko Yaounde shaCameroon okuka kondja opo ya vule okupita oku ya kuudhano wOlympika koBrazil nuumvo

Tjongarero okwe ya dhimbulutha kutya oye na okudhenga oongonyo tadhi kwata nawa nawa opo aagandji yiitsa ya gandje iitsa shuukilila molwashoka oongonyo oye dhi wete nawa.Okwa ti wo oshiwanawa nookuli ngele andola omalugodhi gawo na ya kale ha ye ga sindanapo medhingoloko lyotango nenge ngele okokule omwaa ndyoka etiyali. Okwa ti esindano nomukalo ngoka olya pumbiwa molwashoka ohashi kala aluhe oshidhigu kaambokisi  ya sindane omalugodhi pondje yoshilongo.

Ethigathano ndika lyokupita okuya kuudhano wOlympika  oliliko okuza Etitano ndika sigo Olyomakaya yoshiwike tu uka moYaounde sha Cameroon.

Osheendo shaadhengingonyo yaheyali naanambelewa taa yalulwa  okuza ko Namibia Boxing Federation oya li ya talelepo Tjongarero oshiwike shika omanga inaa ya ya mela lyondjila oku ya ko  Yaounde. Mbaka oye mu tseyithile nkene aadhengingonyo yi idheula nawa okuya kuudhano mbuka owo wa hugunina mondjila yomailongekidho gokupita kwawo okuya kuudhano wOlympika moRio de Janerio sha Brazil.

Tjongarero okwe ya kumike ishewe opo ya kale noondjodhi dhili pombanda moku adha oshilalakanenwa shawo nongeyi ota ya kaleke epandela lyoshilongo tali pepe puule mpe.

Omuwiliki gwospana  noshowo Amushanga Ndjai gwa NBF, Memory Manasse okwa kwashilipaleke oshigwana kutya aadhengingonyo mbaka oyi ilongekidha nawa okulonga shoka tashiya fala koCameroon, molwashoka oya li ya dheulwa nawa metonatelo lyaadheuli yaambokisi ya kalamo nale Mistake Gariseb na Mathias Ndilukwa.

“Otwa tegelela mbaka ayehe ya ka longe nawa oshoka elalakano lyetu  okumona ayehe ya pita oku ya kOlympika.Oshikwawo oshinima shiimaliwa yoku ya futila manga taya kuthombinga muudhano mbuka nomwaamboka wOlympika osha potokononwa, naayehe oyeli nawa no taya yi okukalelapo oshilongo shawo yu uvite etumba” Manase a ti.

Okommittee yopashigwana yOlympika ya Namibia oya li ashike ya gandja iimaliwa kaadhengingonyo yatatu opo ya ka kalelepo Namibia puudhano koYaunde.Aakuthimbinga muudhano mbuka oyo  Junias Jonas Jonas, Mathias Hamunyela na Lazarus Shaningwa. Mboka ya gwedhwako oyo  Abel Mikasiu, Lubben Kandimba, Fillipus Nghitumbwa na Ruben Kandimba.

Jonas na Hamunyela oya sindanene oombandi dhoshisilveli puudhano woAll Africa Games moCongo, Brazzaville mu Septemba omvogu.

LEAVE A REPLY

Please enter your comment!
Please enter your name here