Ya kwata sho ya yaka omahooli

0
308

 

ONGWEDIVA-Aalumentu yaali oya kwatwapo kopolisi  nokuholoka mompangu yaMangestrata mOndangwa sho ya kwatwa anuwa taya yaka omahooli posasiona yomahooli yoPuma moshilando shoka.

Oonakukwatwa oya adhika anuwa taya tilile omahooli moondini nenge miikwatelwa yili omulongo posasiona ndjoka sho mwene gwayo eya holokele inaa ye shi tegelela.

Aafekelwa yaali  Petrus Keneddy omugameni gwomaliko oshowo omuhingi gwotaxi , Lamek Hikondjwa oya holokele mompangu yamangestrata gwaNdangwa Etitatu taya tamanekelwa uufuthi. Oya tindilwa okwiifutilamo mondholongo noshipotha shawo oshuundulilwa komeho omanga opolisi ta yi tsikile noku konakona oshinima shoka.

Otaku fekelwa kutya  aalumentu mbaka yaali anuwa oye shi igilila okuyaka omahooli posasiona ndjoka mpoka opo hapu longele omugameni gomaliko nguka ena oshinakugwanithwa shoku gamena osasiona ndjoka kaafuthi.

Pauyelele wa gandjwa kopolisi  aalumentu yaali ta ya hingi oka taxi koludhi lwo Toyota Corolla oka yi posasiona ndjoka noku uvathana nomugameni gwomaliko ngaashi shito ihe nani mwene gwosasiona naye okwe  noku ya adhelela manga taya tapa omahooli.

“Okwe ya tilitha noku ya yaha ngele oya fadhukapo okuza posasiona ihe nando ongaaka mbaka oya dhenge ompadhi ketako noku zapo posasiona. Omupya omunene ohauto yawo oye thigipo.” Gumwe gomaafekelwa mbaka natango ota fadhukapo oshikaha shoveta pethimbo oshinyolwa shika sha nyanyangidhwa.Omufekelwa ashike gumwe a tulwa miipandeko pamwe nomugameni gwomaliko osho onzo yomopolisi ya hokolola.

Okwa tsikile a ti omufekelwa sho a fadhukapo okuza posasiona okwa yi kopolisi kOngha hoka a patulula oshipotha sheyako lyohauto yoCorrola.Ihe konima okwa ka ndhindhilikwa kutya ohauto ndjoka oya li ya longithwa muufuthi nenge mokuyuga .

Omukuluntu gwopolisi mOshana sho a pulwa kombinga yoshinima shika okwa ti natu pule Omugandjimalombwelo gopevi, Omupevi Kommissina Nico Steenkamp  oshoka  ye Kommissina Rauha Amwele ke li mo moshilando.

Omupevi Kommissina Steenkamp okwa ti omuhingi gwotaxi  Hikondjwa okwa yi kopolisi yopOngha moshitopolwa shaHangwena  nokupatulula oshipotha shiifundja  a ti ohauto ye oya yakwapo. Okuza mpoka aapolisi yopOngha oya hingi na ye sigo omOndangwa opo a ka ulike ohauto ndjoka ya kwatwa kopolisi konima sho ndjika ya adhika ta yi yaka omahooli.

Steenkamp okwa ti opolisi oye ke shi monamo nale kutya ye ( Hikondjwa ) okwa li wo pamwe na  yakwawo peyako lyomahooli posasiona ya Puma ye nokwa mangwapo.

Omugameni gwomaliko ngoka a fekelelwa uufuthi womahooli pamwe na Hikondjwa okwa li omunambelewa gwegameno lyomaliko mehangano lyo G4 Security Company mOndangwa. Oomvula dhawo kadhi shiwike.

 

 

LEAVE A REPLY

Please enter your comment!
Please enter your name here