Aanangeshefa muukumwe meyopaleko lyondoolopa

0
286

 

 

ONDANGWA –  Aanangeshefa yomOndangwa oshowo omahangano ngoka inaaga yama kepangelo melongelokumwe nelelo lyondoolopa yaNdangwa oya tokola opo ya opaleke ondoolopa ndjika yo yi kale tayi gandja ethano ewaanawa.

Shika oshali sha tameke sho Meya gwondoolopa yaNdangwa Paavo Amwele a li uuvaneke kutya  oshipambu she shimwe shomomauwanawa ge ote shi gandja opo shi longithwe meopaleko lyondoolopa. Amwele ta ti elelo lyondoolopa nali tale kutya otaye shi longitha shike, no ta kala ta gandja ngaaka uule woomwedhi mbali.

Amwele okwa ti aanangeshefa mboka ya gandja omakwatho ongaashi SPY, Niimboto, Mad Dogs, Huhu city, D Nangolo , J&M Kalambi na yalwe woo. Aanangeshefa mbaka oya gandja omaloli oshowo omambakumbaku niilongitho yilwe opo ga longithwe moku opaleka ondoolopa ndjika.

“Elalakano lyetu otwa hala ondoolopa yetu yi kale ya yela yo tayi gandja ethano ewanawa kaatalelipo, sho osho wu wete aanangeshefa yetu yi iyamba ya kwathele meopaleko ndika, aanangeshefa yetu oya holola kutya oyi ilongekidha okugandja omakwatho mpoka tashi vulika unene keopaleko lyondoolopa ndjika,’ Amwele ta ti.

Metiyali lyoshiwike shika aanangeshefa oyali ya tameke noshiluku shotango mono yali taya opaleke gamwe gomomahala mondoolopa, oshowo ta ya tetemo omano ngoka geli momikunkulu dhoondjila mondoolopa, mo mu kale mwa yela.

Meya okwa holola kutya ndino etameko owala ashike oya thaaneka opo ya ka ninge oshikonga oshinene tashi opaleke ondoolopa ayihe mono naakalimo yomondoolopa taya ka kala ya kwatelwamo. Eopaleko ndino lyongashingeyi otali kwata owala omasiku gaali.

Amwele ta tsikileko ta ti aanangeshefa yomondoolopa yaNdangwa oyi ilongekidha okukwatha oondoolopa dhopuushiinda uuna nayo ya tokola oku opaleka oondoolopa dhawo. Ta ti eopaleko ndika kalishi lyopakathimbo ashike otali kalelele, noya hala okukwashilipaleka kutya ondoolopa oya yela nuuyogoki otawu imonikila.

Okwa pula aakalimo yomondoolopa ya kalekepo uuyogoki yo taya yanda oku ekelahi iiyagaya shaampoka, teya kumike ya longithe omandoloma giiyagaya ihe haku ekelahi pevi, tati na ya yande enyateko lyondoolopa. Amwele naye mwene pethimbo yali taya opaleke okwali ta hingi eloli ndyoka lyali tali tutu iiyagaya nelalakano lyokutsa aantu omukumo.

LEAVE A REPLY

Please enter your comment!
Please enter your name here