Endjala a uvaneke ta gandja omakwatho ga pamba elongo

0
310

 

OTALA – Omunangeshefa eshiwike nawa monooli yoshilongo, John Akapandi Endjala okwa uvaneke ta kala ta gandja omakwatho ga pamba elongo kaanaskola oshowo kaalongi posikola pOtala ndjoka yili moshikandjolongo Onamutayi.

Osikola ndjika Otala oya totwapo mo1975 nongaashingeyi oyili mewiliko lyOmukuluntuskola  Kanisius Sheyanale. Otala oyina ondondo yoshikunino sigo ondondo onti-10 nopuna  aalongi yeli 22 naanasikola yeli 585.

Sheyanale okwa holola kutya osikola yawo otayi longo nawa nuunona wawo owu uviteko. Shino ota ti oshali sha hololwa kiizemo yondondo onti-10 . Mo 2013 oyali ya pititha noopelesenda 76%,  omumvo 2014 oya li ya shuna pevi kashona noya mono oopelesenda 71.5%, omanga mo 2015 ati aanona oya longo nuudhiginini noya pititha noopelesenda 91.4%.

Otala oyo ye ya tango moshikandjolongo Onamutayi ya kangela oosikola adhihe omanga  moshitopolwa ye ya ponkatu ontihetatu. Sheyanale ta gwedhapo kutya oya longitha omikalo odhindji opo aanona yi itule melongo lyawo, yo aalongi taya panga  uukuume nuunona, omaihumbato omawanawa pokati kaanaskola naalongi osho she eta elunduluko ewanawa maanaskola.

Endjala ngoka ali a talelepo osikola ndjika oshiwike sha piti okwali a popitha aavali nokwali a etele osikola ndjika omagano gookompiuta dhopeke dhili 3 nomashina gokutalela kekuma ngele omuntu ta lesha geli gaali (projectors), niinima mbino Endjala okwa ti oyongushu yooN$46 000.

Pethimbo ta gandja omagano ngaka montaneho yaavali niilyo yetonatelonongelo posikola opo tuu mpoka Endjala okwali a uvaneke kutya omulongi kehe sho tashi ka thika puDesemba ota kala ena okompiuta yopeke opo ya kale taya longo nuupu nonuudhiginini.

“Onda hala opo tu longeleni kumwe mokugandja elongo kaanona yetweni, otwa hala uunona awuhe moshilongo wu kale wa longwa onkee otandi uvaneke mpaka nena kutya otapu ka tungwa ongulu yookompiuta oshowo olabolatory, aanasikola mboka taya ka pita nawa pefudho ndika twa taalela otaya ka kala ya landelwa omizalo dhoskola dhi ihwapo,” Endjala ta popi ngaaka nomuthindo.

Okwa pula woo aavali yi itulemo melongo lyaanona yawo, yo taya kala noku iyamba mpoka sha pumbiwa. Ta uvaneke kutya okwi ilongekidha okugandja omakwatho aluhe kiinima mbyoka ya pamba elongo. Ta ti oshilongo otashi humu owala komeho ngele shina aantu ya mona elongo. Okwa hala nokuhalelea moshilongo mu kale oondohotola, ooinginia, aahingindhila nosho tuu. Ta halele aanona elago nomukumo meilongo lyawo.

Omukuntusikola pamwe naavali oyali ya pandula molwa omagano ngoka ya pewa noya pandula molwoshindji shoka ya tegelela okuza ku Endjala.

LEAVE A REPLY

Please enter your comment!
Please enter your name here