Ndamona a limbililwa kepango olo ta pewa yee itaa veluka

0
410

 

Lüderitz – Omukainhu omunamido 28, okwa limbililwa konghalo ei eli muyo yo u yehame wokuulu taku anye oku veluka.

Ndamononghenda Nghifindwako omunailonga omuhelufuni mehangano lokukwata eeshi laNovaNam okweya po mbelelwa ya Kundana ta kwena ta hokolola oukwatya wouyehame wokuulu, oko ta ti keshii ngee okwa lemana filufulu ile pamwe ona ka mone ngaho ekwafo.

Nghifindwako okwa hokolola kutya omafiku 5 Juni 2014 manga ali eli pyakidila noilonga mofaablika ya NovaNam omunailonga pamwe naye okwa hutukwa koshiviha seeshi ndele tashi denge Nghifindwako monhafaulu yokokuulu kwokolumosho.

Oku hovela efiku olo okwa kala noku pangwa kondokotola yopaumwene, oyo kwa li nokuli ye mu tumina ko Windhoek opo a ka talike komundokotola a pyokoka nawa.

Nghifindwako ota hokolola kutya eshi okuulu kwafanekwa okwa lombwelwa kutya ina teka, eenhumba odo ashike da mona oshiponga.

Osho sha eta elimbililo mu Nghifindwako.

“Okuhoheva efiku olo ndamona oshiponga mu Juni 2014 fiyo onena ngaha okuulu kwange ota ku luluma ashi ke monhafaulu, ita ndi dulu oku enda ohandi ende ashike handikokolola okuulu. Onda limbililwa, Ndokotola okwa lombwelange kutya epeko lange olapata, ashike inandi veluka, ohandiluluma.

“Ndokotola okwa tumbula kutya onda lemana, ashike ita dulu okushanga ombapila yokutya ondalemana shaashi ondi mu shona natango, okwa ti ota shangele ashike oSocial Security opo ipenge oshimaliwa ndi shilongife moku landa omiti dange,” Nghifindwako osho ahokolola yee ta di omahodi.

Nghifindwako kombinga yoilonga okwa tumbula kutya yee muuhelufuni, mofaablika ya NovaNam okwa hovela okulongamo mo 2009, okuna ounona veli va tatu omukulunhu okuna eedula 10, nonghelo oina eedula nhatu. Ota tumbula kutya omafiku okuya koilonga omanini neenghono, omafudo omolwo ouyehame omahapu.

Nonande epeko louhaku kundokotola wo paumwene lapatwa, Nghifindwako onghee ngaho a pumbwa ouhaku natango. Ota hokolola kutya okwa ka ya koshipangelo shepangelo mo Lüderitz oshivike shadjako, okwa ti Ndokotola ou emupanga koshipangelo shepangelo okwe mu lombwela okwa pumbwa ondjokonona youhaku okudja petameko.

“Ndokotola okwa tu lange ashike pedu oule womafiku 6, ta ti okuwete shili kutya ohandiluluma ashike ota ti okwa pumbwa ondjokonona youhaku, nandi ninge nee ngahelipi?” Nghifinwako osho a tumbula.

Omunambelewa wo HR mo NovaNam Manu Namukomba, eshi apulwa ku Kundana kombinga youhaku wa Nghifindwako okwa tumbula, ehangano la NovaNam ola longifa konyala oshimaliwa shifike N$100 000, oku pangifa Nghifindwako ngeno a veluke, ashike ouyelele oo va monapo okudja kuNdokotola oo ashike oo tau ti kutya epeko, olapata. Ashike Ndokotola okwa udaneka kutya ota nyola ombapila iye koSocial Security, opo  a mone evatelo.

LEAVE A REPLY

Please enter your comment!
Please enter your name here