Oshiindingili shomukahona dhingi mOndobe otashi kwathele oothigwa

0
437

WINDHOEK –Oshiindingili shoka shomukadhona dhingi Miss Ondobe Local View tashi ningwa Olyomakaya ndjika pOndobe, otashi ningwa nelalakano okukonga oshimaliwa opo putungwe egumbo lyoothigwa mOndobe.

Okakadhona hoka koomvula ooshona, 23, namwene gwo Maiyahlicious Modeling Academy (MMA), Maiyah Saiyah Salatiel, oye omukwatelikomeho gwoshinyangadhalwa shika.

Salatiel ngoka a kala nokusindana omakopi ogendji ngele tashiya momathigathano guukadhona dhingi owundji moshilongo gayoolokathana okwa ti paife ota kambadhala okutula ohokwe ye noshitalenti she miinima mbyoka tayi tungu oshigwana, na opo aninge shika okuna oku tameka noku longekidha omathigathano guukadhona dhingi omashona momukunda, nelalakano oku konga oshimaliwa opo a tunge egumbo lyoothigwa mOndobe.

Salatiel okwa ti oothigwa odhindji momukunda muka onkene tadhi nana nondatu, notadhi mono iihuna, nokapuna ngoka te dhi kwathele, shoka shemu thiminike opo a ninge onkambadhala ndjika okupitila moshitalenti she.

“Ngaashi naana ngame othigwa, ondishishi kutya ohashi kala oshidhigu noshiyematekithi, na inandi hala shika shiningilwe oonakuyiwa yuunona wetu,” Salatiel ta ti ngaaka.

Oshiindingili shika otashi ka ningilwa komeho  gEhafo Super Market mOndobe. Nuutekete otawu ka kala wuna  N$20 kaakuluntu,  N$10 kaanasikola naN$5 kuunona noshiindingili otashi tameke potundi Ontano yokomatango.

Omusindani ota ka kala oye ta dhana onkandangala onene, metotopo lyegumbo ndika lyoothigwa.

“Mondjila yandje okukala ependa moku enda, onda kutha oompito odhindji, moka ndaka mona kutya tse aaNamibia otwa pumbwa ashike okulongela pamwe opo tu hume komeho, no shotango otwa pumbwa okukwathela oothigwa dhetu oshoka kapuna ngoka tedhi    kwathele,” Salatiel ta gwedha po ngaaka.

Okwa indile opo ishewe yapewe oplota kumwene gwomukunda, oshoka egumbo ndika itali ka kala halilalwa manga, ashike oku gandja ashike iikulya, okuyoga iikutu, nokutakamitha oothigwa ethimbo lyomutenya.

Ngaashingeyi oya kwathelwa ku mee Lucia Ndiilenga, 1Tym Printing, Tate David Namundjebo go Free Kick Bar, Tate Dishena Taukondjo goAfrotainment, Tate Rado Dumeni, Tate Allan Hamwedi  no Maiyahlicious Trading

LEAVE A REPLY

Please enter your comment!
Please enter your name here