Peter Ondume yomomufitu: Oku shuna koSwapo

0
501
Peter Jungle Fighter

Momasiku ga 6 Novemba 1986 lwopotundi 19h00 onda thigi po Enolyexaya mondjila okushuna koAngola. Onda li nda kayila ombasikela ndjoka ndapewa ku Hailwa Nanyemba gokOndiamande moshikandjohogololo Okatjali. Onda pitile pokati kOndangwa nOngwediva nda piti momukunda gwOikango oshowo dhilwe mondjila yandje uusiku mboka.

Sho ndali tandi piti mOkatope mOukwanyama uusiku mboka , onda gwile moshilangela shomutondi. Elago enene oondika kutya omutondi okwa ka uva omainyengo gandje  kwatoka. Shika okwe shi ndhindhilike konima sho ngame nda adhika nda mono kutya onda ende mekondeka lye.Osha holoka aatondi ya li ya kotha lela pethimbo nda ende mpoka ya li no ya ka uva ashike omainyengo gandje konima sho ngame nda pita nda ya kokule nayo. Tango onda uvu ezimba lyomakaya tali nika ndele kandali ndi shiwo ngele olya li tali zi pegumbo ndyoka lili popepi nenge pamwe omakaya ogomutondi. Ihe sho nda tsikile onda mono okathayila ka londekwa moshihwa shomusati. Mpoka opo nda ndhindhilikile kutya ondi li moshilangela shaakwiita yomutondi molwashoka mbaka oya li mehala moka ngame ndali tandi ende.Sho mbaka ya ka tameka okuumba omililo okuminikila ngame onda li nda ya nale ndili kokule na yo, tandi ende ndu uka kuuzilo nda humbata ombasikela yandje ngame tandi lyatele komwiidhi oshowo pevi ekukutu opo ndaa thigepo oshinkoti shoka aatondi yandje ya li taya vulu okulandula.Onda thiki pOdibo lwopotundi 5h30 mpoka opo nda thigi ombasikela yandje peelo lyegumbo limwe omanga inaandi enda ndu uka koongamba koompadhi. Sho nda taaguluka oku ya moAngola onda yi ndu ukilila kOyihole hoka oko nda li nda thigi  iikondjitho yandje  nde yi holeka  mwa kwatelwa no AK-47 oshowo omagandjina giikuti ge li gatano. Omanga inaandi ya pehala mpoka nda holeka iilwitho yandje  onda li nda ende pamukalo goguerrilla nda katuka kombanda yomwiidhi omukukutu oshowo pevi lya kukuta okusoshimpwiyu kutya omutondi ita vulu okulandula ompadhi yandje.

Shono nda thiki momukunda ngoka onda holama  manga miihwa noku tala nawa onkalo yegameno omanga inaandi ya kehala hoka ndali  nda holeka iikondjitho yandje.

Iikondjitho yandje onde ke yi kuthapo pehala mpoka ongula onene molwashoka pOyihole onda thikilepo ongulohi kwatoka, onkene kandali nda hala oku ya po pehala ndyoka kuna omilema. Ongulohi ndjoka onda tokelwa naantu yomomukunda ngoka mboka twa li twa tseyathana omanga ndali inaandi kwatwa. Petameko mbaka oya li ya tila ndje ta ya ti pamwe ngame oguerrilla yuumbudhi ta yi kongo aakwiita yoPLAN moshitopolwa shoka moAngola. Pethimbo ndyoka pehala mpoka opwa li aakwiita oyendji yomutondi. Oya ka kala ashike yaana we uutile konima sho nde ya fatululile muupyakadhi moka nda zi. Opo ihe oya pendje iikulya  nomeya okwi iyoga.Aanamukunda mbaka oya lombwele ndje kutya oya ninga omasiku ya mone aakwiita yoPLAN.Pahapu dhawo aakwiita yoPLAN oya  li ya tembuka yuuka kuumbangalantu muule woshitopolwa sha Kunene, omolwa omainyengo ogendji gomutondi meni lyAngola.

Ongulohi ndjoka onda tokola okulala miihwa, inaandi isiikila sha. Ongula onene onda yi ndi ka kuthe oondjembo dhandje  mpoka nda li nde dhi holeka. Onda adha iikondjitho yandje ayihe unene tuu o AK-47  tayi longo nawa no ta yi vulu okuumba iikuti.

Pethimbo ndyoka onda li ndu uvite nda manguluka oshowo uuntu wandje owa galulilwa ndje. Konima onda tsikile olweendo lwandje ndu uka kuumbangalantu monkambadhala okwa adha mpoka pena aakwiita yPLAN . Sho tandi ende onda kala ndu uvite omidhumo dhomahauto gaatondi tadhi ziilile ndje muuzilo. Omidhumo ndhika odha dhimbulutha ndje kutya  natango kandali megameno  moshitopolwa shoka shAngola. Onda li tandi ende mehala ndaa li shi nawa noshikwawo onda li ndina uumbanda kutya pamwe otashi vulika ndi gwile momake gomutondi nenge miikaha yooguerrilla dhiifundja ndhoka dha li tadhi longele moshitopolwa sha Kunene.

Onda li ndi ipopile noku imbilipaleka kutya  molwashoka ondjembo yandje ondi yi na otandi vulu okwiipopila uuna shapumbiwa.Konima yokweenda uule womasiku gaali  no inaandi mona aakwiita yoPLAN  moshitopolwa shoka shAngola . Onda goyokele kuuninginino oku uka kOndjiva. Aakwashigwana yomomikunda ndhoka nda taaguluka oya lomwbele ndje kutya oshidhigu okumona aakwiita yoPLAN, kakele oya lombwele ndje kutya  aakwiita ypFAPLA etanga lyegameno lyAngola pethimbo ndiyaka oya monikile taya patolola oshitopolwa shoka konyala ookilometa omilongo ne muuninginino washo. Onkene oya pendje omayele opo ndi ende ndu uka muuninginino ndele ha ku uka muumbangalantu oshoka oya uvu taku inyenge omahauto gomutondi omasiku gaali ga piti.

Mesiku etine konima yoku taaguluka oongamba dhAngola onda tsakaneke aakwiita yetanga lyegameno lyAngola taya patolola konyala ookilometa omilongo ndatu muuzilo wOndjiva.Omukwashigwana gumwe gwopomukunda mpoka oye a fala ndje kuyo.Onde ya hokololele onkalo yandje, Kommanda gongundu ndjoka ta pendje iikulya  unene yomoondooha nuumbisikiti omanga inaa pa ndje osheendo shaakwiita omulongo ya  fale ndje kokamba ya landulako ya li konyala ookilometa omilongo mbali muuzilo wOndjiva. Otwa thiki hoka komatango kwa toka  onkene otwa lala mokamba ndjoka , ongula sho kwa shi omukuluntu gokamba ndjoka okwa pendje ishewe aakwiita yatano neloli  opo ya fale ndje kOndjiva hoka nda adha aakwiita yoPLAN poombelewa dhuukalelipo dhoSWAPO.

Konima yoonkundathana oonde oshowo omahokololo kombinga yonkalo yandje oohailwa oya tseyithile oombelewa oonene dhoshitopolwa dhoPLAN naambaka oya li ya lombwelwa opo ndi kale puyo osigo pwa monika osheenditho oku fala ndje koLubango. Otandi popi kutya oohailwa mboka nda adha  poombelewa dheHangano  oya li ya yakula ndje nawa okushi talela monkalo ya nyelevala moshitopolwa shaKunene pethimbo ndyoka.Manga nda tegelela osheenditho oohailwa oya kwathele ndje nawa noshowo oya panga iilalo yandje mbyoka ya li inaa yi aluka.Onda li ndu uvite nda pepelelwa nonda pitwako kenyanyu okukala nda galukila kehangano konima yoomwedhi hamano ndili miikaha yomutondi.Pethimbo lyoomwedhi ndhoka onda kala momuzizimbe gweso[nonando eso inali sinda ombepo yandje yuukondjelimanguluko opo andola ndi igandje miikaha yomutondi] shimwe kandali nda dhiladhila nando esiku limwe pethimbo nda kwatwa kutya onandi ki iyakamo  miikaha yomutondi. Oohailwa pOndjiva okwa li ya kumagidhwa opo yaa pule ndje ngaaka tashi vulika andola ndi holole kutya etumo lyandje moNamibia olya li lya shike ndyoka lya fala ndje miikaha yomutondi.

Ondjiva ayihe ethimbo ndyoka oya li ya langela komatati  molwashoka omatanga gomutondi oga kala taga ponokele oshilando shika. Onkene ethimbo ele otwa kala hatu kuutumba  momalambo goku holama omutondi twi ilongekidha oku mu shunithako.

Momasiku 23 Novemba 1986 onda li nda falwa koombelewa oonene dhopashitopolwa dhoPLAN moLubango oshilandopangelo shoshitopolwa sha Huila moAngola moka nda adha oohailwa yomongundu  yandje yomiilonga yomeholamo ya tegelela ndje. Oohailwa oya taamba ndje neifupipiko oshowo mombepo yuuhailwa.

Oya fa nale ya li ya tseya monkalo moka nda kwatelwa oshowo omahapeko ngoka nda ningilwa kaalongithwa yomukolonyeki. Oya fa ishewe ya li yu uva nkene ngame nda tindi okuholola komutondi iilonga yandje meni nopondje ya Namibia oshowo wo omathaneko niilonga ayihe yoPLAN.Ihe nando ongaaka onda ka pulwa natango shinasha negameno opo ku monike uuyelele wontumba. Nando onda pulwa ngaaka onda li nda taambwako nawa koohailwa oshowo komuwiliki gwiilonga yomeholamo hailwa Festus Shikongo Nexale, oshowo yalwe moombelewa oonene ngaashi hailwa Ben Likando, German Itana, Elias Angula [Katanga], Gotlieb Nghihepavali[Mokahonde], Kandjou E King oku tumbulapo ashike yamwe. Onda li nda nyanyukwa komukalo ngoka ndali nda taambwa nago, unene tuu sho ya kwatha ndje opo ndi mone epango molwuuvu mboka wa adha ndje omolwokufikwa nomalusheno, omadhengo ngoka ga yonagula onkalo yolutu lwandje.

Ando ka pwali ekwathelo lya hailwa Shikongo ngiika andola onda ka kala niiyadhi kolutu lwandje sigo onena.

Ondina ongunga ye oshowo yoohailwa  yalwe yetanga lyetu moombelewa oonene dhoPLAN moLubango.

Pethimbo lyomapulapulo ngoka onda li nda lombwele oohailwa omikalo ndhoka omutondi a li ha longitha oku konga uuyelele maakwiita yoPLAN mboka ya kwatwa oshowo nkene ha thiminike aakwiita mbaka opo yi igandje  oshowo okulundulula omadhiladhilo gawo kombinga yekondjelomanguluko. Onda li wo ndeya hokololele oshindji kombinga yaashoka hashi ningwa mookamba dhoonkwatwa komutondi.

Omayakulo ngoka nda pewa koohailwa oga li ga pumba unene komuntu ngoka iiyaka miikaha yomutondi. Ngaashi kutya onda li nda pitikwa okukala niikondjitho yandje mbyoka nda etelele sho nda galukile koombelewa oonene okuza sho ndi iyaka momake gomutondi.Pakutala kwandje ngame onda li nda yakulwa ongo ependa eshona ndyoka lya galuka. Sho nda galukile koombelewa oonene dhoPLAN muDesemba 1986 onda kala moontanda dhaakwiita yomeholamo oshowo moshitopolwa shontanda ya Witbooi osigo omu Juli 1988 sho ehangano lya tumine ndje kosikola koNdowishi yopaudemokoli nale ndi ki ilonge uuwiliki.

 

LEAVE A REPLY

Please enter your comment!
Please enter your name here