MOnayena natango otamu fofodholwa uuzigo

0
458

 

ONAYENA –Nonando onkalo yomalundilo goku dhipaga aantu nuuzigo mOnayena gali gafa taga polo, omipopyo dholudhi ndika odha tameke ishewe.

Kansela gwOnayena okwa ulike omaipulo ge kegaluko lyombepo ndjika hayi piyaganeke onkala mOnayena.

Kansela Iyambo Indongo okwa li a yelitha moshigongi shoka shali sha ningwa pOnayena sha  ningilwa mongeleka moka aakwashigwana yomoshikandjohogololo yali ya gongala a ti oshikandjohogololo  she oshina uudhigu sho tamu lopotwa anuwa egandjo lyuuzigo lyi indjipala mokati kaantu yaamoka.

Oshinima shino shuuzigo osha lopotwa shi indjipala unene puundingosho mboka wuli puNakuleka  momukunda Oniiwe. Yamwe yomaakalimo yomomukunda moka oya holola kutya momukunda gwawo muka omwa lopotwa onkalo yaantu taya gandja uuzigo, nongaashingeyi otaku fofodholwa kutya mboka ya konekiwa ya pewa uuzigo no yasa oyeli yatatu yopomudhingoloko ngoka.

Omukalelipo gwamwene  gwomukunda Oniiwe B, Silas Namugongo okwali a yelitha kutya oshinima shino osha kala tashi inyenge momukunda moka , naakwashigwana sigo yalulilwa. “Aanamukunda oyali ya lulilwa konkalo ndjika noyali ya tokola opo yaye kopolisi yo ya ka hokolole shoka tashi inyenge momukunda gwawo, oyali ya lombwele opolisi omakemo gwawo, taya indile opolisi yi yemo moshinima shika, tse ongaanamukunda otwa lulilwa sho tatu kanitha aantu yoshigwana shetu notwa pumbwa oshinima shika  shi hulithwepo,” Namugongo ta ti.

Aanamukunda mbaka oyali ya ningi etokolo konima yiiwike iyali opo ya pate okandunda hoka taku fekelwa kutya oko ta ka eta uupyakadhi pomudhingoloko mpoka. Ta ti oshinima shika oyeshi tula momake gopolisi yo yi tale kutya otayi ungaunga nasho ngiini. Okwa pula woo aantu yomukunda gwe opo ngele ndhoka tadhi popiwa odho shili ku kale kwa hulithwapo ayihe mbyoka iiwinayi tayi teyapo oshigwana.

Kansela Iyambo okwali a ti oshinima shino otashi teyapo oshigwana. “iiningwanima mbika yuuzigo otayi ende tatyi indjipala, nolundji aakwashigwana otaya lopota iinima mbyo kombelewa yetu, otandi indile kehe ngoka ena omiti dhe dhuuzigo na kale edhi ekelahi ye edhi shune mpoka edhi kuthile, aantu oyepangelo oonkalamwenyo dhawo inadhi pumbwa okuhulithwapo nomikalo dhuuzigo, onda yemata shili oku uva oshikandjohogololo shina aantu taya gandja uuzigo,” Iyambo ta gwedhapo ngaaka.

 

LEAVE A REPLY

Please enter your comment!
Please enter your name here