Oka kadhona komoshilongo kasindana iikoloni oyindji moTurkey

0
330

Windhoek

Oka kadhona okaNamibia nokeli dhingi mokweenda, Rachel Mengela, 24, osho kasindana iikoloni oyindji pethimbo lyethigathano noshituthi sho Future Fashion Faces World (FFFW), shoka shali shaningwa mo Antalya, Turkey. Rachel oye gumwe gwomaakadhona dhingi mboka yali ya mono ompito ombwaanawa yokukalela po Namibia methigathano lya tya ngeyika, nokwali ayi methigathano naakadhona yaadha po 56 okuza kiilongo ya yoolokathana.

Nonando shika kashishi oshikando shotango Rachel ta sindana oshikoloni pondje yoshilongo, shika otashi holola kutya ye okwa tula Namibia pomuthika ngoka guli ponkatu yopombanda, okusindana ongokakadhona dhingi mokweenda nawa, okakadhona dhingi koopala muumbulukweya wokuyogitha omeya, okakadhona dhingi muAfrica, Face of Sevil ERHAN naMiss DMD Estetik, muusiku ashike wume.

Kakele kwaashoka, Rachel okwa mono ishewe ompito ombwaanawa yiilonga oku kala onga oye oshipala shehangano lyo Sevil ERHAN Houte Couture Company no DMD Estetik. Shika otashi ti Rachel ota kala noku enda ta talelepo iilongo muuyuni, noku ulika nokutseyitha iizalomwa niilonga yomahangano ogo tuu ngaka. “Ondapandula shinene noonkondo adhihe, ishewe ka kwali ndeshi tegelela okukala ongame omusindani gwiikoloni oyindji. Ondjodhi yandje osho ya ningi yoshili ndjoka nda za handi yaguma okuza manga ndali omushona,” Rachel ta ti ngaaka.

Okwa gwedha po ta ti shika osho shali oshikando she oshititatu ta ende pondje yoshilongo, okuza omvula yazako, mwa kwatelwa sho ye ali omukadhona eli mongundu yaantu yatano methigathano lyo Top World Model mo Rome, naashi oye ali Miss Press Princess koMiss Tourism Queen International muChina.

Okwa kumagitha opo uukadhona mboka uushona wuna ohokwe yoku enda opo wiitule miilonga yawo, yo yadhiginine iitalenti yawo oshoka omagano gaKalunga. Okwa hala ishewe opo a ka kuthe ombinga muMiss Namibia, omvula ndjika.

 

 

 

LEAVE A REPLY

Please enter your comment!
Please enter your name here