Ombaanga yoFNB tayi fala omayakulo koshigwana

0
251

 

 

ONAYENA – Ombaanga yOtango yOpashigwana oyali ya adha gamwe gomomauvaneko gawo, sho yali ya tokola opo yi fale omayakulo koshigwana yo yi tetule oondjila dhaayakulwa yawo, mboka ya hala omayakulo geli popepi.

Omuwiliki goshitayi mbaanga shika mOndangwa Sylvia Muashekele okwa li a tseyitha ndhika oshiwike sha ziko. Ombaanga ndjika yotango yopashigwana oyali ya ningi omathaaneko opo yi fale eshina lyokunana iimaliwa koshikandjohogololo Onayena, eshina ndyoka tali kalapo okuza etitano lyomasiku 18-30 Maalitsa nuumvo.

Muashekele okwa ti elalakano lyawo oya hala ya tale kutya pomudhingoloko mpoka opuna aayakulwa yawo yangapi, nongele oya mono kutya aantu oyendji ohaya longitha omayakulo gawo opuna ompito eshina ndyoka li ka kalelele, ko ku ke etwe ombaanga monakuyiwa.

“Ohatu mono omapulo ogendji okuza koshikandjohogololo shoka opo tu etepo eshina lyokunana iimaliwa, no twali twa tokola opo tu faleko ndyoka lyopakathimbo manga tse tu tale aayakulwa yetu ngele otaya gandja omukumo omwaanawa no tagu hokitha, komeho onatu ka etepo nombaanga,” Muashekele ta uvaneke. a tsikileko ta ti manga inaaya tota ombaanga nenge ya fale eshina lyokunana iimaliwa ohaya tala tango komwaalu ngoka guli poshitopolwa shontumba, nongele ohaya longitha ngaa omayakulo goFNB, shono tashi gandja ethano kutya monakuyiwa ngele pehala mpoka opwa ka tulwa ombaanga otashi kala sha eta uuwanawa no tashi fupipike oondjila dhaakwashigwana naayakulwa yombaanga ndjoka.

Muashekele okwa indile opo ayehe yopomudhingoloko oshowo yopuushiinda ya longithe omayakulo manga opo kaaya ethe ompito, yo ya gandje omukumo koFNB opo monakuyiwa ya etelwe ombaanga moshikandjohogololo, yo yi tetule oondjila dhawo.

“Enenedhiladhilo lyetu otwa hala tu ete omayakulo popepi noshigwana yo aantu yetu ya kale taya longo nuupu,tango ohatu tala omwaalu gwaantu, oshinano okuza pombaanga onene okuya kehala hoka oshowo omahumokomeho ngoka taga inyenge momudhingoloko moka, nena ngele ehala lyontumba otali endele pamwe nethimbo oshowo omahumokomeho shino otashi tu tsu omukumo tse tu vule tu etepo okatayi ketu nenge eshina lyokunana iimaliwa,” ta gwedhapo ngaaka.

Ta tsikileko ta ti shino oyeshi ningi nelalakano opo ya tale ngele oye namo ngaa aayakulwa moshikandjohogololo moka. Ta pula aakwashigwana ya longithe omayakulo goFNB manga ye etelwa eshina popepi, noondjila oonde odha tetulwa.

Aakalimo yomomudhingoloko oyali ya taambako omayakulo ngaka nenyanyu, taya ti oondjila dhawo odha tetulwa. Taya popi kutya ngaashingeyi oshihwepo oshoka ethimbo limwe ohaya ende oondjila ta ya yi kOndangwa ashike sho taya ka thika hoka uuATM itawu longo, dho oombaanga otadhi adhika dha pata.

 

 

LEAVE A REPLY

Please enter your comment!
Please enter your name here