Oshikalimo shoMASTER of Success otashi monika mointanet

0
368

 

Aaholi naalanduli yopolohalama yomoTiivii yedhina Master of Success ndjoka ya li ya kwashilipalekwa ku MTC Namibia  oya li ya hala ndjika yi tsikile konima ndjika sho ya li ya thiki pehulilo omumvo gwayi.

Aalanduli yopolohalam ndjika otaya vulu ngashingeyi oku tala ishewe omahokololo gaakuthimbinga mundjika pethimbo ndyoka ya hala. Shika otashi vulika konima sho MTC a tseyitha kutya uuvideo mboka wa thanekelwe pethimbo aakuthimbinga ye li omulongo ya li ya hokolola omahokololo gawo, otawu monika ngashingeyi pehala lyo MTC ko You Tube . MTC okwa ti uuvideo mbuka wuule wethimbo lyotundi yimwe kehe kamwe otawu vulu okumonika komukwashigwana kehe.

MTC okwa tsikile a ti shika osha ningwa opo oshigwana shoka sha li inaa shi mona ompito okukala pomahokololo ngaka nenge okuga tala koTiivii shi vule wo oku ga tala noku ga pulakena opo ya mone enwethemo oshowo ekumiko okuza kaantu mboka ya hokolola nkene yaadha omasindano ngoka moonkalamwenyo dhawo.

Ethimbo lyomahokololo ndika lya li lya kwatelwa komeho komutseyimpango oshowo omunuunongo wokupopya motiivii, Jossy Nghipandua, olya li lya lundulula okutala otiivii kongulohi pethimbo omahokololo ngaka gali natango taga ningwa. Omahokololo ngaka oga li haga ningwa esiku lya hugunina kehe lyomwedhi go ta ga ka endululwa moNBC Tv mOsoondaha konima shondjika ya ningilwa  mo NTN.Omusholondondo gwaaithanwa mboka ya hokololele omahokololo gawo ge sindano otaga landula nonando ina ga shangwa melandulathano lyomukalo gwontumba nenge palandulathano lyopohalama.

  1. Monica Geingos – omunangeshefa oshowo Omukulukadhi gwOtango gwa Namibia.

Jomo Sono                  – omudhanitanga paithano nale oshowo omunangeshefa namwene gwospana yo Jomo Cosmos FC

  1. Ally Angula           – omunangeshefa omuNamibia
  2. Sisa Namandje – omutseyiveta a tseyika nawa  namwene gwofeema yaatseiyiveta.
  3. Mzwakhe Mbuli         – Omuhikingalo omuSouth Africa oshowo omuhokololi guutewo kaakunawe.
  4. Quinton Van Rooyen – Omuwiliki gwongundu yo TrustCo..
  5. Nkem Owoh           – Omunyandi gwiinyandwa omuNigeria nomuningi gwiiyolitha.
  6. Bonang Matheba – Omupopi kotiivi , oradio oshowo omunangeshefa omuSouth Africa
  7. Patience Ozokwor – omudhani gwiinyandwa nookino omuNigeria.
  8. Sandile Khubeka – Ondohotola oshona moomvula oSouth Africa.

 

Tim Ekandjo okwa ti nando Afrika oha talelwa methano ewinayi unene kuuyuni wopondje noku za koombinga dhimwe dhenenevi, mu ye omuna aantu ye na omahokololo taga kumike ngoka tatu vulu okusimaneka noku tyapula oshowo oku ga topolelathana, nopolohalama ndjika oya li ta yi lalakanene okwaadha oshinima shika.Naashika osha pe aaNamibia ompito oku ya mekwatathano naantu mbaka ha ye ya nwethamo noku ya tsa omukumo. MTC Namibia okwa tulile miilonga opolohalama ndjika yo Master of Success  momasiku 13 Febuluali 2015, Ndjika oya li opolohalama yoku nwethamo opo yi nwethemo aaNamibia ayehe yopomithika dhiili nodhiili moku ya etela aanamadhina miimpungu ya yooloka mboka ya za mevi lyOmapenda oshowo palwe menenevi, opo mbaka ya kwatathane nayo.

 

 

LEAVE A REPLY

Please enter your comment!
Please enter your name here