Peter Ondume yomomufitu: Okuya ko Republika yaNdowishi lyUudemokoli

0
336
Peter Jungle Fighter

 

Mu Juli 1988 Hailwa Shikongo okwa lombwele ndje kutya otandi ka tuminwa ko Europa oku ka dheulilwa uuwiliki ndele ina popya kutya otandi ka tuminwa koshilongo shini. Ngaashi sha kala omukalondjigilile onda konakonwa paunamiti ku talike kutya ondina uukolele wu li ngiini. Konima sho omakonakono ngaka ga ulike ge li nawa, ngame opamwe nayakwetu omulongo ya za poombelewa oonene dhopashitopolwa dhoPLAN otwa yi koLuanda twa falwa komahauto ge li omulongo ga humbata aakwiita omilonge ne.

Olweendo okuya koLuanda olwe tu kutha omasiku gatatu. Otwa pitile moLobito notwa ende kashona ngaaka molwashoka omahauto oga kala taga teka mondjila noshikwawo otwa li ishewe twa kotoka oshoka momudhingoloko ngoka omwa kala muna oobandite dha UNITA.

Omondjila tuu ndjika yu uka koLuanda omalugodhi omalulu ga li ga kondjwa pokati koPLAN naUNITA unene tuu pomukunda gwedhina Eendede. Utya aakwiita yoPLAN oya kala haya patolola ondjila ndjika ayihe yopokati koLuanda noLubango oku yi gamena ku UNITA opo kaa ponokele iiyenditho yaakwiita oshowo yaakwashigwana. Ondjila ndjika oya li ya simana oshoka omo mwa li hamu endele iipumbiwa yoPLAN. Onkene ndjika oya li hayi gamenwa koPLAN oshowo ketanga lyegameno lyaAngola. Sho twa piti pEendede otwa mono iitekela iihauto ya pyapo oshowo nkene ondjila ya ehamekwa pehala mpoka.

Sho twa thiki moLuanda otwa falwa kokamba yokutegelela moka twa kala twa tegelela oku ya koGDR. Mokamba ndjoka otwa pewa ootenda moka tatu kala hatu lala oshowo omakumbatha. Otwa kala mo Luanda uule womwedhi gumwe twa tegelela okuya. Pethimbo twa kala moka otwa li twa tyapula onkalo ndjoka ompe ethimbo olindji otwa kala tatu nu omalovu tse tatu helula ooskepa metuliloskepa, oshikwawo otwa li wo hatu opaleke okamba yetu ndjika. Omukuluntu gokamba okwa li a si oshimpwiyu kutya otuna iikutu ya gwana okuzala.

Omathimbo gamwe otwa li hatu falwa komangandjina giinima hoka hatu pewa omashako muna iikutu ya zalwa nale, mbika yimwe otwa li hatu yi landitha po kaakalimo yomoLuanda opo tu imonene iimaliwa tu lande shoka twa pumbwa ngaashi iinima yilwe wo tse tatu gwedha po wo omalovu. Pethimbo ndika otwa li tu uvite twa yalulwa molwashoka osho shotango nkene nda joinine iita yemanguluko tandi li olusitati esiku kehe. Otwa kala wo hatu nyanyudhwa kaahikingalo yongundu yoNdilimani, ndjoka ya li yi holike mookamba dhoSWAPO.

Manga tuli mokamba ndjoka yokutegelela okuya, Hailwa Katamila okwe tu enditha po melongo lyopolitika okutu longekidha omanga inaa tu ya ko GDR.

Petameko lyaSeptemba 1988 otwa thigi po Luanda nondhila yiilonga yomombepo yaSoviet Union pethimbo ndiyaka okuya koBerlin oshilandopangelo shaGDR. Okuza moBerlin otwa falwa kenongelo lyo Political Science lyaRostock hoka twa kala tatu longwa uule woomwedhi omulongo. Osikola ndjika oya li kohi yongundu yopolitika yo Socialist Party ya Ndowishi, ndjoka yetu kwathele unene omanga twa li tatu ilongo hoka.

Iilonga yosikola oya li oyindji noya li eshongo enene koyendji yomutse aalongwa unene tuu mboka twali inaatu ya kokule nosikola yopevi nenge nosikola yoyene yene. Opo tu taaguluke eshongo ndika otwa tungupo uungundu woku ilonga opo tu kwathele oohailwa mboka ya li inaaya uvako nawa shoka sha longwa pethimbo lyootundi moklassa. Oyendji yomoohailwa mokati kongundu yaalongwa omilongo 25 oya adhika ashike opo ya zi kehala lyolugodhi, nontseyo ndjoka ya li yena oondjoka yokukommanda aakwiita molugodhi ndele haku iilonga omambo guufilosofi oshowo ngoka gopamahupilo. Otwa li hatu longwa omasiku gaheyali moshiwike oshoka moGDR kamwali Osoondaha oshilongo pethimbo ndyoka oshali kohi yepangelo lyUukommunisi. Konima yokulongwa uule woomwedhi ntano otwa li twa falwa moshilando nokomahala gamwe okupopya naakwashigwana oku yuuvithako ekondjo lyetu opo mbaka ya vule okutu kwatha nakehe shoka taya vulu oku kwatha nasho. Omathimbo gamwe otwa li twa falwa oku ka popitha aaniilonga oshowo aanasikola ongoshitopolwa shedheulo lyetu lyuuwiliki oshowo okuuvithako oshigwana opo shi kwathe ekondjelomanguluko lyaaNamibia. Oshigwana shoka twa popitha osha li sha pewa ompito okupula omapulo kombinga yaNamibia noonzo dhe.

Omathimbo nomathimbo otwa li wo twa mono ompito okutalelapo oosikola dhoshikunino moka mwali tamu longwa aanona yoSWAPO moGDR ayihe. Pethimbo lyomatalelopo ngaashi ndyoka otwa li hatu longo aanona elongo lyopolitika yaNamibia nonkene aakwiita yoPLAN ya hanyeka iita yemanguluko meni lyoshilongo.

Oshilongwa shimwe sha li tashi hili ooshoka tashi popi kombinga yedhiminathanepo. Moka otwi ilongo esimano lyokudhiminathanapo konima sho oshigwana sha li sha topagulwa kiita, nuuwanawa mboka tawu zi medhiminathanepo. Omulongi gwetu okwe tu longo kutya nonando oshidhigu oku eta oongundu dha li tadhi kondjithathana pamwe, osha simana okushininga opo oshilongo shi kaleke po ombili molweyokomeho pamahupilo. Otwa li wo twa lombwelwa kutya edhiminathanopo otali keelele iita yopashigwana ngele ndik1a olya longithwa nawa.

Endjangumuko olya li wo oshitopolwa shelongo lyetu, onkene uuna ndoka twali inaatu ipyakidhila otwa li hatu dhana etanga lyokoompadhi, lyokomake oshowo lyomokambamba nenge hatu matuka ta tu dhingoloka okapale kuudhano. Molwashoka osikola oya li yi na aalongwa ya za komahangao gayooloka nokoongundu dhopolitika muuyuni auhe otwa li twa vulu oku kwatathana naalongwa ooyakwetu mbaka noku ilonga onkalo yawo yopapolitika  oshowo omashongo gopankalathano ngoka yo ya li ya taalela. Petameko lya Mai 1989 manga twa li pokumana eilongo lyetu tu shune koAngola otwa li twa tseyithilwa kombinga yoonkundathana okutula miilonga okatokolitho 435 kIigwana Hangano. Okuuka pehulilo lyaMai 1989 otwa lombwelwa pambelewa kutya iilyo yimwe yoSWAPO oya thika moNamibia okuza koZambia  nAngola oku ka longekidha etulo miilonga lyokatokolitho 435  kIigwana Hangano, hoka taka fala momahogololo mewiliko lyIigwana Hangano. Otwa li wo twa tseyithilwa ethimbo ndyoka kutya otatu zi moGDR tu ukilila koNamibia, no itaatu pitile moAngola.Onkundana ndjika oya taambiwako nomaiyuvo ga yooloka mokati ketu aailongi. Yamwe yomutse otwa tindi oku ya tu ukilila koNamibia. Otwa tindi oku vulika kelombwelo ndyoka oshoka otwa li tu uvite twa landithwapo. Otwa lombwele omukalelipo go SWAPO moBerlin opo a tseyithile ewiliko kutya tse itatu iyutha kelombwelo ndyoka. Oshinima shika osha li she tu topola pakathimbo moongundu mbali yimwe oyaamboka ya hala okuvulika kelombwelo lyongundu nonkwawo oyetu mboka twa tindi oku vulika kulyo otundji mboka twa tindi okutuka tu ukilila koVenduka oomboka twa longa ethimbo komahala golugodhi. Onkene oSWAPO oya ka tuma osheendo oku ya shi tu itaalithe kutya oshi li nawa okutuka tu ukilila koVenduka pwaa na uumbanda washa. Oohailwa oye ya ye na nuuvidio  okuulika oohailwa mboka ya thika nale kegumbo.Konima yoku yelithilwa nawa nawa otwa ka zimina okuya kegumbo oku ziilila moGDR. Ngame onda li ndu uvite kutya oku galukila kegumbo osha nika oshiponga kungame  oshoka omutondi ota ka kala a hala okukwata ndje  ishewe konima sho ndali ndi iyaka  mondholongo yawo momasiku 30 Kotoba 1986.Molwashoka okushuna kegumbo okwa li taku longekidhwa kIigwana Hangano osha li sha kwata ethimbo ele kashona  opo tu thigepo GDR oku ya koVenduka. Opo momasiku 27ga Juli 1989 otwa thigipo GDR nokuthika moVenduka esiku lya landula pokapale ngashingeyi kopaigwana kaHosea Kutako.

 

 

 

 

 

 

 

 

 

 

 

 

 

 

LEAVE A REPLY

Please enter your comment!
Please enter your name here