Alweendo a hala epangelo li kwatele komeho melunduluko lyomahupilo

0
217

 

WINDHOEK –Minista yOmathaneko gOmahupilo nOmuwiliki Ndjai mOmathaneko gOpashigwana okwa ti Evi lyOmapenda otali vulu ashike okutaaguluka omashongo geyokomeho uuna epangelo olyo lya kwatela komeho oshinima shika lyo ishewe otali shi ningi pamwe nelunduluko momukalo gwewiliko.

Tom Alweendo okwa ti osha pumbiwa opo pu kale elunduluko lyaza komidhi dhomahupilo goshilongo, a ti ndika olina okukala tali gumu omikanka ndele kali shi ashike elunduluko moku inyengitha kashona mpaka oshowo mpeyaka.

Ndhika omunani gwOmathaneko gOmahupilo Neyokomeho lyaNamibia okwe dhi popi pethimbo ta popile omutengenekwa mwaalu gwiimaliwa yooN$216 oomilliona mbyoka ya pumbiwa kOshikondo she mOmutumba gOpashigwana omasiku ngaka.

Okwa ti ondjila yokulundulula omuhingo gwomahupilo oya kitakana no ya pumbwa omathaneko geyokomeho ga kale taga vulu oku landula omalunduluko moshitopolwa shomahupilo ngoka taga ningwa esiku kehe oshowo omudhingoloko gwethigathano momahupilo muuyuni.

Okwa ti ngele opena etsokumwe kombinga yosheetwapo she shika, nena oholomende oyi na oku kala noshinakugwanithwa oshinene melunduluko lyatsa kesipa. Alweendo okwi itaala kutya inashi gwana ashike ngele epangelo otali etapo nokalekapo onkalo ombwaanawa  kaanangeshefa opuwo.

“Otushishi kutya eitaalo lyongashingeyi kombinga yeyokomeho momahupilo  oondika kutya okuhuma pamahupilo otaku vulu okuningwa ashike uuna oshilongo sha landula omulandu gwomahupilo ga manguluka. Nguka otagu utha kutya epangelo  olina okukala ashike noshinakugwanithwa oshishona mehumokomeho pamahupilo lyo tali ethelepo oshikondo shopaumwene osho shi itsike omutenge nguka’ Alweendo a ulike.

Okwa ti “edhiladhilo ndika olya tungilwa keitaalo kutya epangelo olundji kali na uunongo nontseyo ya gwana okuninga omatokolo omawanawa kombinga yuunangeshefa” Okwa ti shika otashi ti epangelo itali vulu okumona oompito dhomangeshefelo ndhoka tadhi vulu okuya mesindano nomeyokomeho nawa.

“ Ohaku popiwa kutya  molwashoka oongeshefa otadhi kongo oprofita, oongeshefa dhopaumwene odho aluhe dhina  ontseyo ohwepo onkene odhowo tadhi vulu okuninga omatokolo omahwepo gopangeshefa” Alweendo  okwa gwedhapo a ti opo omupopyo nguka gu popilwe, omathaneko nomatokolo ngoka geli muuwanawa woongeshefa oge li wo muuwanawa womahupilo noshowo mwaamboka woshigwana ashihe.

Onkene ye okwi itaala kutya okushitalela melunduluko lyomahupilo goshilongo itashi kala oshiwanawa okuthiga ngaka miikaha yomulandu gwomahupilo gamanguluka ogo aguke ndele eta ku tegelelwa eyokomeho ndyoka twa hala li hilokepo.

“Shoka twa pumbwa osho ekwatelokomeho lyEpangelo meyokomeho lyopamahupilo, moka oholomende ta yi longo oshindji shapitilila pwaashoka ashike shoku kalekapo onkalo ombwaanawa yo opalela oshikondo shopaumwene’ Okwa ti shika itashi ti epangelo olya hala okuninapo oshikondo shopaumwene ando pu kale oshikondo shoshigwana osho tashi pangele ashike, aawe.

“Shoka  tse ta tu uvitha ooshika kutya otwa hala okuulika nokutya eitaalo ndyoka tali ti oshikondo shopaumwene osho ashike tashi vulu okutothamo aasindani, kashina omakankameno ga kola. Ishewe otatu ti epangelo uuna tali kongo aasindani momahupilo ohali vulu okundopa mwaashoka uuna lyo tali shi ningi”.

Okwa popi wo kutya “Opena iiholelwa moka omapangelo muuyuni auhe ga ndopa okutungapo aasindani momahupilo ngaashi ashike wo iiholelwa yendopo lyoshikondo shopaumwene okukalekapo aasindani momahupilo.”

Alweendo okwa ti shoka epangelo lya pumbwa opo li konge aasindani momahupilo okukala lyi ilongekidha oku iyutha konkalo uuna tali tula miilonga omulandu gwalyo gwokutungapo iikwafabulika.

Osha pumbiwa wo opo oshilongo shikale aluhe tashi upike omukalo gwasho gwokumona oompito oompe dhopamahupilo ndhoka tashi vulika mu ze ekoko lyomahupilo oshowo okweetapo oompito odhindji dhiilonga.

“Otwa pumbwa okunkondopeka elongelokumwe lyetu noshikondo shopaumwene, oshoka osha ulikwamo kutya uuna pena elongelokumwe lyatya ngaaka oshinima shoku mona aasindani metungepo lyomahupilo otashi kala oshipu noku adha esindano enene.”

Alweendo okwa ti oshapumbiwa wo okunkondopeka olutu lwomiyalu kokutya Namibia Statistics Agency opo nduka  lu vule okukoka noku adha omuthika gwakola mokuwilika iikwamiyalu. Okwa ti  uuna ehangano ndika lya kola  nena shika otashi kwashilipaleke kutya oshilongo otashi kala sha tonata  kombinga yokuyamukula koompumbwe dhe yokomeho opo ndhika dhi vule oku yamukulwa mbala nonawa.

“Oshinima oshikwawo  shasimana momathaneko geyokomeho ooshoka shoku landula nokutala nawa nkene iilonga nomathaneko ga tulwa miilonga oshowo emanitho lyago.

LEAVE A REPLY

Please enter your comment!
Please enter your name here