Oshiholelwa shaMedipark nashi landulwe

0
282

Oilonga ya longwa kOshipangelo sha Medipark mewiliko lOmundohotola Tshali Iithete oya pumbwa okufimanekwa.

Oilonga oyo ota i ulike ashike kutya oshikondo noilonga youhaku moNamibia kai li vali apa yali eedula omulongo ile nhano da djako ashike oshilongo opo osha katuka po.

Oshipangelo sha Medipark onghee hano osha pumbwa oku tumbalekelwa oilonga oyo sha longa nosha ninga omutoti nomuningi wondjokonona ngeenge osheya petwiko loitiyanafiyo.

Monakudiwa ovaNamibia vahapu ova kala nokumona oixuna, nokuenda eendjila dile tava kongo omakwafo opaunamiti, shaashi moshilongo ina mu kala muna oondohotola vapyokoka, navali nande nee ngeno omuuye ovo va pyokoka, oshilongo ina shi kala shina omashina opautekinology oku kwafa momatando manene, sho vali ina shi kala shina eenhele dokuvelukila nodoku tandela ovanhu ava.

Paife ngaha, Medipark okwa konda vahapu omaulu. Monale keshe umwe okwa finda ashike koCape Town. Oshipangelo shaMedipark oshipangelo shopaumwene shili, ashike osha pumbwa okunghonopalekwa, shidulife oku ya koCape Town.

Sha kala ko nokuli etando lomutima li ningilwe moNamibia. Oipangelo ikwao yopaumwene, imwe oye ya nale, oko ngaho na i tale oko. Iha, kale ashike yeli tula mokutala oshimaliwa osho tashi yapo meendelelo, nokutuma tuma alushe ovanhu koSouth Africa yo ita i ya po nomapekapeko oku yambula po oipangelo, osho ita shi yandje ashike efano liwa koshipangelo ndele nokoshilongo, ashishe, nokupupaleka, nokukaleka po eemwenyo doshiwana.

Eyambidido, meyukililo ile kalishi meyukulilo tali pewa oipangelo ngaashi sha Medipark ina li kala ashike pashimaliwa ile pamashina, nashikale yoo sha kwatela mo okuxumifa komesho eenghatu dovanhu melongo. Hano oku kwafela oondohotola ovo va pumbwa omakwafo veke li wedele ko opo oshilongo shikale shina ovatandi va pyokoka momaifano opaundohotola ile opaunamiti a yooloko.

Ofikola younamiti yo University yopombada ya Unam oyo tai pitifa oondohotola votetetete moshilongo nayo oya pumbwa okunghonopalekwa, iha kale ashike tai longo ovanhu oundohotola wopetameko ashike ovanhu nave li wedele ko.

Omupresident waNamibia okwa ingida oshinima shoHarambee, Harambee na kale yoo melongo, nomouhaku. Sha hala kutya pefimbo loku longekida oimaliwa oyo hai tukulilwa oikondo yopapangelo hano o budget, nali tule oshimaliwa pomunghulo shokutota oshipangelo shofikola younamiti yoUniversity ya Namibia.

Ngee owa tale oyo ya putuka mounyuni, moipangelo yoiputudilo yopombada omo hamu ningilwa eendjokonona dihapu ngeenge osheya pomapekapeko opaunamiti.

Omolwaasho sha fimana opo Namibia naye a kale ena oshipangelo shofikola yopaunamiti shina oikwa noipangifo yeli xwapo opo i hafife nokuhokwifa oondohotola ile ovalongi tava di pondje yoshilongo tave uya okulonga moNamibia.

Kakele kwaasho, Namibia okuna yoo ookapyoko, vena eshivo mouhaku, ovo navo va pumbwa yoo okuliyambela oshiwana noku yandja eshiivo lavo kwaavo tave li longele ounamiti, opo ku shilipalekwe kutya eshivo olo li li moshilongo ina li xulila ashike muvo ashike ola tambekidwafana, oku ya komapupi okomesho.

Vamwe shiimba kavali naanaa vena elao, shaashi ina va dula naanaa okulonga ashishe osho veshi longela moshilongo molwaasho pehena oikwa noipangififo ya wana, shike natango otava dulu okunyumuna po eendjodi daava, paku yandja eshivo lavo koshiwana shokomongula osho tashi ka kala tashi endifa nawa oinima, shaashi onghalo paife oya yuka kouwa.

Pandu pandu kuMedipark, paife oshiwana oshi wete okauyelele, nelineekelo lasho ola nyumunwa.

LEAVE A REPLY

Please enter your comment!
Please enter your name here