Osipana yoVolcano otayi pula komeho nomaudhano

0
306

 

ONIIPA – Osipana yoVolcano otayi kambadhala no ku humitha komeho omaudhano momikunda. Osipana ndjika oya totelwepo mo 1991 , sho  aagundjuka mOniipa yi imanga kumwe nokutokola opo ya totepo ospana yawo yetanga lyokoompadhi.

Omupresidente gwoVolcano Herman Amukugo okwa ti ohaya kwathele unene momudhingoloko ongele omoku opaleka ondoolopa, okulongekidha esiku lyomainyanyudho gowina mono aanyasha ha ya hangana , oshowo okutopolelathana uuyelele nkene ye na okuhumitha komeho omaudhano moshikandjohogololo oshowo moshitopolwa shaShikoto.

Amukugo ota ti osipana ye pamwe newiliko lyawo oshowo aadhani oyena ekwatathano ewanawa nongele pwa holoka sha oha ya kuutumba etaya kandulapo omukundu ngoka gu lipo okupitila moonkundathana.

Okwa ti aadhani oyena woo omikalo nolundji oha ye shi holola momaudhano moka ha ya kuthombinga.

Amushanga gospana ndjika Helena Nangombe okwe shi yelitha nawa kutya Volcano oyali ya totwapo nelalakano opo aagundjuka momudhingoloko gwOniipa, ya kale ta ya hangana , noku kutha ombinga momaudhano ga yooloka.

Nangombe okwa ti osipana ndjika otayi shi enditha nawa, nohayi dhana medhingoloko etiyali moliha yOshikoto. “Otwa sindana omakopi ogendji momaudhano ngono ha ga unganekwa moshitopolwa oshowo kondje yoshitopolwa okutameka sho ya totwapo,” Nangombe  ta ti .

Metine lyoshiwike sha ziko aadhani oshowo ewiliko lyospana ndjika oyali ya gongala posasiona yomahooli pOniipa opo ya taambeko omagano gawo ngono ya pewa kaasihenda. Osipana oyali ya pewa omizalo omipe dhuudhano ndhono taya kala ta ya longitha pethimbo lyomaudhano, omizalo ndhoka odha yooloka nodhili pamihingo ndatu.

King Service Station yimwe yomoosasiona ndhoka dhili mewiliko lya Uncle Willy Van Zyl, oyali ya gandja omagano ngaka kospana ndjika yo yi tale kutya ota ye dhi zala ngiini. Pethimbo Van Zyl ta gandja omagano ngaka oyali ya uvaneke taya gandja oshimaliwa shomayovi ethele muule woomwedhi 12, shono tashi eta opo ya kale taya gandja ko omayovi gahetatu omwedhi kehe opo anuwa sho tashi katya muDesemba iimaliwa ayihe oya pwa okugandjwa.

Van Zyl ta gwedhapo kutya shino oye shi ningi nelalakano lyokugandja sha moshigwana shono hashi ya yambidhidha unene ethimbo alihe, noya hala aagundjuka yi itulemo mwaayihe ya pamba omaudhano, yo taya kala yena ohokwe yomaudhano.

Nangombe okwa pandula pehala lyaadhani ta ti Omupresidente gwawo Amukugo aluhe ohu ulike eitulomo lye mospana ndjika noha gandja aluhe omayambidhidho nomakwatho ngoka ospana ya pumbwa.

LEAVE A REPLY

Please enter your comment!
Please enter your name here