Peter Ondume yomomufitu: Okuthika mEvi lyOmapenda

0
445
Peter Jungle Fighter

 

Otse mbaka mpaka! Mbala otwa li ishewe twa mono nkene onkatu yimwe ya katukwa moonkalamwenyo dhetu sho aayambidhidhi yoSWAPO omayovi yetu taamba nesimaneko lyomapenda.Mbaka oya li ya thikama momikweyo sho yetu tsakaneke. Manga ondhila yetu yoludhi lwoAirbus ya kuluka okulambela pokapale, otwa li tuna omaipulo7 molwashoka ka twali tu shi shoka shetu tegelela pevi.

Sho ondhila ya lambele, ngame onda mono iilyo yetanga lyopolisi ya zala omizalo dha yo dhiilonga ya thikama momudhingoloko gwokapale. Ondi ipopile pungame mwene ndati iilyo yetanga lyopolisi yegameno mbika ngiika oyili pokapale nelalakano okutongololamo mboka yo ta yi kongo nangame nda kwatelwa mo. Omanga tandi londoloka mondhila onda mono aantu oyendji ya zala omalwaala goSWAPO yo taya dhugadhuga omapandela goSWAPO. Oshinima shika osha pendje omukumo nosha kuthapo uutile wokwaana egameno mboka ndali ndi uvite. Uutile owa kanapo ishewe thiluthilu sho aawiliki yamwe ye ya kondhila okutu tsakaneka noku tu kwashilipaleka kutya kehe shimwe nenge kutya onkalo yegameno oya silwoshimpwiyu no yi li metonatelo.

Okuza mondhila otwa yi metungo lyopokapale oku ka tegelela omitsalo dhetu omanga inaatu ya koombesa ndhoka dha li dhetu tegelela mehalandjandja moka hamu thikamekwa iiyenditho.Sho twa thigipo etungo otwa li tu uvite aantu taya imbi omaimbilo goSWAPO muule  noguuvitike, ku kehe ngoka  ali a hala okuga pulakena.

Ihe nando ongaaka otwa kala tuna omaipulo unene geetwa ke kalepo lyaapolisi yegameno mboka ya li momudhingoloko gwokapale.

Ihe sho twa mono noku uva aayambidhidhi yoSWAPO taya ligola taya danisa yo taya imbi ya yelutha epandela lyoSWAPO otwa koneke shili kutya onkalo oyi li metonatelo. Natango ekalepo lyaapolisi yegameno olyetu etele uumbanda oshowo omaipulo kutya ngaaka otwa tameke oku pula kutya etompelo olinipo lya tokolitha aawiliki yoSWAPO opo ya shaine ehulithopo lyomaumbathano nepangelo lyokatongo lya South Africa.Sho twa hedha popepi nongundu yaa yambidhidhi yo SWAPO yamwe yomwaambaka oye  tu kundukidha momwaalu omunene  ta ye tu tanga  sho inaa tu shuna monima ndele otwa tsikile okukondjitha epangelo lyonyanya  lyomukolonyeki sigo twa sindana.

Tse otwa li twa taambiwako ongo omapenda golela oshowo wo aasindani miita yekondjelomanguluko. Nonando otwa li tu shishi kutya okukondja ina ku hula natango molwashoka okwa li omahogololo geli komeho ngoka tse twali tuna oku ga longekidha oshowo oku uvithako aantu opo ya ka hogolole momahogololo gotango muNovemba 1989.

Konima yoku taambwa otwa londo moombesa noku falwa kehala lyokutaambwa lya li pondje yoVenduka.Ehala hoka twa falwa koombesa olyoDobra. Mpaka otwa ndhindhilikwa nokushangwa oshowo otwa pewa iilongitho ya pumbiwa ngaashi oombiga, omakumbatha, oosindo, uukopi, nuuyaha okulongitha paumwene.

Konima oohailwa yoSWAPO oye ke tu fala kehala lyiikalela opo ye ke tu lombwele nawa kombinga yonkalo yegameno oshowo yopolitika moshilongo. Mbaka oye tu kumagidha opo tu igamene tseyene oshowo tu iyageke okulongithwa kwaamboka ya li nelalakano okupukitha oshigwana kombinga yoSWAPO.

Oohailwa oye tu londodha nokutya natu iyageke nenge tu yande okukala pomahala gomanwino oshowo tu kotoke twa ende uusiku opo tu ikeelele okuponokelwa kwaamboka ya li ye na ondumbo noSWAPO.

Okwa li kwatalala sho twa thiki poDobra mesiku 28 Juli 1989, ihe kutse mboka opo twa zi ko Europa, onkalo yombepo ndjika kaya li unene ondhigu. Shoka sha li inaa shoopala mendiki lyokutaamba aagaluki ooshoka kutya onkalo yaamoka oya li yaashi ombwaanawa okuyeleka naahoka tse twali tatu zi.

Omuwiliki gwehala ndika okwe tu lombwele kutya natu kwatathane nomazimo getu , molwashoka otwa li owala twa pitikwa okukala mokamba ndjoka uule womasiku gaheyali. Onkene omaipulo ngoka twa kala tuna oongoka kutya otatu kwatathana ngiini naakwanezimo lyetu yamwe yomuyo ye li kokule kuumbanganlantu.

Katwali tu shi oonomola dhoongodhi dhawo nenge twa tseya kutya oye shi gamena peni, onkene eindilo ndika okuza komuwiliki gwokamba olya piyaganeke onkalo yetu. Ngame eindilo ndika onda ningi ashike ndafa inaandi li uva, oshoka kandali ndi ilongekidha oku ya konooli komukunda gwetu molwuumbanda kutya pamwe Du Plessis niilyo yoKoevoet mookamba dhomOngwediva nOshakatia ota ya ka endela ndje uusiku. Ihe mesiku etitatu sho twa kala mokamba omwamememati Justus Ekandjo ngoka a li ha longo moVenduka okwe ya pamwe naantu yamwe yopomukunda gwetu okutalela ndje po.Osha li ompito yenyanyu kaatalelipo oshowo kungame sho twa tsakanene ishewe konima yokukala kwandje omimvo 12 muundjendi pondje yoshilongo okuza tuu nkene nda yile muundjedni omumvo 1977. Atuhe otwa li twa pitwako kenyanyu omolwetsakaneno ndyoka.

Molwashoka kandali nda hala okuthigapo okamba mbala onde ya lombwele opo yi ile ndje konima yomasiku gane.Oya ka galuka konima yomasiku ngoka ya meneka no ya thiki lwopotundi ontimugoyi yongula. Ndele oya li yena okutegelela okathimbo oshoka onda li nda lombwelwa opo ndi tegelele omuntu gwontumba ta zi kombelewa yOmahogololo yoSWAPO moVenduka.Oohailwa mbaka ya zi kombelewa yongundu oya ka thika ashike potundi onti-11h30 lwaampoka. Oyi ile okutumona noku lombwela opo tu ki ilopote kombelewa yoSWAPO ongula yomasiku 5 Auguste 1989. Otwa thigipo ehala lyokamba noku ya nohauto kolukanda lwa Wanaheda moKatutura moka omwamememati a li ha rentinga ondunda yokukala.

Omwameme pamwe nookuume ke oshowo aashiinda komukunda gwetu kOwambo nale oye ya momiyalu ominene okutsakaneka ndje. Otwa popi nokuhapula, tse tatu yolo tse tatu nu oombiila sigo ngame onda vulwa okunwa.Esiku lya landula onda yi kombelewa yoSWAPO ngaashi nda indilwa ndi shi ninge. Pombelewa ondaadhapo Hailwa Festus Shikongo nayalwe mboka ya lombwele ndje kutya otandi tuminwa kuumbugantu woshilongo hoka kwali oohailwa yamwe taya ningi iikonga yoku uvithako aakwashigwana omahogololo.

Oohailwa oya ti molwashoka ongundu yetu opo ya zi koGDR komadheulo guuwiliki , otayi topolwa muungundu mboka tawu kuthombinga miikonga yomahogololo oshilongo ashihe. Ngame onda li nda lombwelwa kutya otandi tuminwa koLiindili koombelewa oonene dhomahogololo muumbugantu oku ka kwathela hailwa Idda Jimmy ngoka oye a li omutse gwombelewa ndjoka moshilando shoka. Iinakugwanithwa yetu oya li okuninga iikonga yomahogololo ya kwata miiti opo aakalimo yokomahala ngoka ya hogolole ongundu.Otwa li twa lombwelwa opo tu tegelele osheenditho okutu fala koLiindili.Ngame onda kala moVenduka sigo oshiwike oshitiyali shAuguste 1989 sho nda tokola oku ka talelapo aakuluntu yandje kegumbo omanga inaandi ya miilonga yokuhwahwameka aantu ya hogolole ongundu yetu momahogololo gaayehe muNovomba 1989.

Ndika olyo etalelopo lyandje lyotango  komukunda gwetu Omatando onomola 2 nkene nda galukile muundjendi. Pegumbo lyaakuluntu onda thikipo Osoondaha nda falwa ko kuTate Jacob omunangeshefa pOngwediva ye ishewe okwa li kuume kamumwamememati Justus.

LEAVE A REPLY

Please enter your comment!
Please enter your name here