TUYENI KOLUPALE LA TUYENI: Woo ovamati vopaife meme aiyee!!

0
506

 

Ounyuni wonale okwali muwa vakwetu oshili ta! Ngeenge ngo meumbo kwali mwa dalwa omumati efiku olo, ovaneumbo okwali hava kala vahafa shapitilila neenghuwilili datata daindula hashikala shidulife eshi mwa dalwa okakadona nokuli.

Omumatii-tii, ashivika nokokadila tena komoludi loofifi, oonakudala veli vavali okwali hava kala vahafa ngeenge veudite okaana kokamati taka kwena. Molwaashi okwali hava kala vewete kutya oluhepo meumbo lavo otali li xulu mo okudja pedalo lomumati oo.

Okwali nokuli hava tange oinhovele yavo ei tavati, omulumenhu oto ka fila mofuka ndele oto ka lika po keenghoshi ndele to ka ninga eedingu dookola nookaimbi. Eshi okwali have shiningi okuyadja omukumo nokutumbaleka oshinhovele shavo shomumati.

Manga inaatu ya moule woshipopiwa, onda hala ndimu lombwele kutya, ovamati ava vopaife itava ka fila vali mofuka ngaashi kwali hashi tongwa, ndele ava otava ka fila mee bar domalodu ndele tava ka ninga eedingu domapunyapunya noikulya yoo Kasitelo.
Omumati oye kwali Shikwetepo ngeenge eli meumbo, molwaashi okwa tya ngo aye kohambo oixuna, ilo ai koushimba omaliko apeshe opo, ndele oonakudala ta veende ne taveli popile, okwali nokuli hava longifa oshitya tashiti, mhhh okudala omumati mboli kashishi okamepo kokonima ta!

Oshili ounyuni wopaife novamati voshinanena, oshili ngeenge oto lipula nawa oto hale ashike okukwena ove to lipula ne onakudiwa eshi yali novamati vali voshili.

Ovamati vopaife umu tume kohambo, utya aka ndyeko eengobe doye ye talandifa afa talandifa omakunde. A ye nee koushimba aayee koko afila ne omututu. Oko ne ihakudi nee netumwalaka oko tali popi ngoo nee kutya okuli momwenyo ilo okwetufiyapo nale pamwe hano.

Omumati ta di koushimba ndele oikutu yaye ei adyala oyafa ashike ya taafinwa keengombe. Mutima utye napamwe omumwoye okwali nande omoshipangelo, aayee ekalata loshipangelo kenasha nee eli tali ulike kutya okwali meembete. Oshili otamu todifa nge oushimba vatekulu vange kwali ndahalako shili.

Eemata okakuva kehepo kaninge ashike nande omakonakono moshilandopangelo omo utale, ounona voumati vaoteka ooinakulu vati oo babe vavo paife kushi nee kutya omunhu okwa ya koushimba aka longa ilo okwa ka hombola vali okanhule manga.

Ndele vati omumhu nakale ne ta djuulukwa keumbo aka talelepo ye eshi eli koushimba okuliko a hombola,ovamati veedula dishona toshakene navo moVenduka omo, ndele okaana okakulupa koikolwifa ko taka ningi nee ombuvi yokuta omashina.
Ngheengo wadalelwe umone omunhu womumati ena omutala koushimba ye keumbo oku adja kena apa ha nangala ohai vali aka dike okatenda kova Chiina afa tai keenghali, oshili okuxuna komumati okudule ouvaya ngoo mboli ta.

Ovamati ava vomefimbo lopaife ava ovachopokela ashike, shaashi ngeenge owe va hange ngo peenhele doikolwifa opo, oto hange omumati ta lande omalodu afa talande oipilangi yonduda, ye tapopi ne okanya kapwako afa omushamane tauvilike eenduda daye.
Mongula elume oleli la kwatelwa vali moshipangelo shaKatutura lakwatwa ko TB yomalodu, ndele vati ina nalombwelwe meendelelo kutya omumati waye okuli moshipangelo, kushi ngo eshi itaa kalelwa ku babe waye ou vapanga naye tavali oushimba, oshili omwadina ovanhu ta.

Oshili ame nghishi vali eshi hamukatala koushimba nande nandilipule ngo moule mwi, omumati aya koushimba mo1992 ndele nadjeko omo 2016 eya keenghali da ina, ye eshi eya ovanhu ovatuma vali oimaliwa koushimba tafutilwa adjeko vati opo euye akale pefudiko la ina vakwetu oshili.

Otashi kwafele vali shike nande pefudiko lanyoko inokalapo, ototi ne omudimba otawaanyemo medu ngeenge kupo, ove nakufya kakwali umuhole shili ngeno ho ya kuye manga ena omwenyo eedula adishe odo ngeenge onyoko shili.

Pwilikina oixuna utale, vati tatekulu umwe okwaya koushimba mo 1960 ye ota kala ashike mo Rehobotha omo, ye otaxulifa mo 2013, ko taku tumwa ne vati ovatekulu vakataleko omudimba waxekulu.

Oiyolifa oya li nee apa nonande ovanhu vali meenghali, ovatekulu aveshe vatatu ava tava shingi otuwa yavo tava ka tala omudimba waxekulu koushimba, oshili kave mushi nande nande nokoshipala ngheengo va dalelwe vemu mone nomoshipala molwaashi eshi aya koushimba okwafiya inaava dalwa.

Oshitivali tatekulu Kakoto ka Handjaba ou afya, eshi aya koushimba konima yeedula okwe ke lilukulula vali edina limwe vati oye Damasebar edina loshiDamara, ta, pwilikina oiyolifa pokila yoshipangelo ovamati  vovaKwanyama tava lwile omudimba wovanhu wovaDamara.

Paife ounona vatatekulu Kakoto ka Handjaba ava adalele koushimba veli vane vova Damara, oshili kaveshaafane novatekulu vaxe ava vaila omudimba.

Paife ovamati otava pulwa ne veli pokila yoshipangelo, nye vatatu omwa hala shike mwakalapo ngo nale nale opo hano nye itamu popi? omumati umwe ta nyamukula, otwa hala omudimba watatekulu Kakoto ka Handjaba.

Omunailonga umwe vati teva ifana meni vatale omudimba waxekulu ngeenge omo ngo uli molwaashi edina eli tava popi kali shivike nande, pwilikina ovamati va tendelwe enghete kunakufya wombwiti nee.

Paife otaveli tale ngo ne koipala novamwaina ava vovaDamara vo itava popi vatuleko nande okastoli ne molwaashi kavelishi, paife ovamati oveli ne molaina kwatiwa navatale omidimba komadina nokoipala ngeenge tava mono omudimba watate Kakoto.
Ohakuti ne vatale omudimba ou aayee, omumati umwe ota lombwele vakwao ta ti, kamu weteko vakwe opo tu shininge shipu, mutu nakufya tatekulu okuna kukala kwali mulaula afa meme, paife otavatale ne omudimba ou ulaula wafa ina yavo.

Oiyolifa kaanave yomumati aile koushimba ndele takulupileko paife otamonifa ngoo nee ovanhu oixuna. Vo ovakahakela pomudimba wa Damasebar, omumati umwe okwati omudimba ou owafa nee meme wani ta lombwele vakwao ngaho.
Mboli okamona komushamane tatekulu Handjaba kamwe okeuditeko Oshiwambo, ko otakati aiye oo otate ou etu dala keshi Kakoto ka Handjaba oo tamu kongo, omumati umwe otaimo tati, uhu maala omudimba oo owafa ne meme wani.

Ovanailonga vomoshipangelo inavelipula vali ovakufa ongodi va dengele opolife veilombwele kutya nayeendelele okuna ovalumenhu veli vatatu oku vahala okuvaka omudimba.

Opolifi eshi yeuya otaipula omwahala shike valumenhu? , Taipula vali mOshimbulu, omupya omunene vo ihava udu nee elaka lOshimbulu, omupolifie umwe tapula natango mOshimbulu omweya okuvaka?

Paife omumati umwe ota komona ne ta ti, ee molwaashi keuditeko vati okushi otavapulwa takuti nanye omwafilwa hano,opolifi inailipula oya tulike tu membaba kosasiona, vo otava tulwa modolongo vali ovatekulu vaKakoto kwali vaila omudimba waxekulu vo kave mushi.

Oshili omumati ngheengo aile koushimba aka longa ndele ihadiko euye keumbo yeemwene ndele nafiyo takulupileko, ndele axulife vati ovalumenhu navakatale omudimba waxekulu vo kavemushi oshili oyoolifa kombada yedu.

Efimbo limwe otwa pumbwa okulilonga nawa kutya, nakufiyapo ounyuni ngeenge okwali ehole ponhele yonhumba ndele opo axulifila, opo ashike napakwe opo molwaashi opo ehole ye navali opo akulila efimbo limwe oku totwala neenghali keshivikeko onghe ne ohashikala shidjuu.

Vamati kwaalo ne ava muli moVenduka omo, nye ihamu longo hano nye ihamuuya komaumbo koludume hano, onghe nee efiku tamu ka fiyapo ounyuni ou, oshili ovakwanedimo veni omalutu kava kala ngo inavaa yandjapo kumuni wa Venduka a longepo oilonga oyo.
Oko kutya ovamati ava mwaya koushimba longeni ndele tamu shuna komaumbo eni oku mwadja, ndele inamu ka ninga eembwiti nye tamu ka hombola nokwooteka omapata oonanghali yokeulu eshi tashi ke mululila nye opo tamu alukile komaumbo nye mwakwewa nale eeshikele kuvakweni nye muhena eshi muna vali.

NB: Omadiladilo noshipopiwa eshi ashishe oomushangi yeemwene ndele nee kaashi a Kundana.

JOHN YA TUYENI
MRTUYENI76@GMAILA

LEAVE A REPLY

Please enter your comment!
Please enter your name here