Aanafaalama yaMangetti ya pandula epangelo

0
266
Aanafaalama iilyo yehangano Mangetti Farmers Association pethimbo lyoshiindingili niitelekela mbyoka ya li ya ningilwa pOkapya moshikandjohogololo Nehale lyaMpingana oshiwike shaziko.Oya kuutumba pamwe nOminista yUunamapya nuuniimuna Omeya nOmakuti John Mutorwa.

MANGETTI – Ehangano lyoMangetti Farmers Association olya pandula epangelo na unene Ominista yUunamapya , Omeya nOmakuti molwiilonga iiwanawa mokukondjitha nokusinda omukithi gwekondo nelaka moshilongo.

Ekalepo lyomukithi nguka gwomukwayu mokati kiimuna yokuumbangalantu olya li lya nayipike onkalo yuunangeshefa waanafaalama yomomahala gaayehe. Molwashoka iimuna kaya li we ya pitikwa oku inyenga okuza kehala limwe okuya kekwawo pwaana epitikilo lyoondohotola dhuundjolowele wiimuna.

Omahala moondjila oga li ga tulwapo okukondjitha etaandelo lyomukithi nguka sigo osho epangelo okupitila mOshikondo shUunamapya lya igidha ishewe mu Januali nuumvo kutya omukithi ngoka ogwa sindika , naanafaalama otaya vulu ishewe okulanditha iimuna  yawo ya manguluka.

Esindano molugodhi nduka lwomukithi gwekondo nelaka olya nyanyudha aanafaalama yaMangetti mboka nee yi imanga kumwe nokulongekidha esiku lyowina mpoka ya ithana Minista John Mutorwa naanambelewa ye opo ye mu pandule nepandulo lyashewa.

Omunashipundi gwehangano ndika Ismael Shailemo oye a li a kwatele komeho elongekidho lyokupandula Oshikondo shUunamapya .Shailemo okwa li a gongala pamwe niilyo yehangano lyawo momasiku 17 Febuluali nuumvo, nokukundathana opo ya longekidhe esiku lyowina mono taya gandja olupandu lwawo kuMinista naniilonga ye molwomasindano ngoka ya adha.

Omasiku gaali gomwedhi nguka omomoka aanafaalama yali ya ningi oshituthi mpono ya popithwa kuMinista gUunafaalama Omeya nOmakuti. Oshituthi shika oshali sha ningilwa pOkapya kOmangeti moshikandjohogololo shaNehale lyaMpingana mOshikoto.

“Otwa longekidha owina esiku ndika opo tu tsakanene na Minista pamwe naaniilonga ye, tse tu gandje omapandulo getu ngoka twe mu nunina. Otwa pandula epangelo osho lya longo nuudhiginini, sho lya li lya wende iimuna ayihe noku kwashilipaleka kutya olya sindana miilonga yokukondjitha ekondo nelaka. Tse aanafaalama hatu hupu miimuna otwa li twa limbililwa molwashoka ka twali hatu vulu okwiinyengitha iimuna okuza kehala lyontumba nokuya ke hala lyongandi,” Shailemo  ta ti.

Ehangano lyaaniimuna naanamapya olya gandja oongombe mbali kuMinista John Mutorwa olupandu lwe mwene, ye a tale kutya oongombe ndhoka ote dhi longitha shike nongiini ye mwene nezimo lye.

Shailemo okwa ti Mutorwa omutiheyali mwaamboka ya pewa omagano goongombe konima sho ehangano lyoMangeti lya totwapo. Yamwe mboka woo ya pewa omagano kehangano ndika, Omukokoli Peresindende Sam Nujoma, Omundohotola Hage Geingob,Nangolo Mbumba,Hidipo Hamutenya,Helmuth Angula na Netumbo Nandi Ndaitwah.

Okwa uvaneke ati natango otaya tsikile okulonga oshilonga shuunafaalama, yo ta ya gandja wo omagano opo epipi ndyoka tali ya li mone lyo li tseye ondjokonona yehangano ndika.

“Ehangano lyetu olina aanaafaalama yaza miitopolwa Oshikoto,Ohangwena,Omusati nOshana, mboka yi imanga nokulongela muukumwe okuyambulapo iilonga yuunafaalama.

Iilyo oyindji yehangano oyali ya gongala noku tungathana oshoka oyena elalakano ya yambulepo ehangano lyawo, yo ya tsikile noshinakugwanithwa shuunafaalama. Ehangano ndika olya gandjele omakwatho kiipangelo ngaashi Engela oshowo Oshikuku, no hali gandja omagano kaawiliki yopombanda.

Olya totwapo moomvula dhonale manga oshilongo inaashi manguluka mewiliko lyOmukwaniilwa Immanuel Kauluma Elifas, nelalakano lyokukalekapo omahala gomaulithilo oshowo oku gamenenapo uushitwe inaau yonaguka opo mbuka wu adhike nokulongithwa komapipi omagundjuka.

 

LEAVE A REPLY

Please enter your comment!
Please enter your name here