A mbothagula omukiintu omukwawo noombele sigo eso

0
439

ONGWEDIVA –Aakalimo yomolukanda lwaNampila moshikandjohogololo shaEtayi moshitopolwa shaMusati oya haluthwa konkundana yaakiintu yaali mboka yakondjo  sigo gumwe ta kanitha omwenyo gwe ombaadhilila.

Okwa hokololwa kutya aakiintu mbaka yaali, oya kala ookuume ethimbo ele ndele uufelende tawu teka ombaadhilila, ashike ohela gumwe okwa nyenyeta na mukwawo anuwa sho a kala temu popi ta ti okwa otekwa ye ina hombolwa.

Nakusa Nuugwanga Ndanyengwa Alugodhi, 30, okwa li a tsuwa nombele kumukwawo ngoka ena oomvula 46 iikando ine mombunda nomolutu.

Oombangi ndhoka dha gandja ehokololo odha ti kutya anuwa Alugodhi okwa pula mukwawo ngoka gwedhina Susan Nelumbu kutya omolwashike emu popile kutya okwa otekwa ye inaa hombolwa.

Aahokololi mboka ya li oya li ye mu lombwele a ethe oohapu ndhoka oshoka odho wala ihe okwa ti ye otayi opo Nelumbu emu lombwele nawa kutya omolwashike ena okumu hokola.

Okwa hokololwa kutya Alugodhi okwali ashike eya puundingosho opo a ka kongele omwana ngoka ena oomvula hamano okinda.

Ashike sho eya puundingosho oya tameke nduno olugodhi ndoka sho a lombwelwa oohapu ndhoka.

Oombangi odha ti kutya sho ngaa Alugodhi ta umbu ongonyo ye Nelumbu okumuna ombele sigo okwa hulithile mpoka.

“ Opolisi sho ya thiki po oyali yati kutya omuntu ngoka okwa hulitha na Nelumbu okwali ayi wa naye ,” aahokololi ya hokolola ngaaka.

Sho omupopiliko gwopolisi moMusati a dhengelwa ku Kundana okwa koleke oshinima shika ati kutya  Nelumbu okwa kwatwa po na okwa falwa kodhonlongo yoomeme kOnandjamba ihe ota ka holoka mompangu kOshakati.

Ihe okwa ti ye shoka sha etitha oontamanana keshishi naanaa ihe okwa ti aantu mbaka oya kala ookuume nale nomufekelwa okwali a kongela mukwawo iilonga mobar pehala opo tuu mpoka.

Omakonaakono gopolisi otaga tsikile na aakwanezimo oya tseyithilwa nale eso ndika.

 

LEAVE A REPLY

Please enter your comment!
Please enter your name here