Peter Ondume yomomufitu: Etalelo po komukunda gwetu

0
518
Peter Jungle Fighter

 

Okuthika megumbo lyaakuluntu yandje okwa li oshinima oshinyanyudhi unene monkalamwenyo yandje.

Shono nda thiki megumbo, tate oye a taamba ndje nokwa fala ndje poshinyanga mokati kegumbo, mpaka opo ha pa kundilwa aayenda ya simana.

Okuya kwandje kegumbo okwa li egalukilo kegumbo lyomukondjelimanguluko ngoka a mana iilonga, unene tuu sho nguka kaali ena etegameno nenge ondjodhi yokugalukila kegumbo nando esiku limwe ena omwenyo, okushitalela miita moka ye a li ta kondjo. Ondume yomomufitu oshowo omukwiita gomonanguwi a li ha longo iilonga ye oye awike, nguka a li ena ompito yokukala oye gumwe gwaamboka ya kanithilamo oomwenyo dhawo miita yekondjelomanguluko.

Ihe pompito ndjika otandi pandula ishewe Kalunga Omunankondo shono ngame nda vulu okumona ehulithepo nefumviko lyomulandu omululu gwepangelo lyokatongotongo oshowo evalo lyoshilongo shuudemokoli shoka aakondjelimanguluko oyendji ya gandjele oomwenyo dhawo.

Mpaka opo pegumbo lyaandjetu moka nda kala no nda putukila okuza tuu omumvo 1959. Ehala ndjoka onde li thigilepo ashike, sho nda yi muundjendi koAngola hoka nda kala uule womimvo 12 tandi kondjele emanguluko lyevi lyoomeme okuteya ondjoko yuupika wokatongotongo.

Sho aashiinda naantu yopomukunda gwetu yu uvu kutya ngame ondeya po mbaka oye ya kaandjetu okutaamba ndje oshowo ye ya yuuve kombinga yaanona yawo aamati naakadhona mboka ya yile muundjendi ndele ina ya galuka mo natango.

Etaambathano lyoludhi nduka olya kala tali ningwa konyala shaampoka moshilongo ashihe mpoka oonakugaluka ya kala taya taambwa komazimo gawo sho ya galuka okuza kombanda. Ihe omazimo gamwe kaga li gena elago okutaamba oyana oshoka yamwe oya sile muundjendi nongeyi oya gandjele emanguluko lyoshilongo omwenyo dhawo opo shika shi vule okwiithikamena.

Oyendji yaamati oshowo aakadhona yomomukunda gwetu naamboka wo yokomikunda dhilwe popepi nokokule oya futu ondilo sho ya gandja oomwenyo dhawo opo oshilongo shetu shi manguluke okuza muukoloni.

Yamwe yomoohailwa yomOmatando oshowo komikunda dhimwe mboka inaa ya galuka mekondjelomanguluko lyEvi lyOmapenda oya kwatelamo, Shonena Amukwaya Weyulu-Omatando, Angula Negumbo-Omayanga, Filemon Tobias Ashipala-Omatando, Ignatius Nangolo[captain]-Omatando, Thadeus Amundjela Ashipala-Omatando, Mee Shimooli-Omatando, Shekufewa Tobias Ashipala-Omatando, Kaboy Mwandingi-Omusheshe, Richard Taulinge Andima Kalume-Omayanga, Peter Amutenya Kautondokwa-Omusheshe oshowo yalwe.

Mbaka oyo yamwe yomapenda ngoka inaaga tseyika nawa mboka ya gandja oomwenyo dhawo opo ombinzi yawo yi tsikile okutekela emanguluko lyetu. Aakondjelimanguluko mbaka oya si taya kondjele emanguluko lyevi lyoomeme, oomwenyo dhawo nadhi vululukwe nombili apehe mpoka ya fumvikwa moNamibia nenge moAngola. Ota tu ya saluta neifupipiko molwashoka oyi igandja no inaa ya ndalapatela ombinzi yawo omolwemanguluko lyetu.

Pethimbo nda yi muundjendi omvo 1977 omukunda gwetu ogwa li gu na iihwa ya thita nomiti odha li hadhi kala dha ziza nawa. Ihe sho nda galuka manga tandi ende moshihauto sha tate Jacob okuza kOngwediva onda li nda kumwa okumona kutya aakwashigwana oya li nuuhasha mokusila nawa omudhingoloko gwawo oshimpwiyu. Oshoka osha fa mbaka ya mbugaleke omukunda gwetu ngoka gwa kala gu shiwike nawa mokukala guna iihwa oshowo omiti odhindji.

Tate Jacob okwa helula ndje popepi neyelo lyegumbo lyaakuluntu yandje, ihe shoka sha halutha ndje onkalo yegumbo lyaakuluntu yandje ndjoka ya li ya nyaika, molwashoka tate okwa adhika a koka nokwa li itaa vulu we nawa okukaleka egumbo ndika lili nawa ngaashi lya kala shito.

Nando ongaaka tate okwa li a nyanyukwa okutaamba ndje nenge okutaamba omwana gwe gwomoyana yatano mboka ya li muundjendi. Ongame nda li gwa hugunina okuya kegumbo okuza muundjendi, oshoka Silverius Fikameni [kansela nale gwoshikandjohogololo Ongwediva], Silas Nujoma Ekandjo [oshilyo shetanga lyopolisi lyo Special Field Force na Olivia Martha Ekandjo –Imalwa [Omutamaneki Ndjayi gwa Namibia] ayehe oya adhika nale ya thika kegumbo iiwike yimwe komeho gandje. Aakuluntu yetu oya li ye na elago okutu taamba atuhe tunomwenyo oshowo tuna uukolele.

Ihe oya li wo noluhodhi oku uva kutya omumati gumwe gwawo Canicius M’kwashigwanekulu okwi igandjele emanguluko lyoshilongo.

Tse atuhe otwa li iilyo yetanga lyoPLAN.

Onkundana ndjoka ya hende ndje okuuva kutya meme okwa kanitha oshipala, kokutya okwa ningi omuposi, onkene kali ta vulu okumona nkene tse twa li twa koka. Oshikwawo otwa kundana wo kutya ootate nameme oya li ya topoka nonando meme okwa li megumbo lye lili mepya olyo tuu ndyoka. Osha li omupya omunene kumeme kutya ina vula okumona nkene omumati gwe ondume yomomufitu nkene ya koka palutu, ihe okwa li ta vulu okutuguma noku mona kutya otwa koka palutu. Meme okwa li omukiintu omunankondo nokwa li a taambako onkalo ye nokwa tsikile okukwatha aamwayina ayehe pwafa ashike inaapu ningwa sha. Kombinga yetu natse otwa li tu uvu na yi kombinga yehulepo lyomumwamememati omukuluntu Simeon Nghifikwavali Ekandjo momasiku 7 Juli 1985.

Sigo oompaka ohatu mono omayele omawanawa okuza kumeme Ndapwa moonkalo dhetu dhesiku kehe.

Pethimbo nda thiki pomukunda gwetu olya li ethimbo ndyoka pwa kala omambandameko nomatilitho ganingwa koothondolo dhoKoevoet unene tadhi ga ningile aantu mboka ya talika aayambidhidhi yehangano ekondjelimanguluko SWAPO. Iilyo yoKoevoete oya kala hayi ende momukunda nomahauto anuwa go DTA [Democratic Turnhalle Alliance] ta ya dhenge nokutuka aantu mboka yewetike oyo aayambidhidhi yoSWAPO mwakwatelwa naamboka ya galuka okuza muundjendi. Molwashoka kandali nando ndu uvite nawa konkalo yegameno moshitopolwa Ongwediva onda tokola okukala ashike pegumbo oshiwike shimwe omanga inaandi ya kOndonga okukatalelapo aakwetu.

LEAVE A REPLY

Please enter your comment!
Please enter your name here